Mataio 18:1-35
18 Ame ngöne la hawa cili, itretre dreng a hnyinge koi Iesu ka hape: “Drei la ka tru ngöne la Baselaia ne hnengödrai?”
2 Ame hnei Iesu hna hëne la ketre nekönatr me acili nyën nyipi angatr,
3 me hape: “Eni a qaja hnyawa koi nyipunie laka, e tha saze* kö nyipunie matre tune la nekönatr celë, tha tro kö nyipunieti lai a hane lö kowe la Baselaia ne hnengödrai.
4 Haawe, ame la atre ipië angeice kö tune la nekönatr, tre angeice hi la ka tru ngöne la Baselaia ne hnengödrai.
5 Nge ame la atre kapa la nekönatr ka tui nyëne la, pine la ëjeng, angeice fe hi lai a hane kepe ni.
6 Ngo ame la atre akeine la ketre ka co nge ka lapaune koi ni, loi e troa athip ngöne la nyinawa i angeic la ketre ietë ka tru nyine amudron hna hule hnei boliko, nge troa ce kuiëne me angeic e kuhu hnagejë.
7 Hnëjine hë la fen, pine ukune la itre atr troa kuca la ngazo! Maine eje hi laka, tro kö a hetre ewekë ka troa huli së* troa kuca la ngazo, ngo ekölö hi ni pe lai atre akeinyi së.
8 Haawe, maine eö a kei pine la ime i eö me waca i eö, thupatrije pi, ke loi ju kö koi eö troa lö kowe la mel, nge patre pë hë la ketre götrane la ngönetrei eö, hune la troa ce apatrene palua eö memine la lue im, me lue ca i eö ngöne la eë.
9 Ketre tun, maine eö a kei pine la alameke i eö, seatrije pi. Ke, ka loi e tro eö a lö kowe la mel me ca alamek, hune la troa ce kuië eö memine la lue alameke i eö kowe la Gena.*
10 Wange pala kö, the wangacone kö la ketre atr ka tune la nekönatr, ke eni a qaja hnyawa koi nyipunie laka, itre angela i angatr pala hi a iqëmekekeu me Kaka e hnengödrai.
11 ——
12 Nge tune kaa la mekuna i nyipunie, e tro la ketre atr a hetrenyi la 100 lao mamoe, nge paatre ju hi la ketre, hapeu, tha tro kö angeice lai a pane nue lai ala 99 ngöne la wetr, matre thele la ka paatr?
13 Nge e öhne hë angeic, eni a qaja hnyawa koi nyipunie laka, tru catre hmaca kö la madrine i angeic kowe la ka paatr, hune lo ala 99 ka lapa pe.
14 Ketre tune mina fe, tha aja i Kakati* kö e hnengödrai troa paatre la ketre ka co celë.
15 Ketre, maine tro la ketre trejin a kuca la ketre ewekë ka ngazo, tro jë koi angeic, nge ce ithanatane* jë epon. Nge maine tro angeic a drei eö, haawe, mele hë lai trejine hnei eö.
16 Ngo e tha kapa kö angeic, ce tro jë memine la ala cas, maine lue xan, ke tro ha eje la nöjei ewekë hnene la hna anyipicin* hnei ala lue maine ala kön.
17 Nge e tha kapa pala kö angeic la hna qaja hnei angatr, hëne jë la ekalesia. Ngo e tha kapa pala hi angeic, xomi angeice jë ceitu me atre ne fen, maine ketre atre hle mani.
18 Eni a qaja hnyawa koi nyipunie laka, ame la itre ewekë hnei nyipunie hna acatren e celë fen, tre hna acatrene fe hë lai e hnengödrai. Nge ame la itre ewekë hnei nyipunie hna seng e celë fen, tre hna senge fe hë lai e hnengödrai.
19 Nge eni fe a qaja hnyawa koi nyipunie laka, maine tro la lue atr a ca mekune göne la ketre ewekë ka tru nyine troa thithi fë, tro hë la Kemeng e hnengödrai a kapa la sipo i nyidro.
20 Ke ame la kola icasikeu ngöne la ëjeng hnene la ala lu, maine ala kön, eni fe hi lai e nyipi angatr.
21 Ame hnei Peteru hna hnyingë nyidrë ka hape: “Joxu, tro ni a aija nue la ngazo ne la trejine me eni e traqa ju angeic ngazo koi ni? A seven?”
22 Matre sa jë hi Iesu ka hape: “Eni a qaja hnyawa koi nyipunie laka, tha sevene kö, ngo 77 pe.”
23 Ame la Baselaia ne hnengödrai, tre tune la ketre joxu ka upe la itre hlue i nyidrë troa isa të la gufa i angatr.
24 Matre ame hë la nyidrëti a nyiqaane kapa la manie, tro fë pi hi koi nyidrë la ketre hlu ka trene gufa, a traqa koi 10 000 lao talan.*
25 Ngo pine laka, thatreine kö angeice të, ene pe, amekötine jë hi la joxu troa salemëne la nöjei ewekë i angeic, me angeice fe, me ifënekö i angeic me ha nekö i nyidro, matre troa të la gufa.
26 Nge e cili, sa iwatingöne ca* ju hi lai hlu, me sipon treijëne koi nyidrëti ka hape: ‘Ekölö hi ni joxu, pane treqene jë, ke tro kö ni lai a të asë la gufange koi nyipë.’
27 Ame hnene la joxu hna utipi angeic, me nue angeice hmaca, me thëthëhmine la gufa i angeic.
28 Ngo ame hë la angeic a ixelë memine la ketre hlue ka trene gufa koi angeic, a traqa hi koi 100 drenari,* angeic a xolouthi nyëne ju, me öje la nyinawa i nyën me hape: ‘Canga të pi lo manieng!’
29 Nge nyën a sa iwatingöne ca ju me sipone treijëne ka hape: ‘Eni a sipo eö troa pane treqen, ke tro kö ni lai a të asë la gufange koi eö.’
30 Ngo ngazo pe, xele kö angeic, ame hnei angeice hna kuië nyën kowe la kalabus uti hë la troa të asë la gufa.
31 Öhne ju hi lai hnene lo itre xa hlu, nge hace ju hi la itre hni angatr, matre angatr a tro pi kowe la joxu troa qaja la ewekë ka traqa.
32 Ame hnene la joxu hna hë angeic me hape: ‘Hlue ka ngazo, ase hë ni lo nue hnyawa la gufa i eö lo eö a treije fë koi ni.
33 Ngo hapeu, ngazo koi eö troa utipine la sinee i eö tune lo aqane hnimi eö hneng?’
34 Ame hna elëhni la joxu, nge nyidrëti a nue angeice pi kowe la itretre thupë kalabus, uti hë la tro angeic a të asë la gufa i angeic.
35 Haawe, tro fe a hane kuca tune koi nyipunie hnei Kaka e hnengödrai, e tha nue kö nyipunie qaa kuhu hni la ngazo ne la ketre trejin.
Itre mekun ecahu fen
^ Maine, “ujë.”
^ Ger., “etë ne iathixötrë.”
^ Wange ju la HQP.
^ Maine jë, “keme i nyipunie.”
^ Ger., “hajin.”
^ Ger., “që.”
^ Ame la 10 000 lao talan sileva, tre, 60 000 000 lao drenari. Nge ame la drenari, tre manie i angetre Roma. Nge ame la ca drenari, kolo thupen ne la atre ka eënyi la ca drai ka pexej. (Wange ju la HQP)
^ Maine, “thil.”
^ Wange ju la HQP
