Mataio 8:1-34
8 Ame hë la nyidrëti a uti qa hune la wetr, hnene la itre atr ka ala nyimu hna xötrethenge nyidrë.
2 Nge hanawang! Kola traqa la ketre lepera me atrunyi* nyidrë, me hape: “Joxu, maine ajane nyipë, atreine hi nyipë aloinyi ni.”
3 Ame hnei nyidrëti hna li im me ketri angeic, me hape: “Ajange hi lai! Mele hë hmunë.” Ame hna patre ju la lepera thei angeic.
4 Thupene lai, öni Iesu koi angeic ka hape: “The qaja pi kö koi ketre, ngo tro jë pe troa amamai eö kowe la atre huuj, nge tro fë jë la huuj hna amekötin ngöne lo Trenge Wathebo i Mose, matre nyine anyipicine koi angatr.”
5 Ame hë la nyidrëti a lö e Kaperenauma, hnene la ketre tane isi* hna traqa koi nyidrë, me iele nyidrë
6 ka hape: “Joxu, hlueng pë hë a meköl e koilo hnalapa, ke thatreine hnyawa ha angeic enij. Hna tithi angeic hnei mec, nge tru la akötre i angeic. ”
7 Öni nyidrëti jë hi ka hape: “Qanyinge hë, nge tro ni a aloinyi angeic.”
8 Önine hmaca jë la tane isi ka hape: “Nemene ni Joxu, matre troa kepe nyipë ngöne la hnalapang. Ngo qaja ju hi la ketre ewekë, nge tro la hlueng a egöcatre hmaca.
9 Ketre atr trene musi fe hi ni, eni a musi kowe la ketre trongene isi. Matre, e qaja ha ni koi ketre ka hape, ‘Tro jë!’ angeic a tro, nge koi ketre, ‘Trohemi!’ angeic a traqa pi, nge kowe la hlueng, ‘Kuca jë!’ ame hna kuca ju.”
10 Haawe, ame hë la Iesu a drenge la itre trengewekë celë, nyidrëti a hai me qaja kowe la itre ka xötrethenge nyidrë ka hape: “Eni a qaja hnyawa koi nyipunie, tha hane kö ni öhne la ketre atr ka lapaune tun e Isaraela.
11 Ketre, tro ha traqa la ka ala nyimu qa koië me kuë, itre ka troa ce elë troa xen me Aberahama, me Isaaka, me Iakobo ngöne la Baselaia ne hnengödrai.
12 Ngo tro ha helëne kowe la jidr e kuhu trön la itre nekö ne la Baselaia. Nge e cili, tro angatr a treije me latresi.”
13 Ngo öni Iesu jë hi kowe la tane isi ka hape: “Tro jë hë, nge tro ha kapa la hnei eö hna sipon pine la lapaune i eö.” Matre, ame ju fe kö la hawa cili, loi hmaca ha la hlue i angeic.
14 Thupene lai, Iesu a traqa kowe la hnalapa i Peteru, me öhne la thine ne la föi Peteru a meköl, ke eahlo a idreuth.
15 Nyidrëti a ketre ju la ime i eahlo, ame hna patre pi la idreuth qaathei eahlo. Nge mejë jë hi eahlo troa huliwa koi nyidrë.
16 Thupene la kola lö la jö, hna tro fë koi Iesu la itre atr hna löthe hnei dremoni, nge jëne la trengewekë, nyidrëti a helëne pi la itre dremoni, me aloin asë la itre ka wezipo.
17 Haawe, eatre hë la hna qaja hnei Isaia perofeta ka hape: “Tro kö nyidrëti a apatrene la itre meci së, me thue la itre akötre së.”
18 Ame la Iesu a öhne la ka ala nyimu a traqa koi nyidrë, upe jë hi nyidrë la itretre dreng troa ea kowe la ketre ngönegejë.
19 Nge, mejë jë hi la ketre atre cinyihan me hape: “Atre Ini fe, tro fe ni a hane xötrethenge nyipë ngöne la nöjei jë i nyipë.”
20 Öni Iesu jë hi koi angeic: “Hetre hnë meköl ne la itre kuli wael,* nge hetre itrengene meköl ne la itre waco e caha hnengödrai, ngo ame la Nekö i Atr, tre pë fe kö ita ne he i angeic.”
21 Thupene lai, önine jë hi la ketre atre drei nyidrë ka hape: “Joxu, pane nue ni pi troa keleme la kemeng.”
22 Sa jë hi Iesu koi angeic ka hape: “Xötrethenge ni jë, the mano kö, nge nue pi la itre ka meci troa keleme la itre ka mec.”
23 Nge ame hë la Iesu a elë hune he, kolo fe a xötrethenge nyidrë hnene la itretre dreng.
24 Nge hanawang! Hnahna jë hi la janacas* hune la hnagejë, ame hna kaca trane pi la he; nge ka meköle pala hi Iesu.
25 Angatr a ce ahlë nyidrëti jë me hape: “Joxu, wai hun, ka tro hë së la a mec!”
26 Matre Iesu a sa koi angatre ka hape: “Hnauëne la nyipunieti a xou,* itretre lapaun acon?” Nge mejë jë hi nyidrë troa catrëne la enyi me hnagejë, ene pe, haodrai pi.
27 E cili, angatr a hai me hape: “A drei nyidrëti la, matre kola drei nyidrë hnene la hnagejë me eny?”
28 Ame hë la angatr a xep ngöne la ketre götran ne Gadara, hnene la lue atr hna löthe hnei dremoni hna tro qa ngöne la itre hua* troa itronyi me nyidrë. Hna xoue nyidro hnene la itre atr, matre pëkö ka xötrëne la gojenyi cili.
29 Nge hanawang! Nyidroti a ewekë catre jë me hape: “Nekö i Akötresie, hnauëne la nyipëti e celë? Nyipëti hë a traqa troa ameköti hun, ngo tha ijine pala kö?”
30 Ame ngöne la gaa nany, kola xeni trootro la itro puaka.
31 Matre, hnene pë hë la itre dremoni hna sipo iele Iesu me hape: “Maine tro nyipëti a helë hun, upi huni jë troa löthe la itro puaka.”
32 Öni nyidrëti jë hi ka hape: “Tro jë!” Ame hnei angatr hna tro me löthe la itro puaka. Nge hanawang, sesë pi la itro puaka qa hune la giti kowe la hnagejë, nge nyudreni a isa lö ju me mec.
33 E cili, hnene la itre ka axö öni hna kötre kowe la traon. Nge angatr a qaja trongëne la itre ewekë ka traqa, memine fe lo ka traqa kowe la lue hna löth.
34 Nge hanawang! Kola tro koi Iesu hnene la itre atrene la traon asë, matre ame hë la angatr a ixelë me nyidrë, angatr a helë nyidrëti pi qaa lai.
Itre mekun ecahu fen
^ Maine, “thil.”
^ Ka elemekene la 100 lao sooc.
^ Maine, “alope.”
^ Maine, “enyi ka catr.”
^ Maine, “cile hnö.”
^ Maine, “hua nyine amekunën.”
