Mataio 4:1-25
4 Thupene lai, hna tro sai Iesu hnene la ua kowe la hnapapa göi troa tupathi nyidrë hnei Diabolo.
2 Nge 40 lao drai, lai me jidr ne tha xeni nyidrë, matre nyidrëti a mecijiin.
3 Traqa pi hi koi nyidrë la Atre Itupath, me hape: “Maine nekö i Akötresieti nyipë, qaja ju kowe la itre etë celë troa nyi falawa.”*
4 Ngo öni nyidrëti e sa ka hape: “Ase hë cinyihan: ‘Tha tro kö la atr a mel hnei falawa hmekuj, ngo hnene la nöjei trengewekë hna qaja* hnei Iehova.’ ”*
5 Ame hna tro sai nyidrë hnei Diabolo kowe la hlapa ka hmitrötr, me ami nyidrë hune la götrane gaa draië ne la uma ne hmi,
6 me hape koi nyidrë: “Maine nyipëti la nekö i Akötresie, sesë pi, ke ase hë cinyihan ka hape: ‘Tro nyidrëti a upe la itre angela i nyidrë koi nyipë,’ nge, ‘Tro angatr a xepi nyipë, wanga thë jë la iwaca i nyipë hnei etë.’ ”
7 Öni Iesu koi angeic: “Ketre ase hë cinyihan: ‘The tro kö eö a tupathi Iehova* Akötresi eö.’ ”
8 Matre, Diabolo a tro sai nyidrëti jë kowe la ketre wetr ka draië catr me amamane la nöjei baselaia ne la fen memine la lolo ne itre ej,
9 me qaja koi nyidrë ka hape: “Tro ni a hamë nyipë la nöjei ewekë celë e tro nyipë a sa iwatingöne ca, me thili koi ni.
10 Iesu a sa jë koi angeic ka hape: “Tro pi Satana! Ke ase hë cinyihan ka hape: ‘Iehova* Akötresi eö la nyine tro eö a thili kow, nge nyidrëti hmekuje hi la nyine troa nyihluen.’ ”*
11 Diabolo a nue nyidrëti pi, nge hanawang! kola traqa la itre angela troa xatua nyidrë.
12 Drenge hë nyidrë ka hape, ase hë othi Ioane, ame hnei nyidrëti hna tro Galilaia.
13 Nge nyidrëti a tro pi qaa Nazareta, me lapa e Kaperenauma ngönegejë, ngöne la götrane nöj e Zebulona me Nafatali,
14 matre eatre pi lo hna qaja hnei Isaia perofeta ka hape:
15 “Nyipunie angetre Zebulona me Nafatali, ngöne la ketre götrane ngönegejë e Ioridrano e Galilaia i angetre fen, itretre lapane la jë ne tro koi hnagejë!
16 Öhne hë la lai atraqatr hnei angetre lapane la gaa jidr; nge lai fe hë thei angetre mel fene la iahnue ne la mec.”
17 Qaane ju hi la ijine cili, Iesu a cainöje me qaja ka hape: “Ietra ju, ke calemi hë la Baselaia ne hnengödrai.”
18 Nyidrëti a trongëne la Ngönegejë Ne Galilaia, nge öhne ju hi nyidrëti la lue trejin, Simona, lo hna hëne ka hape, Peteru, me Anederea trejine me angeic; kola nue ifile e kuhu hnagejë, ke lue ka nyi ie nyidro.
19 Öni nyidrëti jë hi koi nyidro: “Xötrethenge ni jë, nge tro ni a amamai epon la aqane thele atr.”
20 Ame hnei nyidroti hna canga nuetrije la itre ifile i nyidro, me xötrethenge nyidrë.
21 Ame hë la kola tro qaa lai, öhnyi Iakobo ju hi nyidrë, lo nekö i Zebedaio, me Ioane trejin me angeic. Nyidroti e hune la he me Zebedaio, keme i nyidro, kola nyihnyawa ifile. Nyidrëti a hë nyidroti mina fe.
22 Ame hnei nyidroti hna canga nuetrije la he i nyidro, me keme i nyidro, me xötrethenge nyidrë.
23 Nyidrëti a trongëne jë la nöje Galilaia asë, me hamë ini hnine la itre sunago, me cainöjëne la maca ka loi ne la Baselaia, me aloine la nöjei pengöne mec, me itre ka kucakuca asë thei angatr.
24 Nge kola qeje nyidrë ngöne la Suria asë, ame hna traqa fë pi koi nyidrë la itre atr hna tith hnene la nöjei pengöne meci me akötr, me itre hna löthe hnei dremoni, me itre ka ön, me itre sinatr. Nge nyidrëti a aloinyi angatr asë.
25 Ame hna xötrethenge nyidrë hnene la ka ala nyimu qaa Galilaia, me Dekapoli,* me Ierusalema, me Iudra, me qaa ngöne la götrane ahië ne Ioridrano.
Itre mekun ecahu fen
^ Maine, “Areto.”
^ Ger., “qa ngöne la që i Iehova.”
^ Wange ju la HQP.
^ Wange ju la HQP.
^ Wange ju la HQP.
^ Maine, “kuca la huliwa i Akötresie.”
^ Maine, “nöj gaa treen lao traon.”
