Mataio 21:1-46
21 Angatre hë ezine Ierusalema, me traqa e Bethefage hune la Wetr Elaio,* ame hnei Iesu hna upe la lue atre drei nyidrë
2 me hape: “Tro jë kowe la traone qëmeke i epon, nge tro epon a öhn e cili la ketre boliko föe hna ce hnöthe memine la nekön ej. Senge pi lue ej, nge traqa fë pi koi ni.
3 Nge e traqa ju qaja la ketre ewekë koi epon hnei ketre atr, hape jë: ‘Joxu a ajane lue ej.’ Nge tro hë angeice lai a canga nue koi epon.”
4 Celë hi matre eatre jë lo hna qaja hnene la perofeta lo kola hape:
5 “Qaja ju kowe la nekö jajinyi ne Ziona ka hape, ‘Hanawang, traqa ha koi eö la joxu i eö, ka menyike nyidrë nge nyidrëti e hune la boliko, ene lo neköi boliko.’ ”
6 Ame hna tro pi hnene lo lue atre dreng, me kuca thenge lo hna amekötin hnei Iesu.
7 Nyidroti a xome jë la lue boliko me atë la iheetre i nyidro hune lai lue öni, ame hnei Iesu hna lapa të hune la itre iheetr.
8 Hnene fe la ka ala nyimu hna seluthe la itre iheetre i angatr e kuhu gojeny, nge itre xan a hutra la itre picine sinöe, me haöthe la gojeny.
9 Hetrenyi mina fe la itre xan ka tro pa hui nyidrë, nge ame la itre ka tro pi, angatr pala hi a sue me hape: “Epi amele huni jë, Nekö i Dravita! Manathithi la atre traqa ngöne la ëje i Iehova!* Akötresieti fe, epi amelene jë la Nekö i Dravita!”
10 Nge ame hë la nyidrëti a lö e Ierusalema, hnene la itre atren hna nyi mejen me hape: “Drei lai?”
11 Qaja jë hi la ka ala nyimu ka hape: “Iesu perofeta, atre Nazareta e Galilaia.”
12 Nge Iesu a lö jë kowe la uma ne hmi, me helëne qa lai la itretre salem me angetre itö, nge nyidrëti a kapasaitrëne ju la itre laulau ne la itre ka saze mani, me itre ita ne la itre ka salemë piny.
13 Nge öni nyidrëti jë hi ka hape: “Hna cinyihane lo ka hape, ‘Tro ha hëne la umang, uma ne hmi,’ ngo nyipunieti pena a xome ej nyine uma i itre atrekënö.”
14 Ame hna traqa pi koi nyidrë la itre timek me itre ka pej, nge e cili, nyidrëti a aloinyi angatre ju.
15 Nge ame hë la itre tane i angetre huuj me itretre cinyihan a öhne la itre ewekë nyine hain hna kuca hnei Iesu, me drenge la ha nekönatr* a sue hnine la uma ne hmi me hape: “Epi amele huni jë, Nekö i Dravita!” wesitre ju hi angatr.
16 Öni angatre jë hi: “A tha drenge kö eö la hnei nyudreni hna qaja?” Sa jë hi Iesu ka hape: “Drenge hi ni. Ngo hapeu, tha hane kö nyipunieti e ka hape, tro ha atrunyi Akötresie hnene la që ne la nöjei nekönatre me medreng?”
17 Haawe, Iesu a nue angatre pi me tro Bethania eë, me meköl e cili.
18 E hmakany, nyidrëti a bëeke hmaca jë Ierusalema eë, nge mecijiine ju hi nyidrë.
19 Ame hnei nyidrëti hna öhne la ketre iwacua* ezine gojeny, me jea kow, ngazo pe, pëkö ca wen, ngo idröne hmekuje hi. Matre öni nyidrëti jë hi: “Tha tro hmaca kö eö a wa wen!” Ame hna fitre pi lai isinöe.
20 Nge ame la kola öhne lai hnene la itretre dreng, angatr a hai me hape: “Hnauëne laka, aca tro fitre pi la iwacua?”
21 Iesu a sa jë koi angatre ka hape: “Eni a qaja hnyawa koi nyipunie laka, maine tro nyipunie a lapaun me tha luelu, tro fe nyipunieti a atreine kuca la hnenge hna kuca kowe la iwacua, nge tro fe nyipunieti lai a hane qaja kowe la wetr celë ka hape, ‘Kötre jë nge kei ju ngöne la hnagejë,’ nge tro lai a ej.
22 Nge ame la itre ewekë hnei nyipunie hna thithi fë cememine la lapaun, tro nyipunieti lai a kapa.”
23 Traqa ju hi Iesu kowe la uma ne hmi a hamë ini, nge itre tane i angetre huuj me itre qatre ne la nöj a tro pi koi nyidrë me hape: “Qa kaa la atreine i eö troa kuca la itre ewekë celë? Nge drei la atre upi eö troa kuca lai?”
24 Iesu a sa jë ka hape: “Ca ewekë fe tro ni a hnyingë nyipunie, nge maine tro nyipunieti a sa, ketre tro fe ni a qaja koi nyipunie ka hape, ka xulu qa kaa la atreineng:
25 ‘Qa kaa la bapataiso i Ioane? Qa hnengödrai maine qaathei atr?” Angatr a iqajakeune me hape: “Maine tro sa hape, ‘Qa hnengödrai,’ tro hë angeice lai a sa ka hape, ‘Nga hnauëne laka, tha lapaune kö nyipunieti koi Ioane?’
26 Nge e tro sa qaja, ‘Qaathei atr,’ wai së kö hnene la ka ala nyim, ke ame Ioane koi nyudren, tre perofeta.”
27 Matre sa jë hi angatr koi Iesu ka hape: “Thatre kö hun.” Ketre öni nyidrëti jë hi: “Nga tha tro kö ni a hane qaja koi nyipunie ka hape, ka qa kaa la atreineng.”
28 “Nemene la mekuna i nyipunie? Hetrenyi la ketre trahmanyi ka lue nekön. Hnei angeic hna pane tro kowe la haetra me hape: ‘Neköng, pane tro jë troa huliwa ngöne la vin.’
29 Ame hnei nyën hna sa ka hape: ‘Waea,’ ngo thupene jë hi lai, huliwa pi hi la hni i nyën, matre, nyën a tro ju.
30 Nge kem a tro ju fe kowe la hnaaluene me upi angeice fe. Nge öni nyën: ‘Ö ka loi, eni hë la a tro,’ ngazo pe, tha tro kö nyën.
31 Matre drei e nyidroti la ka kuca la aja i kem?” Öni angatre jë hi: “Kolo haetra.” Öni Iesu jë koi angatr: “Eni a qaja hnyawa koi nyipunie laka, ame la itretre hle mani me itre föe ne gojeny, tre, ase hë angatr thipatrë nyipunie kowe la Baselaia ne hnengödrai.
32 Ke hnei Ioane lo hna traqa koi nyipunie ngöne la nyipici, ngo tha hnei nyipunieti kö hna kepe angeic. Ngo hnene pe la itretre hle mani, me itre föe ne gojenyi hna mejiune koi angeic. Nge ngacama öhne hnyawa hi nyipunieti lai, ngo tha huliwa kö la itre hni nyipunie matre troa kepe angeic.
33 “Drenge ju nyipunie la ketre ceitun: Hnene la ketre trene uma hna eënyi vin, me ekö hage xötreith, me hnëkëne la hnë weje wene vin, me acile la ketre ita ne thup. Ase jë hi, angeic a nue pi kowe la itre xa atre eënyi troa thupën, nge angeic a tro pi kowe la ketre nöje gaa nany.”
34 Nge easenyi hë la ijine menu, upe jë hi angeic la itre hlue i angeic kowe lo itretre eënyi, matre troa menuën la itre wene vin.
35 Ngo hnene pë hë la itretre eënyi hna xolouthe la itre hlue i nyidrë, me lepe angazone la ketre, me humuthe la ketre, me trane hnei etë la ketre.
36 Matre hnei angeic hmaca hna upe la itre xa hlue ka ala nyimu kö hune lo itre ka tro pa, ngo casi pala hi la aqane ujë i angatr koi nyudren.
37 Thupene lai, angeic a upe pi koi angatr la nekö i angeic, me hape, ‘Ke tro angatre lai a metrötrëne la neköng.’
38 Ngo ame hë la angatr a öhne la nekön, angatr a iqajakeune ju ka hape, ‘Hane hi la nekön. Jë fe, matre tro sa humuthi nyën me xome la edrö i nyën!’
39 Haawe, angatr a xolouthi nyëne ju, me huli nyëne tröne la hlapa, me humuthi nyën.
40 Matre, e traqa ju la trene vin, nemene jë la nyine tro angeic a kuca kowe la itretre eëny?”
41 Önine jë la itre hene ne hmi me itre qatre ne la nöj ka hape: “Pine laka, ngazo catr angatr, tro angeic a humuthi angatr me nue pë hë la vin kowe la itre xa atre eëny, itre ka troa hamë angeic la itre wen ngöne la ijine menu.”
42 Haawe, hnyinge jë hi Iesu koi angatre ka hape: “Hapeu, tha hane kö nyipunieti e ngöne la hna cinyihane ka hape, ‘Ame lo etë hna nuetrij hnene lo itre ka xupi uma, tre eje hi lo etë ka sisitria catr.* Nge qaathei Iehova* la ewekë cili, matre hapeu, tha ewekë kö lai nyine tro sa hain’?
43 Hane hi lai kepin matre eni a qaja koi nyipunie laka, tro ha xome qaathei nyipunie la Baselaia i Akötresie, me hamëne kowe la nöje ka troa wa wen.
44 Ketre, ame la atre kei hnene la etë cili, troa hutri angeic, nge ame la atr hna tran hnene lai etë, tro hë angeic a nyilanyila.”
45 Ame hë la kola drenge la ceitune celë hnene la itre tane i angetre huuj me itre Faresaio, trotrohnine ju hi angatr ka hape, kolo hi a qeje angatr.
46 Nge ngacama aja i angatr troa xolouthi* Iesu, ngo angatr a xouene la ka ala nyim, ke ame koi angatr ceitu Iesu me ketre perofeta.
Itre mekun ecahu fen
^ Maine, “Oliv.”
^ Wange ju la HQP.
^ Maine, “nekönatr trahmany.”
^ Maine, “hmejieng.”
^ Ger., “he ne kona.” Wange ju la HQP.
^ Wange ju la HQP.
^ Maine, “oth.”
