Mataio 22:1-46
22 Ame hnei Iesu hna hamëne hmaca la itre xa ceitune koi angatr me hape:
2 “Ceitune la Baselaia ne hnengödrai memine la ketre joxu ka hnëkëne la nyikeine ne la nekö* i nyidrë ka faipoipo.
3 Nyidrëti a upe pi la itre hlue i nyidrë troa hëne la itre hna könën, ngo xele kö angatr ma tro.
4 Matre nyidrëti a upe hmaca jë la itre xa hlue i nyidrë me hape: ‘Qaja ju kowe la itre hna könëne ka hape: Hanawang, ase hë ni hnëkë xen, nge ase fe hë ni humuthe la kaung me itre öninge ka kökötre lolo,* nge tro asë hë. Trohemi kowe la hnë nyikein.’
5 Ngo tha nyipiewekëne kö angatr, nge angatr a isa tro pi, ketre kowe la hlapa i angeic, nge ketre kowe la hnë salem i angeic.
6 Nge ame pë hë lo itre xan, hnei angatr hna xolouthe la itre hlu, me qaqa angatr me axösisin, me humuth.
7 Haawe, elëhni jë hi la joxu, nge nyidrëti a upe pi la itre sooce i nyidrë troa humuthi angatr, me dreuth asë la traon.
8 Nge nyidrëti a qaja jë kowe la itre hlue i nyidrë ka hape: ‘Ase hë ni hnëkëne la nyikein, ngo angatre la ka tha ijij.*
9 Nga tro jë kowe la itre gojenyi e tröne la traon, nge könëne jë la nöjei atr hnei nyipunieti hna troa ixelë memin.’
10 Haawe, tune lo hna amekötin, hnene la itre hlue hna tro kowe la itre gojeny, me hën asë la itre ka loi me ka ngazo hnei angatr hna ixelë memin. Ame hna tiqa pi la hnë nyikein hnene la itre ka traqa troa xen.*
11 Ame la kola traqa hnene la joxu troa pane wange la itre hna könën, öhne ju hi nyidrëti la ketre atr tha ka heetre ne faipoipo kö.
12 Matre öni nyidrëti jë hi: ‘Sineeng, hnei eö hna lö tune kaa, nge pë pe iheetre ne faipoipo i eö?’ Pë kö ca meje i angeic.
13 Önine jë hi la joxu kowe la itre hlue i nyidrë ka hape: ‘Othe ju la lue ime me lue ca i angeice la, nge kuië angeice pi ngöne la gaa jidr e kuhu trön. Nge e cili, tro angeic a treije me latresi.’
14 Haawe, ala nyimu la itre hna könën, ngo xalaithe hi la itre hna iën.”
15 Ame hna traqa pi la itre Faresaio, nge angatr a ca mekune ju troa nyizö Iesu, jëne la itre trengewekë i nyidrë.
16 Matre angatr a upe jë la itretre drei angatr, me itre sine xöle i Herodra troa qaja ka hape: “Atre Ini fe, atre hi huni laka, ka nyipici nyipë, nge nyipëti a inine la nyipici göi Akötresie. Ketre, tha nyipëti kö a thele troa selë nyipë hnei atr, ke tha nyipëti kö a goeëne la pengö i atr.
17 Matre, tune kaa la mekuna i nyipë, meköti kö troa kuiëne la mani hna athip hnei Kaisara, maine waea?”
18 Ngo atre hnyawa hi Iesu la thiina ka ngazo i angatr, matre öni nyidrë: “Itretre thoi, hnauëne laka nyipunie a tupathi ni?
19 Awe jë la mani nyine kuiën.” Angatr a hamëne pi koi nyidrë la ca drenari.*
20 Nge Iesu a hnyinge jë koi angatre me hape: “Iqëmeke i drei la? Nge ëje i drei la?”
21 Öni angatr: “Kaisara.” Matre öni Iesu jë hi: “Haawe, nga hamëne pi koi Kaisara la ewekë i Kaisara, nge koi Akötresie la ewekë i Akötresie.”
22 Ame hë la angatr a drenge lai, angatr a hai, me nue nyidrë, me tro.
23 Thupene jë hi, traqa pi hi la itre Sadukaio, lo itre ka tha mejiune kowe la mele hmaca, troa pane hnyinge koi Iesu ka hape:
24 “Atre Ini fe, öni Mose: ‘Maine tro la ketre trahmanyi a mec nge pëkö nekö i angeic, tro la trejin me angeic a xome la föi angeic, me nyi matrane lai ka mec.’
25 Haawe, the huni la sevene lao trejin. Hna faipoipo la haetra, ngo meci pi hi angeic nge pëkö kuku, matre hna xome pë hë la föi angeic hnene la jini angeic.
26 Nge hna traqa tune mina fe kowe la hnaaluen me hnaakönin, uti fe hë kowe la hnaasevenen.
27 Nge thupe i angatr asë, ketre meci ju hi lai föe.
28 Matre, ame hë ngöne la mele hmaca, tro eahlo a föi drei? Ke hnei angatr asë hi hna faipoipo me eahlo.”
29 Sa jë hi Iesu ka hape: “Ka tria hnyawa nyipunie, ke thatre kö nyipunie la hna qaja ngöne la Itre Hna Cinyihan, nge ketre, thatre kö nyipunie la aqane huliwa ne la mene i Akötresie.
30 Ke ame ngöne la ijine mele hmaca, pëkö trahmanyi ka troa faipoipo, nge pëkö ihamë föeë, ke tro hë angatr a ceitu me itre angela e hnengödrai.
31 Nge ame göne la mele hmaca, tha hane kö nyipunieti e lo hna qaja hnei Akötresie, ka hape:
32 ‘Eni la Akötresi Aberahama, me Akötresi Isaaka, me Akötresi Iakobo’? Haawe, tha nyidrëti kö la Akötresi ne la itre ka mec, ngo itre ka mele pe.”
33 Drenge ju hi lai hnene la ka ala nyim, ame hnei angatre hna haine la aqane hamë ini i nyidrë.
34 Ngo ame la kola dreng hnene la itre Faresaio laka, hna lepe ahumune la itre Sadukaio hnei Iesu, angatre hi lai a ce uti ju koi nyidrë.
35 Nge hnene la ketre e angatr, atre inine la wathebo, hna thele troa tupathi Iesu me hnyinge ka hape:
36 “Atre Ini fe, nemene la wathebo ka tru ne la trenge wathebo?”
37 Öni nyidrëti jë hi: “ ‘Qa i eö troa hnimi Iehova* Akötresi eö hnene la hni eö ka pexej, me mele* i eö ka pexej, me mekuna i eö ka pexej.’
38 Celë hi wathebo ka tru nge ka sisitria.
39 Ame la hnaaluen, tre ka ceitu hi: ‘Qa i eö troa hnime la atre lapa easenyi eö, tui eö hi.’
40 Nge lue eje lai a nyi trepene la nöjei wathebo me itre perofeta.”
41 Itre faresaio petre kö e cili, ame hnei Iesu hna hnyinge koi angatr ka hape:
42 “Nemene la mekuna i nyipunie göi Keriso? Nekö i drei nyidrë?” Sa jë hi angatre ka hape: “Dravita.”
43 Öni Iesu jë hi: “Nga hnauëne kö laka, hnene la ua, matre Dravita a hë Keriso ka hape Joxu, lo öni angeic:
44 ‘Iehova* a qaja kowe la Joxung: “Lapa ju ngöne la götrane macang, uti hë la tro ni a amë la itre ithupëjia me hmunë fene la lue ca i hmunë” ’?
45 Haawe, maine Dravita a hë nyidrë, ka hape Joxu, nga tro nyidrëti a nekö i Dravita tune kaa?”
46 Pëkö atr e cili ka atreine sa koi nyidrë, matre qaane ju hi la drai cili, pë ju hë ka hane pi hnyinge koi nyidrë.
Itre mekun ecahu fen
^ Maine, “nekö trahmany.”
^ Maine, “ka giris, ka uthautha.”
^ Maine, “ka tha en.”
^ Maine, “saath aqeany.”
^ Wange ju la HQP.
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Wange ju la HQP.
