Mataio 2:1-23
2 Ase hë hnaho Iesu e Bethelema e Iudra lo hneijine i Herodra* joxu. Hanawang! traqa pi hi qaa koië la itre magoi* e Ierusalema,
2 me qaja ka hape: “Ekaa la atre hna hnahon, joxu i angetre Iudra? Ke hne huni hna öhne la wëtresij i nyidrë lo eahuni ngöne la götrane koië, matre eahuni a traqa troa atrunyi* nyidrë.”
3 Ame la kola drenge lai hnei Herodra Joxu, tha lapa hnyawa ha nyidrë, me angetre Ierusalema asë.
4 Ame hnei nyidrëti hna icasinekeun asë la itre tane i angetre huuj, me itretre cinyihan, me thele troa atre thei angatr la götran hnë troa hnahone la Keriso.*
5 Öni angatre koi nyidrë: “E Bethelema e Iudra, ke celë hi hna cinyihane hnene la perofeta lo kola hape:
6 ‘Nge ame eö Bethelema ne la nöje Iudra, tha ka co kö eö qa ngöne la itre tane i angetre Iudra, ke troa xulu qaathei eö la atre mus, lo ka troa thupë Isaraela nöjeng.’ ”
7 Ame hnei Herodra hna hëne juetrëne la itre magoi, me thele troa atre thei angatr lo ijine mama la wëtresij.
8 Ame hë la kola upi angatr a tro Bethelema, öni nyidrëti koi angatr: “Tro jë, nge thele jë la nekönatr, nge e öhne hë nyipunie, thuemacanyi ni jë matre tro fe ni a hane tro, me atrunyi nyën.”
9 Thupene la kola ase drenge la joxu, angatr a xome hmaca jë la gojeny, nge hanawang! Kola tro qëmeke i angatr la wëtresij, lo hnei angatr hna öhn ngöne lo götrane koië, uti hë la ej a cil hune la hnë lapa ne la nekönatr.
10 Angatr a goeëne la wëtresij, ame hna madrin atraqatr.
11 Ame hë la angatr a lö hnine la uma, öhne ju hi angatr la nekönatr me Maria thine i nyën, ame hnei angatre hna sa iwatingöne ca, me atrunyi nyën. Nge angatr a fe pi la itre trenga mo i angatr, me amë qëmeke i nyëne la itre ahnahna, ene la gol, me libanu* me muro.*
12 Ngo hnene laka, hna sewe angatre ngöne la pu troa bëeke hmaca koi Herodra, haawe, angatr a xome jë la ketre gojenyi troa bëeke kowe la nöje i angatr.
13 Angatre hë koilo, nge hanawang! Mama pi hi la angela i Iehova* koi Iosefa ngöne la pu, me hape: “Cile jë, xome jë la nekönatr me thine i nyën, nge kötre jë Aigupito eë, me lapa e cili uti hë la tro ni a thuemacanyi eö, ke tro Herodra a thele troa humuthe la nekönatr.”
14 Ame hnei angeic hna cile jë, me xom e jidr la nekönatr me thine i nyën, me tro Aigupito.
15 Hnei angeice hna lapa e cili uti hë la meci Herodra. Kolo lai a eatrëne lo hna qaja hnei Iehova* jëne la perofeta i nyidrë, ka hape: “Hnenge hna hëne la neköng qaa Aigupito.”
16 Öhne hë Herodra ka hape, hna amenu nyidrë hnene la itre magoi, ame hnei nyidrë hna elëhni atraqatr, me iup troa humuthe la itre nekönatre trahmanyi asë e Bethelema, me ngöne la nöjei hlapa xötreith, qaane ju hi la itre nekönatre ka lue macatre a uti ipië. Hnei Nyidrëti hna amekötine lai, thenge lo ijin hna qaja hnene la itre magoi ka hape, hna mama la wëtresije koi angatr.
17 Matre, eatre hë la hna qaja hnei Ieremia perofeta, kola hape:
18 “Hna dreng e Rama la nine latresi, me hleuhleu atraqatr. Rakela a treije pine la itre nekö i eahlo, nge pëkö atre atreine aupune la hni eahlo, ke patre hë nyudren.”
19 Meci hë Herodra, nge hanawang! Mama pi hi la angela i Iehova* koi Iosefa ngöne la pu e Aigupito,
20 me hape: “Mejë jë, xome jë la nekönatr me thine i nyën, nge tro jë kowe la nöje Isaraela, ke meci hë la itre ka thele troa xome la mele* ne la nekönatr.”
21 Ame hnei angeice hna mejë me xome la nekönatr, me thine i nyën me tro kowe la nöje Isaraela.
22 Ngo ame ju hi la angeic a drenge ka hape, Arekelao la Joxu ne Iudra, kola nyihna i Herodra keme i angeic, xou ju hi Iosefa troa tro cili. Ketre hnene laka, hna sewe angeic ngöne la pu, matre angeic a tro ju pe ngöne la ketre götran e Galilaia.
23 Ame hnei angeic hna lapa ngöne la traon hna hëne ka hape, Nazareta, matre troa eatre lo hna qaja hnei itre perofeta ka hape: “Troa hë nyidrë ka hape, atre Nazareta.”*
Itre mekun ecahu fen
^ Wange ju la HQP.
^ Maine, “itre atr ka thele ewekë jëne la itre wëtresij.”
^ Maine, “thil.”
^ Maine, “Mesia; Hna Iën.”
^ Ewekë nyine dreuth matre pui loi.
^ Paudra ka pui lolo.
^ Wange ju la HQP.
^ Wange ju la HQP.
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Ka xulu qa ngöne la hnëewekë “zin” qene Heberu.
