Mataio 25:1-46
25 “Nge ceitune la Baselaia ne hnengödrai memine la treene lao nekö jajinyi* ka isa tro fë laame cile troa itronyi memine la atre faipoipo.
2 Thei angatr la faifi lao hmo, nge faifi lao ka inamacan.
3 Hnene la itre ka hmo, hna xome trongë laam, ngo tha hna xomi oele kö.
4 Ngo hnene la itre ka inamacan, hna xomi laame me oele ne trem.
5 Hmitre pala ha la atre faipoipo, ame hnei angatr asë hna imeköleny.
6 Ngo e hnenyipa jidri hë, sue jë hi la ketre me hape: ‘Hane hë la atre faipoipo! Tro jë a ixelë me nyidrë.’
7 Ame hnene lo treene lao jajinyi hna mejë, me hnëkëne la itre laame i angatr.
8 Nge sipo jë hi hnei itre hmo koi itre ka inamacane ka hape: ‘Sipo oel, ke easenyi hë troa pi la itre laame hun.’
9 Sa jë hi la itre ka inamacane ka hape: ‘Waea, ke wanga tha ijije pi koi hun me koi epun, ngo tro jë pe kowe la itre ka salem, matre hetrenyi jë fe epun.’
10 Ngo ame ju hi la angatr a tro troa itö, traqa pi hi la atre faipoipo, matre ame lo itre jajinyi ka hnëkë hë, hnei angatr hna ce lö memine la atre faipoipo kowe la hnë nyikein, ame hna thinge ju la qëhnelö.
11 Thupene lai, traqa pi hi lo itre xa jajiny, me hape: ‘Joxu, Joxu, thawa pi koi hun!’
12 Sa jë hi nyidrëti ka hape: ‘Nyipici, eni a qaja koi nyipunie, thatre nyipunieti kö ni.’
13 “Haawe, hmeke jë nyipunie, ke thatre kö nyipunieti la drai me hawa.
14 “Ceitune fe la Baselaia ne hnengödrai memine la ketre trahmanyi ka tro koi gaa nany. Qëmekene troa tro, hnei nyidrëti hna pane ahnithe kowe la itre hlue i nyidrë la itre ewekë i nyidrë.
15 Haawe, nyidrëti a hamëne pi kowe la ketre la faifi lao talan,* nge koi ketre luetre, nge casi koi ketre. Matre nyidrëti a isa thawa pi koi angatr thenge la hna isa atrein, me tro.
16 Hnene lo hlue ka kapa la faifi lao talan hna canga huliwan, ame hna kapa hmaca kö la faifi lao xan.
17 Nge hna tune mina fe hnene la ka kapa lo lue talan, hnei angeic hna kapa hmaca kö la lue xan.
18 Ngo ame pë hë lo ka kapa la ca talan, hnei angeic hna sine la dro, me keleme la manie* i maseta.
19 “Qea pi hë la hna paatre la maseta, ngo ame hë la nyidrëti a bëeke hmaca, nyidrëti a hnyingëne jë lo manie i nyidrë.
20 Matre hnene lo ka kapa la faifi lao talan hna tro fë koi nyidrë la faifi lao xan, me hape: ‘Maseta, hnei nyipëti lo hna ahnithe koi ni la faifi lao talan, nge goeën, hnenge hna nyi xan hnei faifi hmaca kö.’
21 Önine jë hi la maseta: ‘Ka lolo catr, hlue ka loi me ka nyipici! Hnei eö hna nyipici kowe la ewekënge celë, haawe, tro ni a acili eö hune la itre ewekëng ka tru catre hmaca kö. Ce madrine jë memine la maseta i eö.’
22 Thupene lai, hnene lo ka kapa lo lue talan hna tro fe koi nyidrë, me hape: ‘Hnei nyipëti lo hna ahnithe koi ni la lue talan, nge goeën, hnenge hna nyi xan hnei lue xane hmaca kö.’
23 Önine hmaca jë la maseta: ‘Ka lolo catr, hlue ka loi me ka nyipici! Hnei eö hna nyipici kowe la ewekënge celë, haawe, tro ni a acili eö hune la itre ewekëng ka tru catre hmaca kö. Ce madrine jë memine la maseta i eö.’
24 “Hnene pë hë lo hlue ka kapa la ca talan hna tro kowe la maseta, me hape: ‘Atre hi ni laka, atre kö nyipëti la hnei nyipëti hna ajan, nge nyipëti a menuëne la itre götrane tha hnei nyipëti kö hna tran, me hleme la qitr hna jum hnei itre xan.
25 Matre, hnenge hna xou, ame hnenge hna keleme la talane i nyipë. Ngo hane kö la ewekë i nyipë.’
26 Sa jë hi la maseta ka hape: ‘Hlue ka ngazo me ka geny, atre hnyawa hi eö lo ka hape, eni a menuëne la itre götrane tha hnenge kö hna tran, me hleme la qitr hna jum hnei itre xan,
27 ngo maine ju, tro hi eö a amë la manieng ngöne baak, matre e traqa ha ni, tro ni a kapa la manieng hna nyi nekön.’*
28 “Önine jë hi la maseta kowe la itre hlue i nyidrë ka hape: ‘Xome pi la talan qaathei angeic, me hamën kowe lo ka kapa la treene lao talan.
29 Ke ame la ka trene ewekë, tro hmaca kö a nyixan, matre mana catr angeic. Ngo ame la atre pë ewekë, tro fe a xome qaathei angeic lai hnepe hnei angeic hna hetreny.
30 Haawe, kuiëne pi lai hlue ka geny ngöne la gaa jidr e kuhu trön, nge e cili, tro angeic a treije me latresi.’
31 “Nge e traqa ha la Nekö i Atr ngöne la lolo i angeic cememine la itre angela, tro hë angeic a lapa hune la therone ka lolo i angeic.
32 Nge tro ha acasine la nöjei nöj qëmeke i angeic, nge tro angeic a thawa luë angatr, tune la atre thup a isa thawa la itre mamoe me nani.
33 Tro angeic a amë la itre mamoe ngöne la götrane maca i angeic, me itre nani, ngöne la götrane mi.
34 “Nge tro hë la Joxu a qaja kowe la itre ka cil ngöne la götrane maca ka hape: ‘Jë fe nyipunie, itre hna amanathithin hnei Kaka. Nge kapa ju la Baselaia hna hnëkëne thatraqai nyipunie, qa ngöne lo kola xupe la atr.
35 Ke hnenge hna mecijiin, nge hnei nyipunieti hna ithue ang, nge hnenge hna pi ij, nge hnei nyipunieti hna ithue imeng. Nge hnenge hna lapa trenyiwa, nge hnei nyipunieti hna kepe ni,
36 me tro xöe,* nge hnei nyipunieti hna heetrë ni. Hnenge fe hna wezipo, nge hnei nyipunieti hna hnimi ni, nge hna akalabusi ni nge hnei nyipunieti hna wai ni.’
37 E cili, tro ha hnying hnei itre ka meköt me hape: ‘Joxu, eu la eahuni a öhnyi nyipëti e mecijiin me ithue a i nyipë, nge eu la nyipëti a pi ij nge hne huni hna ithue ime i nyipë?
38 Nge eu la nyipëti a trenyiwa nge hne huni hna kepe nyipë, me tro xöe nge hne huni hna heetrë nyipë?
39 Nge eue fe la nyipëti a wezipo nge hne huni hna hnimi nyipë, me akalabusi nyipë nge hne huni hna wai nyipë?’
40 Matre, tro la Joxu a sa koi angatre ka hape: ‘Nyipici, eni a qaja hnyawa koi nyipunie laka, ame lo nyipunieti a kuca lai kowe la ka co ne la itre trejine me eni, nyipunieti hi lai a kuca koi ni.’
41 “Thupene lai, tro la Joxu a qaja kowe la itre ka cil ngöne la götrane mi ka hape: ‘Tro pi nyipunie, itre hna ejin, kowe la eë ka tha pi kö hna hnëkëne thatraqai Diabolo me itre angela i angeic.
42 Ke hnenge hna mecijiin, ngo tha hnei nyipunieti kö hna ithue ang, nge hnenge hna pi ij, ngo tha hnei nyipunieti kö hna ithue imeng.
43 Nge hnenge hna lapa trenyiwa, nge tha hnei nyipunieti kö hna kepe ni, me tro xöe, nge tha hnei nyipunieti kö hna heetrë ni. Hnenge fe hna wezipo nge hna akalabusi ni, ngo tha hnei nyipunieti kö hna wai ni.’
44 E cili, tro fe angatr a hnying ka hape: ‘Joxu, eu la eahuni a öhnyi nyipëti e mecijiin me pi ij, me trenyiwa, me tro xöe, me wezipo nge hna akalabusin, nge tha hne huni kö hna xatua nyipë?’
45 Matre, tro la Joxu a sa koi angatre ka hape: ‘Nyipici, eni a qaja hnyawa koi nyipunie laka, ame lo nyipunieti a tha kuca lai kowe la ka co ne la itre trejine me eni, ketre nyipunieti fe lai a tha kuca koi ni.’
46 Haawe, tro hë angatre lai a tro kowe la meci ka epine palua, nge itre ka meköt kowe la mele ka pë pun.
Itre mekun ecahu fen
^ Ame la qene Geres ne la jajiny, tre itre ka tha ce meköl petre kö me trahmany.
^ Wange ju la HQP.
^ Ger., “sileva.”
^ Maine, “nyixan.”
^ Maine, “pë iut.”
