Mataio 28:1-20
28 Ase hë la Sabath, nge ngöne la hmahmakanyi ne la pane drai ne la wiik, hnei Maria Magadalena me ketre Maria hna tro kowe la hua.
2 Nge hanawang! Traqa pi hi la ketre sa atraqatr, ke kola uti qa hnengödrai la angela i Iehova.* Ukune jë hi angeice lo etë, me lapa të hun.
3 Ame la qëmeke i angeic, tre tune la lai, nge wië kaca la iheetre i angeic.
4 Ngo eje hi laka, atraqatre catre pi hë la trenge xou ne la itretre thup, matre angatr a cile hnö.
5 Ngo önine jë hi la angela kowe la lue föe ka hape: “The xou kö, ke atre hi ni laka, epon a thele Iesu, lo hna athipe hune la sinöe.
6 Patre hë nyidrëti la, ke ase hë amele nyidrë, tune lo aqane qaja i nyidrë. Lö jë, nge goeëne ju la hnei nyidrëti hna meköl.
7 Enehila, canga tro jë, nge qaja ju kowe la itretre drei nyidrë ka hape, mele hmaca ha nyidrë qa hna mec, nge hanawang! Tro pa i nyidrëti hë e Galilaia. Nge tro nyipunieti a iöhnyi me nyidrë e cili. Nge hanawang! Ase hë ni lai thuemacanyi epon.”
8 Haawe, canga tro pi hi nyidro qa ngöne la hua, nyidroti a xou me madrin, me nyinyape troa qaja la maca kowe la itretre dreng.
9 Nge hanawang! Iesu a iöhnyi ju me nyidro me hape: “Hapeue lai?” Nyidroti a tro pi koi Iesu, me xolouthe la lue ca i nyidrë, me sa iwatingöne ca* qëmeke i nyidrë.
10 Öni Iesu jë hi koi nyidro: “The xou kö! Tro jë, nge qaja ju kowe la itre trejin me eni laka, loi e tro angatr a tro Galilaia, nge tro hë angatr e cili a iöhnyi me eni.”
11 Nyidroti hë ngöne la gojeny, ame hna tro hnene la itre xa atre thup kowe la traon troa thuemacane la itre tane i angetre huuj la itre ewekë ka traqa.
12 Nge thupene la angatr a ase icasikeu memine la itre qatre ne la nöj, me isa qeje mekun, angatr a hamëne pi la itre mani sileva ka tru kowe la itre sooc,
13 me hape: “Qaja ju ka hape, ‘Hnene la itretre drei angeic hna traqa e jidr troa kötre fë la ngönetrei i angeic, lo eahuni a meköl.’
14 Nge e traqa ju la mejene cili kowe la gavena, the xou kö, ke tro kö huni a ithanata* me nyidrë.”
15 Ame hnei angatre hna xome la manie sileva, me trongëne thenge lo aqane amekötine koi angatr, matre ewekë lai hna ithanatane lapan hnene la angetre Iudra, uti hë la drai ce.
16 Ngo ame lo ala 11 lae atre drei Iesu, hnei angatre pe hë hna tro Galilaia, ngöne lo wetr hnei Iesu hna isapui me angatr.
17 Nge ame hë la angatr a öhnyi nyidrë, angatr a atrunyi nyidrëti jë, ngo nango luelu petre kö itre xan.
18 Matre, Iesu a easenyi angatre ju me hape: “Ase hë Akötresieti nue koi ni troa musi hune la nöjei ewekë e hnengödrai me e celë fen.
19 Qa ngöne lai, tro jë nyipunie, nge inine jë la nöjei atr qa ngöne la nöjei nöj troa xötrethenge ni. Bapataiso angatre jë ngöne la ëje i Kaka, me ngöne la ëje ne la Nekön, memine la uati hmitrötr.
20 Ini angatre jë troa trongëne lo nöjei ewekë hnenge hna amekötine koi nyipunie. Nge hanawang, tro pala hi ni a ce me nyipunie uti hë la troa nyipune la fene celë.”*
Itre mekun ecahu fen
^ Wange ju la HQP.
^ Maine, “thil.”
^ Ger., “thelejën.”
^ Maine, “hneijin.” Wange ju la HQP.
