Mataio 27:1-66
27 Nge e hmahmakanyi hë, hnene la itretre huuj asë me itre qatre ne la nöj hna ce ithanatane troa humuthi Iesu.
2 Angatr a othi Iesu jë me tro sai nyidrë koi Pilato gavena.
3 Thupene lai, hnei Iudra, lo atre salemë Iesu, hna öhne laka, ase hë amekötine tro Iesu a mec, matre jole hë la hni angeic, ame hnei angeic hna bëeke fë lo 30 lao mani sileva kowe la itretre huuj me itre qatr,
4 me hape: “Ngazo hë ni, ke hnenge hna salemëne la madra ne la atr ka pë ngazon.” Öni angatre jë hi: “Matre tro pena huni a uën? Ketre wange ju kö eö!”*
5 Angeic a trije pi la mani hnine la uma ne hmi, me tro, me hnöjua.
6 Ngo itretre huuj a xome pi la itre mani sileva me hape: “Tha meköti kö troa kuiën ngöne la hnë kuië mani, ke thupene madra la.”
7 Thupene la hnei angatre hna pane ce ithanatan, axeciëne jë hë angatre troa xome la manie cili nyine itöne la hnepadro ne la atre xupi inege, matre nyi hnë kele wezipo koi itre trenyiwa.
8 Qaane ju hi la drai cili, hna hëne pë hë la hnepadro cili ka hape, Zi Ne La Madra.
9 Ame hna eatre pi lo hnei Ieremia perofeta hna qaja ka hape: “Hnei angatre hna xome la 30 lao manie sileva, lo thupen ne la atre hna salemën, ene lo atr hna salemën hnene la itre xa nekö i Isaraela,
10 ame hnei angatre hna hamëne pi la mani thupene la hnepadro ne la atre xupi inege, thenge lo hnei Iehova* hna ahnithe koi ni.”
11 Kola cil hnei Iesu qëmekene la gavena, matre hnyinge jë hi la gavena ka hape: “Eö la joxu i angetre Iudra?” Sa jë hi Iesu ka hape: “Nyipëti kö la ka qaja.”
12 Ngo ame la kola qaja angazo Iesu hnene la itretre huuj me itre qatr, pëkö hnei nyidrëti hna sa.
13 Öni Pilato jë hi koi Iesu ka hape: “Tha drenge kö eö la nöjei ewekë hnei angatre la hna qaja göi eö?”
14 Ngo tha sa kö nyidrë. Pëkö ca hna qaja, matre kola sesëkötre la gavena.
15 Nge hnene la gavena hna majemine nu e nöjei feet la ketre atr hna akalabusin kowe la ka ala nyim, thenge la hnei angatr hna ajan.
16 Nge ame ngöne la ijine cili, hetre ketre atr hna akalabusin nge ka hlemu ngazo, Barabasa la ëjen.
17 Matre ame hë la angatr a icacaxeny, hnyinge jë hi Pilato ka hape: “Aja i nyipunieti kö tro ni a nue Barabasa maine Iesu, lo hna hëne ka hape, Keriso?”
18 Ke atre hi Pilato laka, hnei zalu matre angatr a othi Iesu.
19 Ame hë la Pilato a të hune la ita ne iameköti, hnene la föi angeic hna iupi fë maca koi angeic me hape: “Nue pi lai atre ka meköti cili, ke ase petre hi ni pu ngazo göi angeic.”
20 Ame hnene la itre tane i angetre huuj me itre qatre ne la nöj, hna ukune la ka ala nyimu troa sipone troa nue Barabasa, me humuthi Iesu.
21 Hnyinge jë hi la gavena ka hape: “Drei la hnei nyipunieti hna ajane tro ni a nu?” Sa jë hi angatre ka hape: “Barabasa.”
22 Öni Pilato hmaca jë: “Nge tro pë hë ni a uë Iesu, lo hna hëne ka hape, Keriso?” Sa hmaca jë hi angatr ka hape: “Athipi angeice ju hune la sinöe!”*
23 Öni Pilato: “Ke hnauën? Nemene la ngazo i angeic?” Ngo kolo jë pe ka hape, sue catre hmaca jë angatr, me hape: “Athipi angeice ju hune la sinöe!”
24 Öhne hi Pilato laka, angeic a aluzi trenge catr, nge tru hë la hna nyi mejen hnene la ka ala nyim, ame hnei angeic hna xomi tim, me wasine la lue ime i angeic qëmeke i angatr, me hape: “Tha zönge fe kö la madra ne la atre ce, ngo nyipunieti pë hë.”
25 Ame hnene la nöj asë hna sa ka hape: “The huni kö, me itre nekö huni la madra i angeic.”
26 Pilato a nue Barabasa pi koi angatr, me upe troa thaucë Iesu, me jei faonyi nyidrë hune la sinöe ne iaxösisi.
27 Hnene pë hë la itre sooce i gavena hna xomi Iesu kowe la hnalapa i gavena, me acasine la itre sooc asë xötreithi nyidrë.
28 Nge thupene la angatr a unatrije la itre iheetre i nyidrë, angatr a heetrë nyidrëti jë hnene la ketre imaano ka madra palulu.
29 Angatr a ele jë la itre ka ithiny matre nyi korona i Iesu, me amë hune la he i nyidrë. Angatr a amë ju fe ngöne la ime maca i nyidrë la ketre hainy. Nge sa iwatingöne ca pi hi angatr qëmeke i nyidrë, me hnyimasai nyidrë me hape: “Bozu së, Joxu i angetre Iudra!”
30 Angatr a hnyijuë nyidrëti jë, me hna lai hainy kowe la he i nyidrë.
31 Nge thupene la angatr a pane hnyimasai Iesu, angatr a unatrije pi la imaano, me heetrë nyidrëti hmaca lo iheetre ka qea i nyidrë, me tro sai nyidrë troa jei faonyi nyidrë hune la sinöe.
32 Ame la angatr a tro qa lai, ixelë ju hi angatr memine la ketre trahmanyi qa Kurene, Simona la ëjen. Upi angeice jë hi troa ajöne la sinöe ne iaxösisi* i Iesu.
33 Nge ame hë la angatr a traqa ngöne la götrane hna hape, Gol′go·tha, ene lo, Götrane Ne La Itre Inenatr,
34 angatr a hamëne pi koi Iesu la waina hna nyi nyikön hnei dröne hnitr ka haitr, ngo ase jë hi Iesu tupath, xele ju kö nyidrë ma ij.
35 Nge thupene la angatre a jei faonyi nyidrë hune la sinöe, angatr a uthi trikitre* jë matre thawa la itre iheetre ka qea i nyidrë.
36 Ame hnei angatre hna pane lapa ju troa thupë nyidrë.
37 Nge hune la he i nyidrë hna athipe la ketre hna cinyihan, ene lo kepin matre jele ngazo nyidrëti jë. Kola hape: “Iesu hi la, Joxu i angetre Iudra.”
38 E cili fe ezi nyidrë la lue atrekënö, casi ngöne la götrane maca, nge ketre ngöne la götrane mi.
39 Nge ame la itre ka tro, angatr a qaja angazo nyidrë, me nangenang,
40 me hape: “Öni eö lo ka hape, tro eö a thëtrije la uma ne hmi me acile hmaca ej ngöne la köni drai, pane amele eö jë! Maine eö hi la nekö i Akötresie, ketre uti pi qa ngöne lai sinöe ne iaxösisi.”*
41 Nge tune mina fe, hnene la itre tane i angetre huuj me itretre cinyihan hna nyiqaane hnyimasai Iesu me hape:
42 “Hnei angeic hna amele itre xan, ngo thatreine pe sipu amele angeic! Maine angeic la Joxu i Isaraela, nue angeice pi troa uti xan qa ngöne la sinöe ne iaxösisi, matre hane jë fe huni mejiune koi angeic.
43 Hnei angeice hna lapaune koi Akötresie; haawe, nue Akötresieti pi troa amele angeic, maine celë hi aja i Akötresie, ke öni angeice lo, ‘Eni la Nekö i Akötresie.’ ”
44 Nge hnene fe la lue atrekënö ezi Iesu hna hane qaqa nyidrë.
45 Nge qaane la hnaasikisine* hawa, jidri ju hi la nöj asë uti hë la hnaanaenene* hawa.
46 Nge ngöne la hnaanaenene hawa, sue jë hi Iesu ka hape: “E′li, E′li, la′ma sa·bach·tha′ni?” kola hape, “Akötresie, Akötresinge fe, hnauëne la nyipëti a nue ni?”
47 Ame la kola drenge lai hnene la itre xa ka cil e cili, öni angatr: “Kola hë Elia hnene la atre ce.”
48 Ame hnene la ketre e angatr hna nyinyape xome la ketre wene koto,* me trapin ngöne waina hna nyinyikön hnei dröne sinöe ka haitr, me amë hune sine sinöe me thue ime i nyidrë.
49 Ngo canga önine jë la itre xane ka hape: “Ke nue pi! Matre wange jë së ka hape, tro kö Elia a hane traqa troa amele angeic.”
50 E cili, Iesu a sue catre hmaca jë me meci ju.*
51 Nge hanawang, kola aca tro kuie zezenyi pi hi la imaano ne thewe hnahag e hnine la uma ne hmi, qaane ju hi e koho uti hë e kuhu. Ame hna jumejume la ihnadro, me kaqa la itre etë ka tru,
52 nge nganga pi hi la itre hua,* ame hna mama pi la itre ngönetrei ne la itre xa atr ka hmitrötr,
53 nge hna mama lai kowe la ka ala nyim. (Thupene la hna amele Iesu hmaca, hnene la itre atr ka tro qa ngöne la itre hnë kele wezipo, hna lö kowe la traone ka hmitrötr.)*
54 Matre, ame hë la kola öhne la sa, me itre ewekë ka traqa hnene la itre ka thupë Iesu, ene lo itre sooc me tane i angatr, xou i angatre ju hi, nge öni angatr: “Nyipici, Nekö i Akötresieti hi nyidrë.”
55 Nge ala nyimu la itre föe ka goeëne lai qa gaa nany, itre ka xötrethenge Iesu qaa Galilaia troa xatua nyidrë.
56 Ce angatr me Maria Magadalena, me Maria thine i Iakobo me Iose, memine la thine ne la lue nekö i Zebedaio.
57 Nge e hnaipajö heji hë, hna traqa hnene la ketre trahmanyi ka trenamo qa Arimathea, Iosefa la ëjen, ketre atre drei Iesu.
58 Angeic a easenyi Pilato jë troa sipone la ngönetrei i Iesu, ame hnei Pilato hna amekötine troa hamën.
59 Nge Iosefa a xome jë la ngönetrei i nyidrë, me atuthe hnene la imaano lino ka wië.
60 Angeic a amë pi la ngönetrei ngöne la hua ka hnyipixe hna kuj hnine la git. Nge thupene la hna amë la ketre etë ka tru ngöne la hnë lö, angeic a tro hmaca pi.
61 Ngo lapa ju pe hi Maria Magadalena, me ketre Maria qëmekene la hua.
62 Ame hë la drai thupen, lo drai ne Hnëkëne la Sabath, hnene la itretre huuj me itre Faresaio hna icacaxenyi qëmeke i Pilato,
63 me hape: “Joxu, mekune hmaca ha huni lo hna qaja hnene lo atre thoi ka hape, ‘Thupene köni drai, tro ha amele ni hmaca.’
64 Matre, pane amekötine jë nyipë troa thupëne la hua uti hë la hnaakönine drai, wanga tro la itretre drei angeic a atrekënö la ngönetrei, me qaja kowe la itre atr ka hape, ‘Hna amele angeice hmaca qa hna mec!’ Ke ame hë e cili, loi ju kö lo tro hnapan.”
65 Öni Pilato koi angatr ka hape: “Nga xome jë hö nyipunie la itretre thup matre thupëne la hua.”
66 Haawe, angatr a tro pi kowe la hua, me pelehatrene la etë, me acile la itretre thup.
Itre mekun ecahu fen
^ Maine, “zö i eö kö lai!”
^ Wange ju la HQP.
^ Maine, “jei faonyi ngöne la sinöe.”
^ Wange ju la HQP.
^ Wange ju la HQP.
^ Wange ju la HQP.
^ Kola easenyi koi midi.
^ Kola easenyi koi 3:00 e hnaipajö.
^ Maine, “epoz.”
^ Maine, “aca simano.”
^ Maine, “itre hua nyine amekunën.”
^ Maine, “Ierusalema.”
