Mataio 6:1-34
6 “Wange kö ke kuca jë nyipunie la itre ewekë ka loi qëmekene la itre atr nyine nyi drön, wanga pë pi edrö i nyipunieti qaathei Keme i nyipunie e koho hnengödrai.
2 Matre, e tro eö a hamë ahnahna ne utipin,* the ufi trutru kö qëmeke i eö tune la itre ka lue iqëmek hnine la itre sunago, me ngöne la itre gojeny. Angatr a kuca tun, matre troa atrunyi angatre hnei atr. Nyipici, eni a qaja koi nyipunie ka hape, edrö i angatre pë hë lai.*
3 Ngo ame eö, e tro eö a hamë ahnahna ne utipin, tha tro kö la iwanakoime mi a atre la hna kuca hnene la iwanakoime maca,
4 matre tha tro kö a mama la ahnahna ne utipine i eö. Nge tro hë la Keme i eö ka goeëne ngöne la gaa sihngödr* a të hmaca koi eö.
5 Ketre, ame la eö a thith, the ujë tune kö la itre lue iqëmek, ke aja i angatre troa thithi cil hnine la itre sunago, me ngöne la itre hna ijejea,* matre troa mama koi itre atr. Nyipici, eni a qaja koi nyipunie, kapa ha angatre la edrö i angatr.
6 Ngo, ame la eö a thith, lö jë kowe la hnahage i eö ka pë atr, nge e ase hë thinge la qëhnelö, thithi ju kowe la Keme i eö ka dreng ngöne la gaa sihngödr. Nge tro hë la Keme i eö ka goeëne ngöne la gaa sihngödr, a amanathithi eö.
7 Ame la nyipunie a thith, the qaja lapane kö la itre trengewekë ka cas, tune la hna majemin hnene la itre atr ne la itre xa nöj, ke angatr a mekune ka hape, tro ha drei angatr qa ngöne laka, nyimu trengewekë hna qaja.
8 The nyitipu angatre kö, ke tha ase petre kö nyipunieti sipone kowe la Keme i nyipunie, nge atre fe hë nyidrëti la hnei nyipunieti hna ajan.
9 “Haawe, thithi jë tune la:
“ ‘Kakati fe e koho hnengödrai, epi hmitrötr la ëje i nyipë.
10 Epi traqa pi la Baselaia i nyipë. Epi tro fe a eje la aja i nyipë e celë fen tun e koho hnengödrai.
11 Epi hamë huni pi la falawa ka ijije kowe la drai celë.
12 Nge epi nue pi la itre gufa hun, thenge la aqane nue huni la ngazo ne la itre ka gufa koi hun.
13 Nge the troxomi huni kö kowe la itupath, ngo thepe* huni pe qaathei Satana.’*
14 “Ke maine nyipunieti a nue la ngazo hna kuca koi nyipunie, tro la Keme i nyipunie e koho hnengödrai a hane nue la ngazo i nyipunie.
15 Ngo maine tha hnei nyipunieti kö hna nue la ngazo hna kuca koi nyipunie, ketre tha tro kö la Keme i nyipunie a nue la ngazo i nyipunie.
16 “Ea loi ju hë hna amamane la iqëmeke ka hleuhleu ngöne la nyipunieti a tha xen, tune la itre ka lue iqëmek, ke angatr a nyi ka hleuhleu, matre troa mama kowe la itre atr ka hape, angatr a tha xen. Nyipici, eni a qaja koi nyipunie, kapa ha angatre la edrö i angatr.
17 Ngo, ame la eö a tha xen, sië oelene jë la he i eö, me köle ialamek,
18 matre tha tro kö a mama koi atr ka hape, eö a tha xen, ngo koi Keme i eö hmekuje hi ka lapa ngöne la gaa sihngödr. Nge tro hë la Keme i eö ka goeëne ngöne la gaa sihngödr a amanathithi eö.
19 “Ea loi ju hë hna xawane la itre trengamo e celë fen, itre ewekë lai hna xuje hnei neköi öni* me xojene fao, nge gaa hetre atrekënö, itre ka thë me thepe mo.
20 Ngo, xawane jë pe thatraqai nyipunieti la itre trengamo e hnengödrai, itre ewekë lai hna thatreine xuje hnei neköi öni me xojene fao. Ketre, thatreine kö tro la itre atrekënö a thë me thepe mo.
21 Ke ame la göhne ne la trengamo i eö, tre göhne ne fe hi la hni eö.
22 “Laame ne la ngönetrei la alamek. Matre, e ka maca* la alameke i eö, tro ha hudrum asë la ngönetrei eö.
23 Ngo maine ka ngazo* la alameke i eö, tro ha miti asë la ngönetrei eö. Maine tro la lai thei eö a mit, haawe tro ha miti atraqatr.
24 “Pëkö hlu ka atreine troa nyihluene la lue maseta, ke, tro angeice lai a xelene la ketre, me hnime la ketre, maine fedre koi ketre, me methinëne la ketre. Thatreine kö nyipunie troa ce nyihlue i Akötresie me Mani.
25 “Haawe, eni a qaja koi nyipunie ka hape: Ea loi ju hë hna hnehengazone la mele* i nyipunie, göi nyine xen, me nyine ij, me hnehengazone la ngönetrei nyipunie, me nyine tro nyipunieti a heetrën. Hapeu, tha sisitria kö la mel* hune la xen, me ngönetrei hune la iheetr?
26 Goeëne hnyawane ju la itre waco, tha nyudreni kö a jumi feja, me menuën, me xawane me amë acon ngöne la itre uma të, ngo Keme i nyipunie e koho hnengödrai a thue a i nyudren. Hapeu, tha sisitria kö nyipunieti hui nyudren?
27 Nge drei la atre hnehengazo thei nyipunie ka atreine nyixane la mele i angeic hnei ca menetre hi?
28 Ketre, hnauëne la nyipunieti a hnehengazo göi nyine troa heetrën? Xomi ini jë qa ngöne la aqane cia la itre iengene ne hnitr, tha hane kö huliwa, me ca iheetr,
29 ngo eni a qaja koi nyipunie laka, trenamo catre ju hë Solomona ekö, ngo tha hane kö angeice heetre tui nyudren.
30 Haawe, maine celë hi aqane heetrëne Akötresie la itre hnitr ka cia enehila, nge hna troa trije elany kowe la eë, hapeu, tha aja i nyidrëti kö troa heetrë nyipunie, itretre lapaune acon?
31 Matre, the hnehengazo kö me hape: ‘Nemene la nyine tro sa xen?’ maine, ‘Nemene la nyine tro sa ij?’ maine, ‘Nemene la nyine tro sa heetrën?’
32 Hna thele catrëne la nöjei ewekë celë hnene la itre atre ne fen. Ngo atre kö la Keme i nyipunie e koho hnengödrai ka hape, ka nyipiewekë koi nyipunie la itre ewekë cili.
33 “Celë hi matre, thele panëne jë la Baselaia memine la thiina ka meköt i nyidrë, nge troa hamë nyipunie la nöjei ewekë asë cili.
34 Haawe, the hnehengazone kö la drai elany, ke, qa i elanyi kö la drai elany. Eje hi, hetre itre sipu ejolene kö la drai.
Itre mekun ecahu fen
^ Maine, “hnime la ka pë ewekë.” Wange ju la HQP.
^ Ger., “kapa ha la thupen.”
^ Maine, “götrane maine ewekë ka tha mama kö.”
^ Ne la itre gojenyi ka tru.
^ Maine, “amele.”
^ Ger., “atre ka ngazo.”
^ Ger., “neköi fenifen.”
^ Maine, “lualai.”
^ Maine, “ka zalu.”
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
