Mataio 7:1-29
7 “Ea loi ju hë hna iwaigele, matre tha tro kö Akötresieti a hane waigele nyipunie.
2 Ke ame la aqane iwaigele i nyipunie, tre tro ha waigele nyipunieti tun. Nge ame la aqane ujë i nyipunie kowe la itre atr, tre tro pena angatr a ujë tune koi nyipunie.*
3 Matre, hnauëne laka, eö a goeëne la wanamamik* hnine la alameke ne la trejine me eö, ngo tha öhne pe eö la agö hnine la alameke i eö?
4 Maine pena, tro eö a qaja tune kaa kowe la trejine me eö ka hape: ‘Nue pi tro ni a xometrije la wanamamik qa ngöne la alameke i eö,’ nge hane pe lai agö hnine la alameke i eö?
5 Atre thoi!* Pane xometrije pi la agö qa hnine la alameke i eö, matre mama hnyawa pi la aqane tro eö a xometrije la wanamamik qa hnine la alamekene la trejine me eö.
6 “The hamëne kö la ewekë ka hmitrötr kowe la itre kuli, me trije la itre penina* koi puaka, wanga waja fica pi me thaujë troa hej angazo nyipunie.
7 “Sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie.
8 Ke tro ha kapa hnei atre sipo, nge tro ha öhne hnei atre thel, nge ame koi atre fenafena, tro ha thawa koi angeic.
9 Nga drei e nyipunie, e tro la nekö i angeic a sipo falawa, troa hamë etë koi nyën?
10 Maine pena e tro nyën a sipo ie, troa hamë un koi nyën?
11 Haawe, maine nyipunie, itre atr ka ngazo, a atreine hamë ahnahna ka lolo kowe la itre nekö i nyipunie, nga the qaja pala ha la Keme i nyipunie e koho hnengödrai, atre hamë ewekë ka loi koi angetre sipo nyidrë!
12 Ame asë hi la nöjei ewekë hnei nyipunieti hna ajane tro la itre atr a kuca koi nyipunie, ketre kuca tune jë fe koi angatr. Hane hi lai aliene la Wathebo me itre Perofeta.
13 Lö jë ngöne la hnë lö ka ilitr, ke, ame la hnë lö atraqatr memine la gojenyi ka isaisa, tre, jë ne tro kowe la mec,* nge ala nyimu la itre ka xötrën;
14 ngo ame la hnë lö ka ilitr, memine la gojenyi ka co, tre, jë ne tro kowe la mel, nge xalaithe hi la angetre öhn.
15 Wange kö la itre perofeta thoi ka traqa koi nyipunie kösë mamoe, ngo ame e kuhu hni, tre, itre luko* ka pi öni.
16 Tro nyipunieti a wangatrehmekunyi angatr jëne la itre thiina i angatr. Hapeu, hna huje kö la itre wene vin me itre wene wacua* qa ngöne la isinöe ka ithiny?
17 Ketre tune mina fe, ka wa lolo la nöjei isinöe ka loi, ngo ka wa ngazo la nöjei isinöe ka si mec.
18 Thatreine kö la isinöe ka loi troa wa ngazo, ketre thatreine kö la isinöe ka si meci troa wa lolo.
19 Hna satrije me kuiëne kowe la eë la nöjei isinöe ka wa ngazo.
20 Haawe, tro ha wangatrehmekune la itre atre cili, jëne la itre thiina i angatr.
21 Tha angatr asë kö itretre qaja koi ni ka hape, ‘Joxu, Joxu,’ la ka troa lö kowe la Baselaia ne hnengödrai, ngo kolo hmekuje hi la atre kuca la aja i Kakati e hnengödrai.
22 Ala nyimu la itre ka troa qaja koi ni ngöne la drai cili ka hape: ‘Joxu, Joxu, tha hne huni kö lo hna perofetan ngöne la ëje i nyipë, me helëne la itre dremoni ngöne la ëje i nyipë, me kuca la itre huliwa ka men nge ka nyimutre ngöne la ëje i nyipë?’
23 Nge ame e cili, tro ni a qaja koi angatr ka hape: ‘Thatre nyipunieti kö ni! Ananyi ni pi hnei nyipunie, itretre huliwa kowe la ngazo!’
24 Matre, ame la atre drenge la itre ithanatang, me trongëne itre ej, ceitu i angeic me ka inamacan, atre xupi uma hune etë.
25 Matre traqa pi hi la mani, me di, me eny ka catr, ngo tha kei pi kö la uma, ke, hna acil ej hune etë.
26 Ketre, ame la atre drenge la itre ithanatang, ngo tha trongëne pe, tre ceitu i angeic me atr ka hmo, atre xupe la uma i angeic hune ngöni.
27 Ame hna traqa pi la mani, me di, me eny ka catr, matre kei pi hi me trotro lapa la uma, ene pe, patre ju hi ej.
28 Ase jë hi Iesu qaja la itre ithanata celë, ame hnene la nöjei atr ka ala nyimu hna haine atraqatr la aqane hamë ini i nyidrë.
29 Ke nyidrëti a ini angatr kösë atre trene musi qaathei Akötresie, ngo tha tune kö la itretre cinyihan.
Itre mekun ecahu fen
^ Maine, “ame la aqane tuluth i nyipunie, tre, tro pena a tuluthe koi nyipunie.”
^ Maine, “jez.”
^ Maine, “ka lue iqëmek.”
^ Maine, “etë mo.”
^ Ger., “apatren.”
^ Kola ceitu me kuli wael, ngo ka iheji catr.
^ Maine, “hmejieng.”
