Mataio 26:1-75
-
Itretre huuj a thele troa humuthi Iesu (1-5)
-
Oel ka pui lolo hna nenge hui Iesu (6-13)
-
Paseka tixenuë me isalemë (14-25)
-
Xötrei acile la Xeni Heji Ne La Joxu (26-30)
-
Canga qaja koi Peteru ka hape, tro angeic a hmahmae Iesu (31-35)
-
Iesu a thith e Gethesemane (36-46)
-
Kola xolouthi Iesu (47-56)
-
Ikootrë qëmekene la Hnakootr Ka Tru i Angetre Iudra (57-68)
-
Peteru a thoi ka hape, thatre Iesu kö angeic (69-75)
26 Thupene la Iesu a ase qaja lai koi angatr, öni nyidrëti jë hi kowe la itretre dreng ka hape:
2 “Atre hi nyipunie laka, lue drai pe hi matre feetëne jë la Paseka, nge tro ha nue la Nekö i Atr me jei faonyi angeic hune la sinöe ne iaxösisi.”
3 Hnene la itre tane i angetre huuj me itre qatre ne la nöj, hna ce icasikeu ngöne la götrane gaa pë ihakun* hnine la hnalapa i Kaiafa, atre huuje ka sisitria.
4 E cili, ce ithanatane jë hi angatr troa traa thethi Iesu, matre xolouth me humuthi nyidrë.
5 Matre öni angatr: “Tha tro kö a kuca lai ngöne la ijine feet, ke wanga hetre icilekeu jë nyipine la ka ala nyim.”
6 Iesu e Bethania ngöne hnalapa i Simona, lo ka lepera,
7 nge nyidrëti a xeni,* ame hna traqa pi la ketre föe memine la neköi butei oel ka pui lolo, nge ka tru thupene catr. Eahlo a easenyi nyidrëti jë, me nei oel kowe la he i nyidrë.
8 Öhne jë hi lai hnene la itretre dreng, ene pe, tha madrine ju hi angatr. Öni angatr: “A kola aluzine fë nemene la oel?
9 Maine ju, troa hën atrune la thupene oel me salemën, matre thue maniene la itre ka pë ewekë.”
10 Atre ju hi Iesu la hna qaja, öni nyidrëti jë hi koi angatr ka hape: “Nyipunieti a ajolë eahlo fë nemen? Ka lolo hi la hna kuca hnei eahlo koi ni.
11 Ke ce nyipunieti pala hi me itre ka pë ewekë, ngo ame ni, ka tha tro kö ni a lapa palua me nyipunie.
12 Nge ame la eahlo a köle la ngönetreing hnei oel ka pui loi, eahlo hi lai a hnëkën troa kelemi ni.
13 Matre eni la a qaja hnyawa koi nyipunie laka, ame asë hi la itre götran ne la fen hna troa cainöjëne la maca ka loi, tro fe a hane qaja la hnei eahlo hna kuca nyine amekunën.”
14 Ame hna tro pi hnene la ketre ne lo ala Truelof, hna hëne ka hape, Iudra Isakariota, kowe la itre tane i angetre huuj.
15 Öni angeic: “Nemene la hnei nyipunieti hna troa hamë ni e tro ni a nue Iesu koi nyipunie?” Axeciëne jë hi angatr troa hamë angeice la 30 lao mani sileva.
16 Matre qaane ju hi lai, angeic a thele ijin troa nue Iesu koi angatr.
17 Ame ngöne la pane drai ne la itre Falawa Ka Pë Levenen, hnene la itretre dreng hna hnyingë Iesu ka hape: “Nyipëti a ajane tro huni a hnëkëne ekaa matre tro nyipëti a xeni la Paseka?”
18 Öni Iesu: “Tro jë thene la ketre atr ngöne la traon, nge hape ju: ‘Önine la Atre Ini: “Easenyi hë la hawang; tro ni a pane feetëne la Paseka memine la itretre drei ni ngöne la hnalapa i eö.” ’ ”
19 Hnene la itretre dreng hna trongëne hnyawa la hnei Iesu hna amekötine koi angatr, me hnëkëne la Paseka.
20 Matre e jidri hë, hnei Iesu memine la 12 lao atre dreng hna lapa xötrë,
21 nge ame hë la angatr a ce elë troa xen, öni nyidrë: “Nyipici, eni a qaja hnyawa koi nyipunie laka, tro la ketre e nyipunie a salemë* ni.”
22 Qa ngöne lai, hna akötrëne la itre hni angatr, nge angatr a isa hnyinge koi nyidrë me hape: “Joxu tha eni kö, eje hi?”
23 Sa jë hi Iesu ka hape: “Ame la atre ce li im me eni hnine la kape celë, angeice hi la ka troa salemë* ni.
24 Nyipici kola ha tro la Nekö i Atr, tune lo hna cinyihane göi angeic. Ngo ekölö hi ni lai atre salemëne* la Nekö i Atr! Loi ju kö ekö e tha hna hnahone la atre cili.”
25 Öni Iudra, lo ka troa salemë* nyidrë ka hape: “Tha eni kö, eje hi Rabi?”* Sa jë hi Iesu ka hape: “Eö kö la ka qaja.”
26 Angatr pala kö a xeni, nge Iesu a xome pi la ketre falawa, nge ase jë hi nyidrëti thith, nyidrë a thupathupa pi, me hamëne ju kowe la itretre dreng, me hape: “Xome jë, xeni jë, ke celë hi hatrene la ngönetreing.”
27 Nge nyidrëti a xome pi la ketre neköi ver me thith, me hamën kowe la itretre dreng, nge öni nyidrë: “Iji jë nyipunieti asë,
28 ke celë hi ‘madra ne isisinyikeu,’ madrang hna neng thatraqane la ka ala nyim, nyine köletrije la itre ngazo.
29 Nge eni hi la a qaja koi nyipunie, tha tro hmaca kö ni a iji la waina celë, uti hë la tro ni a ce iji hmaca me nyipunie ngöne la Baselaia i Kaka.”
30 Haawe, ase jë hi angatr nyima,* angatr a elë jë kowe la Wetr Elaio.*
31 Iesu a qaja jë koi angatre ka hape: “Pine la ewekë ka troa traqa koi ni, tro asë hi nyipunieti a kei ngöne la heji celë, ke ase hë cinyihane ka hape, ‘Tro ni a lepe la atre thup, nge tro ha isa ije la hnënge mamoe.’
32 Ngo e mele hmaca ha ni, tro ni a tro pa hui nyipunie Galilaia eë.”
33 Ngo canga öni Peteru jë hi ka hape: “Maine tro asë hi angatre la a nuetriji* nyipë, ngo tha tro kö ni a hane nuetriji nyipë!”
34 Öni Iesu jë hi: “Nyipici, eni a qaja hnyawa koi eö, ngöne la jidri celë qëmekene troa kukahleke la trotro, tro eö a akönia qaja ka hape, thatre ni kö hnei eö.”
35 Ngo öni Peteru hmaca jë hi: “Maine tro ju hë ni a ce meci me nyipë, ngo tha tro jë pi kö ni a qaja tune lai göi nyipë.” Qaja jë hi tune lai hnene la itre xa atre dreng.
36 Thupene lai, Iesu a ce traqa pi me angatr ngöne la götrane hna hape, Gethesemane. Öni nyidrëti jë hi kowe la itretre dreng: “Lapa ju e celë, ke tro ni a pane tro troa thith.”
37 Nge nyidrëti a tro pi me Peteru me lue nekö i Zebedaio, ame hnei nyidrëti hna hnehengazo me xou.
38 Matre öni nyidrëti jë hi koi angatre ka hape: “Hace catre la hning, nge kösë eni* ha troa mec. Pane lapa ju nyipunieti e ce, nge catre jë hmeke me eni.”
39 Nge nyidrëti a pane ananyi angatre ju, me sa iwatingöne ca me thithi me hape: “Kakati fe, maine loi hi, epi ananyine pi qaathenge la vere celë. Ngo tha thenge kö la ajang, ngo aja i nyipëti pe.”
40 Nyidrëti a bëeke hmaca jë kowe la itretre dreng me öhnyi angatr e meköl, matre öni nyidrëti jë koi Peteru: “Thatreine kö nyipunie troa pane ce hlë me eni koi ca hawa hi?”
41 Hmeke jë nyipunie, nge catre jë thith, matre tha tro kö a hane tupathi nyipunie, ke canga ajane hi la hni, ngo kucakuca pe la ngönetrei.
42 Nyidrëti a alua tro hmaca pi troa thithi me hape: “Kakati fe, maine tha ijije kö troa ananyine qaathenge la vere celë matre tha tro kö ni a ij, ngo loi e eatre la aja i nyipë.”
43 Nge traqa hmaca pi nyidrë a öhnyi angatr a meköl, ke pi meköle catre angatr.
44 Nyidrëti a nue angatre hmaca jë me nyi hnaakönine thith, nge casi pala hi la sipo i nyidrë.
45 Thupene lai, nyidrëti a tro hmaca pi kowe la itretre dreng me hape: “Nyipunieti pala kö a mano me meköl ngöne la hawa celë, hanawang, easenyi hë la hawa matre nue pi la Nekö i Atr kowe la ime ne la itre ka ngazo.
46 Mejë jë, nge tro, ke hanawang! Calemi hë la atre salemë* ni.”
47 Nyidrëti pala kö a ithanata nge hanawang! xulu pi hi Iudra, lo ketre ne lo ala Truelof, a kola ce traqa memine la ka ala nyimu fë la itre hele me göjia. Hna upi angatre hnene la itre tane i angetre huuj, me itre qatre ne la nöj.
48 Hnene la atre isalemë hna hamëne la ketre hatrene me hape: “Ame la atr hnenge hna troa idremi memin, angeice hi lai. Xolouthi angeice ju.”
49 Tro meköti jë hi angeic koi Iesu me hape: “Bozu Rabi!” Ame hnei angeic hna dremi nyidrëti jë.
50 Ngo sa jë hi Iesu koi angeic ka hape: “Sineeng, eö a ue celë?” Ame hnei angatr hna tro koi Iesu troa xolouthi nyidrë, me othi nyidrë.
51 Ngo hanawang! Hnene la ketre sine tronge i Iesu hna hule la taua i angeic, me lepe la hlue ne la atre huuj ka sisitria, me thupa la ihnangenyë i angeic.
52 Öni Iesu jë hi koi angeic: “Amë hmaca ju la taua i eö ngöne la göhnen, ke, ame la nöjei atre xomi taua, tro angatre lai a meci hnei taua.
53 Ke ame la mekuna i eö, thatreine kö ni troa xëwe koi Kakati matre upe la wenge thauzan* lao angela?
54 Nga, troa eatre tune kaa la itre hna cinyihan lo hna hape, tro kö lai a traqa tun?”
55 Ngöne la ijine cili, Iesu a qaja kowe la ka ala nyimu ka hape: “Atrekënö ni matre nyipunieti a traqa fë taua me jia troa xolouthi ni? E nöjei drai eni pala hi a hamë ini ngöne la uma ne hmi, ngo tha xolouthi ni hi hnei nyipunie.
56 Ngo kola traqa tune lai matre eatrëne jë lo itre hna Cinyihane hnene la itre perofeta.” Ame hnene la itretre drenge asë hna isa kötr me nuaxöji nyidrë.
57 Hnene lo itre ka xolouth me othi Iesu hna tro sai nyidrë koi Kaiafa, atre huuje ka sisitria, ke e cili hi la hnë itronyi hnene la itretre cinyihan me itre qatre ne la nöj.
58 Hnei Peteru hna xötrethenge angatr qa gaa nany, uti hë ngöne la götrane gaa pë ihakun hnine la hnalapa ne la atre huuje ka sisitria. Thupene lai, angeic a lapa ju memine la itre hlue göi troa atre la ka troa traqa.
59 Nge hnene la itre tane i angetre huuj memine la itre atrene la Hnakootre Ka Tru* i Angetre Iudra, hna thele troa atë la thoi hui Iesu, göi troa humuthi nyidrë.
60 Ngo pëkö hnei angatre hna öhn, ngacama ala nyimu pi hë la itretre atë la thoi. Thupene lai, traqa pi fe hi la lue xan
61 me hape: “Önine la atre celë ka hape, ‘Atreine hi ni thë trije la uma ne hmi i Akötresie, me acil eje hmaca ngöne la köni drai.’ ”
62 Ame hnene la atre huuje ka sisitria hna mejë me hape: “A pëkö nyine tro eö a sa? Nemene la hnei nyidroti la hna qaja göi eö?”
63 Ngo tha ewekë pi kö Iesu, ene pe, qaja jë hi la atre huuje ka sisitria koi nyidrë ka hape: “Eni a upi eö qëmeke i Akötresie, troa qaja koi huni ka hape, eö la Keriso, Nekö i Akötresie!”
64 Öni Iesu jë hi: “Eö hi lai a qaja. Ngo eni a qaja hnyawa koi nyipunie: Qaane enehila, tro hë nyipunieti a öhne la Nekö i Atr a lapa ngöne la götrane maca ne la Akötresie ka men, me traqa hune la itre iaw ne hnengödrai.”
65 Ame hnene la atre huuje ka sisitria hna kuie zezenyi la iheetre i angeic, me hape: “Angeic a qaja angazo Akötresie! Nyine ue hmaca la troa hetre atre anyipicin? Ke nyipunieti hi lai a drei angeic e qaja angazo Akötresie.
66 Nemene fe la mekuna i nyipunie?” Öni angatre jë hi: “Loi e tro angeic a mec.”
67 Ame hnei angatre hna hnyijuën la iqëmeke i Iesu, me faitrë nyidrë. Nge itre xane mina fe a xe nyidrë
68 me hape: “Öi perofetane jë koi hun, ke eö lo Keriso. Drei la ka xe eö?”
69 Nge Peteru a lapa ju ngöne la götran e hnin gaa pë ihakun, nge traqa pi hi la ketre hlu, nekö jajiny, me hape koi angeic: “Ce eö hi lo me Iesu, atre Galilaia!”
70 Ngo thoi jë hi angeic qëmeke i angatr asë me hape: “Thatre kö ni la hnei eö hna qaja.”
71 Ame hë la angeic a tro qa ngöne la götran e hnin gaa pë ihakun, hnene la ketre nekö jajinyi hna wangatrehmekunyi angeic, me qaja kowe la itre atr e cili ka hape: “Angeice hi lo la ketre sine tronge i Iesu, atre Nazareta.”
72 Nge thoi hmaca jë hi Peteru me sisinyi ka hape: “Thatre kö ni la atre cili.”
73 Thupene la ketre hnepe ijin, hnene la itre ka cil e cili hna tro koi Peteru me hape: “Nyipici, eö hi la ketre e angatr, ke mama hi hnene la aqane ithanata i eö.”
74 Angeice a sisinyi jë me ieji, me hape: “Thatre kö ni lai atre cili!” E cili, kukahleke pi hi la trotro.
75 Mekune hmaca jë hi Peteru lo hnei Iesu hna qaja ka hape: “Qëmekene troa kukahleke la trotro, tro eö a akönia qaja ka hape, thatre ni kö hnei eö.” Ame hnei angeic hna tro e kuhu qëhnelö me treije latresi.
Itre mekun ecahu fen
^ Maine, “gaa pë hune uma.”
^ Maine, “saath aqeany.”
^ Ger., “wanaxoeën.”
^ Ger., “wanaxoeën.”
^ Ger., “wanaxoeën.”
^ Ger., “wanaxoeën.”
^ Kola hape, “Atre ini.”
^ Maine, “nyima ne hmi, salamo.”
^ Maine, “Oliv.”
^ Ger., “thixötr.”
^ Maine, “u.” Ger., psy·kheʹ. Wange ju la HQP.
^ Ger., “wanaxoeën.”
^ Ger., “12 lao legeona.”
^ Maine, “Sanederi.”
