Mataio 3:1-17
3 Ame ngöne la itre drai cili, traqa ha Ioane Bapataiso troa cainöj ngöne la hnapapa e Iudra.
2 Angeic a qaja ka hape: “Ietra ju, ke, calemi hë la Baselaia ne hnengödrai.”
3 Kolo atr hna qaja hnei Isaia perofeta lo kola hape: “Aqane ewekë ne la atre hë ngöne la hnapapa, kola hape: ‘Hnëkëne jë la jë i Iehova!* Amekötine jë la jë i nyidrë.”
4 Ngöne la ijine cili, Ioane a heetrë ipene kamela, me hnöthe la gö i angeic hnei beletr hna kuca hnei ikupeine öni. Nge ame la sipu a i angeic, tre, sipa me miel* ne hnitr.
5 Ame hna traqa koi angeic la angetre Ierusalema, me angetre Iudra asë, me itre götrane nöje xötreith e Ioridrano.
6 Nge hna bapataiso* angatr hnei Ioane ngöne la Hneopegejë Ioridrano, nge angatr a isa qaja amamane la itre ngazo i angatr.
7 Ame la angeic a öhne la itre Faresaio me Sadukaio ka ala nyim e traqa kowe la hna bapataiso, öni angeice jë hi koi angatr: “Itre une hna mecin,* drei la ka upi nyipunie troa kötrene la elëhni ka troa traqa?
8 Wa wene jë pe matre amamane la ietra i nyipunie.
9 Nge the mekune kö troa qaja e kuhu itre hni nyipunie, ka hape, ‘Aberahama la keme hun.’ Ke, eni a qaja koi nyipunie ka hape, atreine hi Akötresie nyi matra i Aberahama qa ngöne la itre etë celë.
10 Të hë la ze hune la iwaan ne la itre sinöe. Matre ame la nöjei sinöe ka tha wa loi, tre tro ha satrij, me kuiëne kowe la eë.
11 Eni a bapataiso nyipunieti hnei tim pine la ietra i nyipunie, ngo ame la atre traqa thupeng, tre, ka draië kö hung. Nge tha ijijinge kö troa senge la lue ibutre i nyidrë. Nyidrëti la atre troa bapataiso nyipunie hnei uati hmitrötr, me eë.
12 Eje ngöne la iwanakoime i nyidrë la pel ne nyihnyawa wene qitr,* nge tro nyidrëti a nyihnyawane asë la hnë lepe qitr,* me xawane me umëne la itre wene qitr. Ngo tro nyidrëti a dreuthetrije la itre kupeine qitre ngöne la eë ka tha pi kö.”
13 Ame hna traqa hnei Iesu qaa Galilaia koi Ioane e Ioridrano, matre troa bapataiso nyidrë hnei angeic.
14 Ngo hnei angeice hna thele troa sewe nyidrë me hape: “Eni la hnei nyipë hna troa bapataison, nge nyipëti pena ha a traqa koi ni?”
15 Öni Iesu jë hi koi angeice ka hape: “Ngo enehila ju hi, ke, celë hi aqane troa eatrën asë la itre ewekë ka meköt.” Matre, tha sewe nyidrëti ju hi hnei angeic.
16 Nge thupene la kola ase bapataiso Iesu, canga lö pi hi nyidrë qa ngöne la tim, nge hanawang! fe pi hi la hnengödrai, nge nyidrëti a öhne la uati Akötresie, kola uti kösë piny, me traqa hui nyidrë.
17 Nge qaa hnengödrai, Akötresieti a qaja ka hape: “Nekönge hniminange lai, eni a madri nyën.”
Itre mekun ecahu fen
^ Wange ju la HQP.
^ Maine, “hani.”
^ Maine, “hetin.”
^ Maine, “matra ne vaipa.”
^ Wene ka tune la laes nge ka cia e Isaraela. Wene lai hna xome nyine sa falawa.
^ Jia ne huliwa nyine ijene la ikupein me wene qitr.
