Mataio 23:1-39
23 Thupene lai, Iesu a qaja jë kowe la itretre dreng me kowe la ka ala nyimu ka hape:
2 “Hnene la itretre cinyihan me itre Faresaio hna xome la göhnë i Mose.
3 Nge ame la itre ewekë hnei angatr hna qaja koi nyipunie, trongëne jë, ngo the xome kö la thiina i angatr, ke ka atreine angatre qaja, ngo tha ka kuca pe.
4 Ketre, angatr a sili ehnefe ka tru, me nyi ehnefe ne la itre atr, ngo xele pe ma enijëne la neköi he ne wanakoime i angatr.
5 Nge ame la nöjei huliwa hnei angatre hna kuca, tre angatr a kuca nyine pi mama. Ke angatr a aisaisan la itre neköi trengene* ka qatrenge la itre hna Cinyihan. Nge angatre fe a aqeane la itre pune iheetre i angatr.
6 Aja i angatr troa lapane la itre mekene ta* ngöne la kola ce xeni hej, me itre pane göhnë ngöne la itre sunago.
7 Ketre, aja i angatr, tro la itre atr a ibozu me metrötrë angatr ngöne la itre hna maketr, me hë angatr ka hape, Rabi.*
8 Ngo the tro pi kö a hane hë nyipunie ka hape, Rabi, ke casi hi la atre ini nyipunie, nge itre trejin asë pë hë nyipunie.
9 Nge the tro kö a hëne la ketre atr e celë fen ka hape, kaka, ke casi hi la Keme i nyipunie e hnengödrai.
10 Ketre, the tro kö a hane hë nyipunie ka hape, itretre weje meken, ke casi hi la atre Weje Meken, a Keriso.
11 Ngo ame la ka tru e nyipunie, tre tro angeice a huliwa koi nyipunie.
12 Ke ame la atre sipu selë angeice kö, tro ha thaipiën, ngo ame la atre ipië, tro ha adraiën.
13 “Ekölö hi ni nyipunie itretre thoi! Nyipunie itre Faresaio me itretre cinyihan, ke nyipunie a thingi jëne la itre atr troa lö kowe la Baselaia ne hnengödrai, me sawa la itre ka ajane troa lö. Nge goi tha lö kö nyipunie.
14 ——
15 “Ekölö hi ni nyipunie angetre thoi! Nyipunie itre Faresaio me itretre cinyihan, ke nyipunie a kanothe la itre hnagejë me itre nöj troa thele itre xa sine hmi* koi nyipunie. Nge e öhne hë nyipunie, nyipunieti a fe gojenyi angeic kowe la Gena,* ke tru catre hë la zö i angeic hui nyipunie.
16 “Ekölö hi ni nyipunie itre timek ka amamai gojeny, ke öni nyipunie, ‘Maine tro ketre atr a sisinyi göne la uma ne hmi, tre ka pë pengöne lai, ngo e sisinyi hë göne la gool ne la uma ne hmi, nyipiewekë troa metrötrëne la hna sisiny.’
17 Ume hmo me timek! Nemene la ka sisitria, gool maine uma ne hmi ka ahmitrötrëne la gool?
18 Nge ketre tun, öni nyipunie, ‘Maine tro la ketre atr a sisinyi göne la ita ne huuj, tre ka pë pengöne lai, ngo e sisinyi hë göne la hna huujën, nyipiewekë troa metrötrëne la hna sisiny.’
19 Itre timek! Nemene la ka sisitria, huuj maine ita ne huuj ka ahmitrötrëne la huuj?
20 Nge ame la atre sisinyi göne la ita ne huuj, angeice hi lai a sisinyi göne la nöjei ewekë e hun.
21 Nge ame la atre sisinyi göne la uma ne hmi, angeice a sisinyi göne ej me göne la Atre lapan ej.
22 Nge ame la atre sisinyi göne la hnengödrai, angeic a sisinyi göne la therone i Akötresie, me göne la Atre lapan ej.
23 “Hnëjine hë nyipunie itre Faresaio me itretre cinyihan, angetre thoi! Ke nyipunieti a hamëne la hnaatrenene* la minet, me aneto, me komina,* ngo tha nyipiewekëne kö nyipunie la itre götrane ka tru ne la wathebo, ene la meköt, me utipin, me inyipicikeu. Ka nyipiewekë troa hamëne la hnaatrenene la itre ewekë cili, ngo tha tro kö a patre la ketre ewekë ka sisitria ne la wathebo.
24 Itre timek ka amamai gojeny, nyipunie a use trije la tresitr qa ngöne la trepe ime i nyipunie, ngo ulume pe la kamela.
25 “Hnëjine hë nyipunie itre Faresaio me itretre cinyihan, itretre thoi! Ke nyipunieti a wasine la tröne kap me pala, ngo tiqa lue ej hnei pi hetrenyi me aja hna thatreine xome hnöth.
26 Itre Faresaio ka timek, pane wasine pi la hnin ne la kap me pala, matre porope jë fe la trön.
27 “Hnëjine hë nyipunie itre Faresaio me itretre cinyihan, itretre thoi! Ke ceitu i nyipunie me itre hua hna awiën, ka mingöming la itrön, ngo e hnin, ka tiqa pe hnei june wezipo, me nöjei ewekë hna sisin.
28 Ketre tui nyipunie, kola nyi ka meköti qëmeke i atr, ngo tiqa pe la hni hnei thoi, me ewekë ka tha meköti kö.
29 “Hnëjine hë nyipunie itre Faresaio me itretre cinyihan, itretre thoi! Ke nyipunie a xupe la hua ne la itre perofeta, me thaipine la hua ne la itretre mele nyipici.
30 Nge öni nyipunie, ‘Maine hne huni ju hna mel ngöne lo hneijine ne lo itre qaaqaa hun, tha tro pi kö huni a ce xöle me angatr troa anenine la madra ne la itre perofeta.’
31 Ngo nyipunieti hi lai a sipu anyipicine laka, nyipunie la matrane lo itre ka humuthe lo itre perofeta.
32 Haawe, umuthe pi hë la huliwa hna nyiqaane hnene la itre qaaqaa i nyipunie.
33 “Itre un, matra ne vaipa, tro nyipunieti a kötrene tune kaa la hnëjine ne la Gena?*
34 Celë hi matre hnenge hna upe koi nyipunie la itre perofeta, me itre ka inamacan, me itretre hamë ini. Ngo hnei nyipunieti pe hna humuth me jei faonyi itre xan, me wameucë itre xan ngöne la itre sunago i nyipunie, me axösisi itre xan ngöne la ketre traon me ketre traon.
35 Matre tro ha atë hui nyipunie la madra ne la itre ka mele nyipici asë, qaane lo madra i Abela, atre hna jele mekötin, uti hë la madra i Zakaria nekö i Barakaia lo hnei nyipunieti hna humuth nyipine la uma ne hmi me ita ne huuj.
36 Nyipici, eni a qaja hnyawa koi nyipunie, troa traqa asë lai kowe la xötre atr celë.
37 “Ierusalema, Ierusalema fe, atre humuthe lo itre perofeta, me trane lo itre hna upe koi eö! Anyimua thele ni troa icasinekeune la itre nekö i eö, tune la ithine ne gutu a hajuhajum la ha nekön fene la lue hna iape ne ej, ngo xele kö nyipunie.
38 Hanawang! Ase hë nuetrije* la uma i nyipunie.
39 Ke eni a qaja hnyawa koi nyipunie laka, tha tro hmaca kö nyipunieti a öhnyi ni uti hë la tro nyipunie a qaja ka hape: ‘Manathithi la atre traqa ngöne la ëje i Iehova!’ ”*
Itre mekun ecahu fen
^ Hna xome lai, hnene la itre trahmanyi ne Iudra nyine wene drösinöe ne ithupë.
^ Maine, “göhnë ka tru.”
^ Maine, “atre ini.”
^ Maine, “ka troa lö kowe la hmi angetre Iudra.”
^ Wange ju la HQP.
^ Wange ju la HQP.
^ Ame la minet, me aneto, me komina, tre, itre nekö i feja hna xom hnene la itre atr nyine apuiloinyi xen.
^ Wange ju la HQP.
^ Maine jë, “tro ha thëtrij.”
^ Wange ju la HQP.
