Mataio 24:1-51
24 Ame la Iesu a tro pi qa ngöne la uma ne hmi, hnene la itretre dreng hna tro koi nyidrë troa pane amamai nyidrë la uma ne hmi.*
2 Öni Iesu jë hi koi angatre ka hape: “Öhne hi nyipunie la nöjei ewekë celë? Eni hi la a qaja hnyawa koi nyipunie ka hape, tha tro kö a të e celë la ketre etë hune la ketre etë, ke tro ha thëtrij asë.”
3 Ame hë la angatr a lapa hune la Wetr Elaio,* hnene la itretre dreng hna ithanata aconyi me Iesu, me hape: “Pane qaja jë koi huni ka hape, eu la troa traqa la itre ewekë cili, nge nemene fe la hatrene laka, celë hë* nyipë, memine la hatrene la pune la fene celë?”*
4 Iesu a sa jë koi angatre ka hape: “Wange pala kö, wanga amenu nyipunieti jë,
5 ke nyimutre la itre ka troa traqa ngöne la ëjeng, me hape, ‘Eni hi la Keriso,’ nge tro hë angatre lai a amenune la ka ala nyim.
6 Nge tro hë nyipunieti a dreng la itre isi, me itre mejene isi, ngo the xou kö, ke tro kö a traqa la itre ewekë cili. Ame pe, tha pune pala kö lai.
7 “Ke tro ha isi la ketre nöj me ketre nöj, me ketre baselaia me ketre baselaia, nge troa hetre jiin me itre sa ngöne ketre götran me ketre götran.
8 Ame la nöjei ewekë cili, tre qaane la itre akötr.
9 Ketre, tro ha xomi nyipunie kowe la iaxösisi me humuthi nyipunie, nge tro la nöjei nöj a methinë nyipunie pine la ëjeng.
10 Nge ala nyimu fe la itre ka troa kei, nge tro angatr a imelethoikeu, me itö imethinë,
11 nge troa xulu la itre perofeta thoi me ajeane la ka ala nyim.
12 Nge pine laka, kola elë catre la iangazo, troa nanazije la ihnimi ne la ka ala nyim.
13 Ngo ame la atre cile huti* uti hë la pun, tro hë angeic a mel.
14 Nge tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.
15 “Haawe, e öhne jë nyipunie la ewekë ka sis ka xulu fë hnëjin a kola cil ngöne la gaa hmitrötr, tune lo hna qaja hnei Daniela perofeta, (trotrohnine ju hnei atre e),
16 tro la itre ka lapa e Iudra a kötre kowe la itre wetr,
17 nge tha tro kö la atr ka cil hune uma a uti me lö, matre xome la itre ewekë i angeic ka lolo.
18 Nge the tro kö la atre ngöne la hlapa a bëeke troa xome la iheetre ka qea i angeic.
19 Ekölö hi ni la itre ka upune, me itre ka iji thi nekönatr ngöne la ijine cili!
20 The mano kö thith, matre tha tro kö lai a traqa ngöne la ijine hnötr, maine ngöne la drai Sabath.
21 Thupene lai, troa traqa la akötr atraqatr, ewekë ka tha hane kö traqa qaane lo Akötresie a nyiqaane xupe la fene hnengödrai uti hë enehila, nge tha tro hmaca kö a hane tun.
22 Nge maine tha ahopatrene kö la itre drai cili, pëkö atr ka troa mele pe, ngo tro ha ahopatrene la itre drai cili pine la itre hna iën.
23 “Maine tro la ketre atr a qaja koi nyipunie ka hape, ‘Hanawange, Keriso e celë’ maine, ‘E cili pena,’ the kapa kö nyipunie!
24 Ke tro ha mejë la itre Keriso thoi me itre perofeta thoi, itre ka thele troa amenune la itre atr me itre hna iën, jëne la itre iamamanyikeu ka tru me itre hatren nyine hain.
25 Haawe, eni hi lai a canga hmekë nyipunie.
26 Nge maine tro la itre atr a qaja ka hape, ‘Hanawang, angeice ngöne la hnapapa,’ the tro kö! Maine ‘Hanawang, angeic e hnine la hnahage ka co,’ the mejiune kö!
27 Ke ceitune la ijine celë hë* la Nekö i Atr memine la kola samek e koië me hudrume kuë.
28 Nge ame la gaa hetre ngönetrei ka mec, tre celë fe hi hna itronyi hnei itre aeto.*
29 “Nge thupene ju hi la itre akötre ne la ijine cili, tro ha miti la jö, nge tha tro kö a hudrume la treu, nge tro ha mala la itre wëtresij qa hnengödrai, nge tro ha jumejume la itre ewekë ka men e hnengödrai.
30 Ame hna troa mama e hnengödrai la itre hatren ne la Nekö i Atr, nge tro la nöjei tribu e cailo fen a xexe imano hnei hleuhleu. Tro hë angatre lai a öhne la Nekö i Atr a traqa hune la itre iaw ne hnengödrai, cememine la men me lolo atraqatr.
31 Nge tro hë angeic a upe la itre angela i angeic hnene la trutru hna uf, nge tro hë angatr a acasine la itre hnei angeice hna iën, qa ngöne la foa lao götran ne la fen, me qa ngöne la ketre cane la fene hnengödrai, uti hë la ketre cane la fen.
32 “Haawe, pane xomi ini jë qa ngöne la ceitun ne la iwacua: Ame hë la kola sajem,* atre hë nyipunie laka, easenyi hë la ijine hedredrei.
33 Ketre tune mina fe, ame hë la nyipunieti a öhne la itre ewekë cili, lapa atre ju ka hape, easenyi hë angeic, nge angeice hë e celë qe ne qëhnelö.
34 Nge eni a qaja hnyawa koi nyipunie laka, tha tro kö a patre la xötre celë, nge tha pane traqa kö la itre ewekë cili.
35 Nge maine troa patre la hnengödrai memine la fen, ngo tha tro kö a gufa la itre trengewekëng.
36 “Ngo ame göi drai me hawa, pëkö ka atre, thatre kö la itre angela ne hnengödrai, nge goi thatre fe la Nekön, ngo Keme hmekuje hi.
37 Ame la ijine celë hë* la Nekö i Atr, tro ha tune la hneijine i Noa.
38 Ke ngöne lo ijine patre pala kö la Iwë, itre atr a xeni me ij, nge kola faipoipo la itre trahmany, me ihamë föeë, uti hë la drai ne Noa a lö hnine la aka,
39 nge tha semesinene* kö angatr, uti hë traqa la Iwë me apatrenyi angatr asë. Haawe, tro fe a hane tune lai ngöne la ijine celë hë la Nekö i Atr.
40 E cili, tro la lue trahmanyi a tro ngöne la hlapa, nge troa xomi ketre, me nue pë hë la ketre.
41 Nge tro la lue föe a amudromudro qitr, nge troa xomi ketre me nue pë hë la ketre.
42 Qa ngöne lai, hmeke jë, ke thatre kö nyipunie la drai ne traqa la Joxu i nyipunie.
43 “Ngo trotrohnine jë nyipunie ka hape: Maine tro la trene hnalapa a atre la hawa e jidr ne traqa la atrekënö, tro angeice lai a hmek, nge tha tro kö angeic a nue la atrekënö troa lö hnine la uma i angeic.
44 Qa ngöne lai, loi e ka hnëkë fe nyipunie, ke tro ha traqa la Nekö i Atr ngöne la drai me hawa hnei nyipunieti hna tha mekune kö.
45 “Drei la hlue ka nyipici me ka inamacan, lo hna acil hnene la maseta hune la itre atrene la hnalapa, matre troa hamë xeni ngöne la nyipi ijin?
46 Manathithi la hlue cili e traqa la maseta a öhnyi angeic e kuca lai!
47 Nyipici, eni a qaja hnyawa koi nyipunie laka, tro hë nyidrëti a acili angeic hune la nöjei ewekë i nyidrë asë.
48 “Ngo maine ka ngazo la hlue cili, tro hë angeic a mekun e kuhu hni angeic ka hape: ‘Hmitre pala kö la masetang.’
49 Matre angeic a nyiqaane lepe la itre xa hlu, me xeni me iji memine la itre ka pune hmo hnei ka haitr.
50 Nge tro la maseta ne la hlu cili a traqa ngöne la drai hnei angeic hna thatre, me hawa hna tha mekune kö.
51 Nge tro ha catre la aqane nyithupene maseta la ngazo i angeic, me ce ami angeic memine la itretre thoi. Nge e cili, tro angeic a treije me latresi.
Itre mekun ecahu fen
^ Maine, “uma i Akötresie.”
^ Maine, “Oliv.”
^ Ame la hna hape, ‘celë hë nyipë,’ kola ujëne la qene Geres ne la hnaewekë hna hape, pa·rou·siʹa . Wange ju la HQP.
^ Maine, “hneijin.” Wange ju la HQP.
^ Maine, “xomihni.”
^ Wange ju la HQP.
^ Kola tune la huzu nge ma ka nango tru kö.
^ Maine, “xöle hmaca la itre drön.”
^ Wange ju la HQP.
^ Maine, “tha nyipiewekëne kö.”
