Mataio 5:1-48
5 Öhne hë nyidrë la ka ala nyim, ame hnei nyidrëti hna elë jë kowe la wetr. Ame hë la nyidrëti a lapa, traqa pi hi la itretre drei nyidrë.
2 Nyidrëti a nyiqaane ewekë jë me ini angatr, me hape:
3 “Madrine la itre ka atrehmekune laka, nyipiewekë Akötresie koi angatr, ke thatraqai angatre la Baselaia ne hnengödrai.
4 “Madrine la itre ka hace hni, ke tro ha axapone la itre hni angatr.
5 “Madrine la itre ka hni ka menyik, ke ewekë i angatr elanyi la ihnadro.
6 “Madrine la itre ka ajane catrëne* la thiina ka meköt, ke tro ha ameji angatr.
7 “Madrine la itre ka utipin me ka atreine nue ngazo, ke tro fe a hane uti pi angatr me nue la ngazo i angatr.
8 “Madrine la itre ka hni ka wië, ke tro hë angatr a öhnyi Akötresie.
9 “Madrine la itre ka thele tingeting, ke troa hë angatre ka hape, itre nekö i Akötresie.
10 “Madrine la itre hna axösisine pine la thiina ka meköt, ke thatraqai angatre la Baselaia ne hnengödrai.
11 “Madrine nyipunie e kola qejegele nyipunie, me axösisi nyipunie, me silitrengathoi nyipunie pi ni.
12 Madrine jë nge madrin atraqatre jë nyipunie, ke tru la thupe i nyipunie e hnengödrai; ketre, hna hane fe axösisine la itre perofeta ekö.
13 “Nyipunieti la sootre ne la fen, ngo e patre hë la emenene la sootr, tro lai a pui loi tune kaa? Tha nyipi ewekë hmaca kö ej; loi e troa trij, me waja hnei atr.
14 “Nyipunieti la lai ne la fen. Thatreine kö troa tha mama la traon hna acil hune la wetr.
15 Kola amelene la laame cil me atë ej hune ita ne laam, matre thinane la itre atr asë hnine la uma, ngo tha nyine tro pe a amë fene itrengen.*
16 Ketre tune mina fe, loi e hudrume la lai i nyipunie qëmeke i nöjei atr, matre mama pi la itre huliwa ka loi i nyipunie, nge matre tro fe angatr a hane atrune la Keme i nyipunie e koho hnengödrai.
17 “The mekune kö nyipunie laka, eni a traqa troa apatrene la Wathebo me itre Perofeta. Tha traqa kö ni troa apatren, ngo troa aeatrën.
18 Nyipici ini a qaja koi nyipunie, ka hape: “Patre ju hë elanyi la hnengödrai memine la fen, ngo tha tro pi kö a hane patre la ketre mataitus, maine ketre hnepe ka co hi qa hnine la Wathebo, e tha hna pane eatre asë la itre hna cinyihan.”
19 Matre ame la atre ena la neköi wathebo ka co catr, me inine la itre atr troa ujë tune lai, tha ijiji angeice kö elanyi troa lö kowe* la Baselaia ne hnengödrai. Ngo ame la atre trongën asë la Wathebo me inine la itre atr, ijiji angeic elanyi troa lö kowe* la Baselaia ne hnengödrai.
20 Ke, eni a qaja koi nyipunie ka hape, maine tha sisitria kö la thiina ka meköt i nyipunie hune la thiina ka meköti ne la itretre cinyihan me itre Faresaio, tha tro pi kö nyipunieti a lö kowe la Baselaia ne hnengödrai.
21 “Drenge hë nyipunie lo hna qaja koi itre atr ekö ka hape: ‘The ihumuthi kö, nge ame la atre ihumuth, tro ha uti sai angeic kowe la hnakootr.’*
22 Ngo, eni pe a qaja koi nyipunie ka hape, ame la atre lapa fë trenge hni kowe la trejine me angeic, tro ha uti sai angeice kowe la hnakootr, nge ame la atre iqaqa, tro ha uti sai angeic kowe la Hnakootre Ka Tru, nge ame la atre qaja ka hape, ‘Hmo hna sisin!’, ijiji angeice la eë e Gena.*
23 “Haawe, maine eö a tro fë la ahnahna i eö kowe la ita ne huuj, nge e cili, mekune hmaca jë hi eö laka, jole hë la trejin hnei eö,
24 pane amë ju la ahnahna i eö qëmekene la ita ne huuj, nge tro jë troa pane iloi memine la trejine me eö. Nge e bëeke hë eö, tro fë jë la ahnahna i eö.
25 “Thele jë troa canga iloi memine la atre uti sai eö, e epone pala kö ngöne la gojeny, wanga nue eö pi hnene la ka uti sai eö kowe la atre amekötin; nge tro la atre amekötin a nue eö kowe la atre thup, nge tro pë hë angeic a kuië eö kowe la kalabus.
26 Nyipici, eni a qaja koi eö, tha tro kö eö a tro qaa lai, e tha pane të asë kö eö la mani* hna athipe koi eö.
27 “Drenge hë nyipunie lo hna qaja ka hape: ‘The nyixetë kö.’
28 Ngo eni pe a qaja koi nyipunie ka hape, ame la atre goeëne lapane la ketre föe, me meciu eahlo, ase hë angeic nyixetë memine la föe e kuhu hni.
29 Haawe, maine eö a kei hnene la alameke maca i eö, sea trije pi. Ke, ka loi kö troa patre la ketre götrane la ngönetrei eö hune la troa kuiën asë la ngönetrei eö ngöne la Gena.*
30 Ketre, maine eö a kei hnene la ime maca i eö, thupa trije pi. Ke, loi ju kö koi eö troa patre la ketre götrane la ngönetrei eö hune la troa tro asë la ngönetrei eö kowe la Gena.*
31 “Hna qaja mina fe ka hape: ‘Ame la atre sei hna cil me föi angeic, loi e tro angeic a hamëne la tusi ne triji föe.’
32 Ngo eni pe a qaja koi nyipunie ka hape, ame la atre sei hna cil me föi angeic, nge tha hna kuci ngazo* kö, tre kola fe gojenyi angeic kowe la nyixetë. Nge ame la atre faipoipo me ketre föe ka sei hna cil, tre kola nyixetë.
33 “Nge drenge fe hë nyipunie lo hna qaja koi angatr ekö, ka hape: ‘The tro kö eö a sisinyi thoi, ngo loi e tro eö a eatrëne la hnei eö hna sisiny koi Iehova.’*
34 Ngo eni pe a qaja koi nyipunie ka hape: The sisinyi kö jëne hnengödrai, ke, therone i Akötresieti lai;
35 ketre the sisinyi kö jëne ihnadro, ke ta ne lue ca i nyidrëti lai; ketre tui Ierusalema, ke hlapa ka sisitria lai ne la Joxu ka catr.
36 Nge, the tro kö eö a sisinyi jëne la mele i eö,* ke, thatreine kö eö troa awiëne maine awetrewetrene la ca pene he i eö.
37 Matre e öni eö jë ka hape, ‘Ö,’ loi e troa ö, nge e ‘Waea,’ waea, ke qaathei Diabolo* la hna nyixan.
38 “Drenge hë nyipunie lo hna qaja ka hape: ‘Alamek thupene alamek, nge nyö thupene nyö.’
39 Ngo eni pe a qaja koi nyipunie ka hape: The icilekeu kö memine la atr ka ngazo, ngo ame la atre xe la itrasitre maca i eö, line pi fe la ketre koi angeic.
40 Nge maine ketre atr a uti sai eö göi troa xome la iheetre i eö ka he hnin, ketre hamëne pi fe la iheetre ka qea.
41 Maine ketre atre trene hnëqa a musinë nyipunie troa thue la ketre ehnefe koi ca kilomet, thue jë koi lue kilomet.
42 Hamëne pi kowe la atre sipo eö, nge the hutrö kö kowe la ka sipo mani.*
43 “Drenge hë nyipunie lo hna qaja ka hape: ‘Qa i eö troa hnime la atr lapa easenyi* eö tui eö hi, me methinëne la ithupëjia me eö.’
44 Ngo eni pe a qaja koi nyipunie ka hape: The mano kö hnime la itre ithupëjia me nyipunie, me thithi sai angetre axösisi nyipunie,
45 matre amamane ka hape, nyipunie la itre nekö ne la Keme i nyipunie e koho hnengödrai, ke, nyidrëti la ka axulune la jö kowe la itre atr ka ngazo me ka loi, me axulune la mani kowe la itre atr ka meköt me ka tha meköti kö.
46 Ke maine nyipunie a hnime la itre ka hnimi nyipunie, nemene la manathith hna kapa qa ngön? Tha hna ujë tune kö lai hnene la itre ka hle mani?*
47 Nge maine nyipunieti a ibozu* hmekuje hi memine la itre trejine me nyipunie, nemene la ewekë ka sisitria hnei nyipunieti hna kuca? Tha hna hane kö ujë tune lai hnene la itre atre ne la itre xa nöj?
48 Haawe loi e tro nyipunieti a pexej, tune la Keme i nyipunie ka pexej e hnengödrai.
Itre mekun ecahu fen
^ Ger., “itretre pi xeni me pi ij.”
^ Maine, “treng ne tulu.”
^ Ger., “troa hë angeic ka hape ‘ka co’ ngöne la Baselaia ne hnengödrai.”
^ Ger., “troa hë angeic ka hape, ‘ka tru’ ngöne la Baselaia ne hnengödrai.”
^ Maine, “koi gaa tru.”
^ Hnë dreu ewekë hna trije e tröne e Ierusalema. Wange ju la HQP.
^ Maine, “uti hë la tro eö a të hmaca la neköi piesi ka co catr.”
^ Wange ju la HQP.
^ Wange ju la HQP.
^ Ger., por·neiʹa. Wange ju la HQP.
^ Wange ju la HQP.
^ Ger., “sisinyi hune la he i eö.”
^ Ger., “atre ka ngazo.”
^ Kola hape, troa sipo mani nge tha tro kö a nyi nekön.
^ Ame la hnaewekë qene Geres hna ujëne ka hape, “atre lapa easeny,” tre, tha kolo hmekuje kö a qaja la itre atr ka ce mel me easë, ngo kolo fe a qaja la nöjei atr asë.
^ Atre hle mani thatraqai mus.
^ Maine, “kapa hnyawa.”
