Mataio 20:1-34
20 “Ceitune la Baselaia ne hnengödrai memine la ketre trene hnalapa, ka tro e sine hmakanyi troa thele atr troa huliwa ngöne la hnënge vine i nyidrë.
2 Matre, ase jë hi angatr ce axeciëne troa kapa la ca drenari* kowe la ca drai ne huliwa, nyidrëti a upi angatre ju kowe la hnënge vine i nyidrë.
3 Nge ame hë ngöne la hnaakönine hawa,* tro hmaca pi hi nyidrë, me traqa kowe la hna maketr a öhne la itre ka pë huliwan;
4 matre öni nyidrëti jë hi koi angatr: ‘Tro jë fe nyipunie kowe la hnënge vin, nge tro kö ni a hamë nyipunie la thupene ka ijij.’
5 Ame hnei angatre hna tro kowe la hnënge vin. Nge hnei nyidrëti hmaca hna tun ngöne la hnaasikisine hawa,* me hnanaenene hawa.*
6 Nge ame fe ngöne la hnalevinene hawa,* öhne hmaca jë hi nyidrëti la itre xa atr, nge öni nyidrëti jë hi, ‘Pine nemene matre nyipunieti pala hi la ngöne la drai ka pexej ngo tha huliwa pe?’
7 Sa jë hi angatre ka hape: ‘Pë fe kö ka hane pi hë hun.’ Matre öni nyidrëti hmaca jë: ‘Nga tro jë fe nyipunie kowe la hnënge vin.’
8 E heji hë, hnene la maseta hna upe la tane huliwa me hape, ‘Hëne asë jë la itre ka huliwa nge nyithupei angatre jë, pa i itre ka traqa pi, nge thupene lai, itre ka traqa pa.’
9 Ame la kola traqa hnene la itre ka huliwa ngöne la hnalevinene hawa, hamë angatre pi hi la isa ca drenari.*
10 Matre hnene la itre ka huliwa pa hna mekune ka hape, troa hamën atrune koi angatr, ngo ame pe, hna hamë angatre fe la isa ca drenari.*
11 E cili, angatr a nyiqaane qaja angazone la maseta.
12 Öni angatr: ‘Ame la itre atr celë, hnei angatre hi hna huliwa koi ca hawa, ngo nyipëti a xome ceitu angatre la me eahun, itre hna cinajön me ka huliwa catre ngöne la drai ka pexej.’
13 Matre öni nyidrë kowe la ketre ka hape: ‘Sineeng, pëkö iwesitrë i nyiso. Hnei nyiso lo hna ce axeciëne la ca drenari* kowe la ca drai ne huliwa, mekune hi eö lo?
14 Xome jë la thupe i eö, nge tro jë hë, ke ajange troa ceitu la thupei epun.
15 Hapeu, tha meköti kö la tro ni a kuca la mekunang memine la itre ewekëng? Nge hapeu, lue meke i eö a piin* ke ka ham eni?’
16 Ketre tune mina fe, tro ha tro pa la hnapin, nge tro ha tro pi la hnapan.”
17 Ame hë la angatr a elë Ierusalema eë, Iesu a hën acone jë lo ala 12 e kuhu gojeny, me hape:
18 “Hanawang, easë hë la a tro Ierusalema, nge e cili, tro ha nue la Nekö i Atr kowe la itre tane i angetre huuj, me itretre cinyihan. Nge tro hë angatre lai a amekötine troa humuthi angeic.
19 Nge troa nue angeic kowe la itre atre ne fen, nge tro angatr a hnyimasai angeic, me wameucë angeic, me jei faonyi angeic hune la sinöe ne iaxösisi, nge ame hë ngöne la hnaakönine drai, tro ha amele angeic hmaca.”
20 Thupene lai, traqa pi hi la thine ne la lue nekö i Zebedaio a easenyi Iesu cememine la lue nekö i eahlo. Nge eahlo a atrunyi* nyidrëti jë, me sipo koi nyidrë.
21 Öni Iesu jë hi: “Nemene la aja i eapo?” Sa jë hi eahlo ka hape: “Epi tro nyipëti a amekötine matre tro la lue nekönge celë, a lapa ezi nyipë ngöne la Baselaia i nyipë, ketre ngöne la götrane maca, nge ketre ngöne la götrane mi.”
22 Öni Iesu jë hi: “Thatre kö nyipunie la hnei nyipunieti hna sipon. Nge hapeu, ijiji nyipunieti fe kö troa hane ij ngöne la ver hnenge hna troa ijin?” Öni nyidroti jë hi: “Ijiji nyio fe.”
23 Sa jë hi Iesu ka hape: “Maine nyipici laka, tro fe epon a hane ijine la vereng, ngo ame pë hë göi atre lapa ngöne götrane macang me ming, tre lue göhnë lai hna hnëkëne hnei Kakati thatraqane la itre hnei nyidrëti hna iën.”
24 Matre atre jë hi lai hnene lo ala treen, ame hnei angatr hna wesitr kowe la lue trejin.
25 Matre Iesu a hë angatre jë me hape: “Atre hnyawa hi nyipunie laka, itre joxu ne la itre nöj a musinëne la itre atren, me itre ka draië ne la fen a qene joxu.
26 Ngo tha tro pi kö a hane tune thei nyipunie; ke ame la atre ajane troa draië, tre, tro angeic a hlue i nyipunie,
27 nge ame la atre ajane troa pa thei nyipunie, tro angeic a nyihlue i nyipunie.
28 Ketre tune mina fe kowe la Nekö i Atr, tha hnei angeice kö hna traqa troa hetre hlu, ngo troa nyihlu, me hamëne la mele* i angeic nyine nyi thupene mel kowe la ka ala nyim.”
29 Ame hë la angatr a tro qa Ieriko, hnene la itre atr ka ala nyimu hna xötrethenge nyidrë.
30 Nge hanawang, kola lapa ezine gojenyi la lue timek, nge drenge hë nyidro laka, Iesu hë e cili, ame hnei nyidroti hna suene ka hape: “Ekölö hi ni Joxu, Nekö i Dravita, epi utipi nyio ju!”
31 Ngo hnene la ka ala nyimu hna thahe nyidro, ame hnei nyidroti hna suene catrëne hmaca kö ka hape: “Joxu, Nekö i Dravita, utipi nyio ju!”
32 Haawe, cile pi hi Iesu, me hë nyidro me hape: “Nemene la nyine tro ni a kuca koi epon?”
33 Öni nyidroti jë hi: “Joxu, epi tro nyipëti a fe la lue meke i nyio.”
34 Nge Iesu a utipi nyidro, matre nyidrëti a ketre ju la lue meke i nyidro, ame hnei nyidroti hna goe pi, me xötrethenge nyidrë.
Itre mekun ecahu fen
^ Wange ju la HQP.
^ Kola easenyin e 9:00 e hmakany.
^ Kola easenyin e midi.
^ Kola easenyin e 3:00 e hnaipajö.
^ Kola easenyin e 5:00 e hnaipajö.
^ Wange ju la HQP.
^ Wange ju la HQP.
^ Wange ju la HQP.
^ Ger., “ngazo.”
^ Maine, “thil.”
^ Maine, “u.” Ger., psy·kheʹ. Wange ju la HQP.
