Mataio 9:1-38
9 Ame hnei nyidrëti hna elë hune la he, me tro kowe la zi nyidrë.
2 Nge hanawang! Itre atr a tro koi Iesu memine la ketre atr ka genyi ca kola meköle hune la ili ne wezipo. Matre, ame hë la Iesu a öhne la lapaune i angatr, öni nyidrëti jë hi kowe la ka wezipo ka hape: “Catre pi neköng! Ase hë nue la itre ngazo i hmunë.”
3 Nge e cili, hetre itretre cinyihane ka iqajakeune ka hape: “Angeice lai a silitrengathoi Akötresie.”
4 Atre hnyawa hi Iesu la mekuna i angatr, ene pe, nyidrëti a qaja jë ka hape: “A hnauëne laka, ngazo la itre mekuna i nyipunie?
5 Nemene la ka hmaloi troa qaja, ‘Ase hë nue la itre ngazo i eö,’ maine ‘Cile jë nge tro jë’?
6 Ame pe, tro nyipunie a atre laka, hna aijijëne la Nekö i Atr troa senge la itre ngazo e celë fen—” Nyidrëti a qaja jë kowe la ka thatreine tro ka hape: “Cile jë, xome jë la ili hmunë, nge tro jë hë kowe la hnalapa i hmunë.”
7 Angeic a mejë jë, me tro kowe la hnalapa i angeic.
8 Ame hë la kola öhne lai hnene la ka ala nyim, angatr a xou ju, matre angatr a nyiqaane atrunyi Akötresie, Atre hamë mene kowe la atr.
9 Thupene lai, ame la Iesu a tro qa lai, hnei nyidrëti hna öhne la ketre trahmanyi kola lapa ngöne la uma ne hle mani, Mataio la ëjen. Öni nyidrëti jë hi koi angeic ka hape: “Xötrethenge ni jë.” Haawe, mejë jë hi angeic troa xötrethenge nyidrë.
10 Nge ame hë la Iesu a xeni* ngöne la hnalapa i Mataio, hanawang! Kola traqa troa ce xeni me nyidrë me itretre drei nyidrë hnene la itre atre ka hle mani, me itre ka kuca la ngazo.
11 Öhne jë hi lai hnene la itre Faresaio, matre öni angatre jë hi kowe la itretre dreng ka hape: “Hnauëne laka, kola ce xeni hnene la atre ini epun memine la itre ka hle mani, me itre ka kuca la ngazo?”
12 Drenge ju hi Iesu, ame hnei nyidrëti hna sa ka hape: “Tha nyipiewekë kö la droketre kowe la itre ka egöcatr, ngo koi itre wezipo.
13 Tro jë, nge trotrohnine ju la aliene la trengewekë celë: ‘Ka tru koi ni la utipin hune la huuj.’ Nge celë hi matre eni a hëne la itre ka ngazo, ngo tha itre ka meköti kö.”
14 Thupene lai, hna traqa koi Iesu hnene la itretre drei Ioane troa hnying, me hape: “Hnauëne laka, eahuni me itre Faresaio a tha xen, nge tha hane kö kuca tun hnei itretre drei nyipë?”
15 Nge Iesu a sa koi angatr ka hape: “Hapeu, tro kö la itre sinee ne la atre faipoipo a hleuhleu nge ce angatre pala kö memine la atre faipoipo? Ngo tro kö a traqa la drai ne troa xomi angeic qaathei angatr, nge e cili hi la ijine tro angatr a tha xen.
16 Pëkö atr ka cane la sine imaano ka hnyipixe hune la iheetre hnapan, ke wanga tha zezene pi hnene lai ka hnyipixe, nge troa tru catre la hna azezenyin.
17 Ketre tune mina fe kowe la waina ka hnyipixe, pëkö atr ka troa amë ej hnine la trengene* hnapan, ke e troa tun, tro ha kaqa lai trengen, me neni la waina, nge luzi pë lo trengen. Ngo itre atr pe a amë la waina ka hnyipixe hnine la trengene ka hnyipixe, matre isa loi lue ej.”
18 Iesu petre kö a ithanatane lai, nge hanawang! Kola easenyi nyidrë hnene la ketre tan, me atrunyi* nyidrëti me hape: “Ekölö ma meci jë hë la nekönge la, ngo trohemi, matre tro nyipëti a pane ati ime hui nyëne matre mele hmaca jë nyën.”
19 Ame hnei Iesu me itretre drei i nyidrë hna ce mejë me xötrethenge angeic.
20 Nge hanawang! Kola easenyi Iesu qa hutrö hnene la ketre föe, nge akötre la mele i eahlo, ke traqa ha koi 12 lao macatre ne neni la hni eahlo. Ame hnei eahlo hna ketre ju la pune iheetre i Iesu,
21 ke öni eahlo: “Maine tro hi ni a nango ketr la ipune iheetre i nyidrë, tro hë ni lai a mel.”
22 Ame la Iesu a xei hutrö, öhnyi eahlo ju hi hnei nyidrë. Öni nyidrëti jë hi ka hape: “Neköng, catre pi! Mele hë hmunë hnene la lapaune i hmunë.” Matre, ame ju fe kö la hawa cili, loi ju hi la meci eahlo.
23 Haawe, ame hë la Iesu a lö hnine la hnalapa ne lo lai tan, öhne jë hi nyidrëti lo itre ka elone la itre miuzik* ne qejeqeje wezipo, memine la ka ala nyimu a kola nyi mejen,
24 matre öni Iesu jë hi koi angatr ka hape: “Pane lö pi epun, ke tha meci kö la nekö jajiny, nyëne hi la a meköl.” Ame hnei angatr hna hnyimasai Iesu.
25 Ngo thupene ju hi la angatr a lö qa lai, Iesu a lö jë kowe la hnahage me ea catrëne la ime ne la nekö jajiny, ene pe, mejë jë hi nyën.
26 Nge hna iqajakeune la ewekë cili ngöne la nöj asë.
27 Haawe, ame hë la Iesu a tro qa lai, hna xötrethenge nyidrë hnene la lue timek, nge nyidroti a sue ju me hape: “Nekö i Dravita fe, epi utipi nyio ju.”
28 Nge thupene la Iesu a lö hnine la ketre uma, hna easenyi nyidrë hnene lo lue timek. Ame hnei Iesu hna hnyinge me hape: “Lapaune kö epone laka, atreine hi ni troa kuca la ewekë cili?” Ame hnei nyidroti hna sa ka hape: “Öö, ka lapaune nyio Joxu.”
29 Iesu a ketre ju la alameke i nyidro, me hape: “Qa ngöne la lapaune i epon, tro ha eatre la aja i epon.”
30 Ame hna fe pi la lue meke i nyidro, nge Iesu a qaja ju koi nyidro ka hape: “Wange pala kö, ke atre jë hnei ketre.”
31 Ngo lö pi hi nyidroti qa lai a ithanata nyidrë ngöne la nöj asë.
32 Ame hë la angatr a tro qa lai, hanawang! Kola tro fë koi Iesu la ketre trahmanyi ka hum, ke hna löth hnei dremoni.
33 Nge thupene la hna helëne la dremoni, ithanata ju hi lai hum. Matre, kola hain hnene la ka ala nyimu, me hape: “Eahuni petre hi a hane öhne la ketre ewekë ka tun e Isaraela.”
34 Ngo önine la itre Faresaio ka hape: “Angeice lai a helëne la itre dremoni jëne la tane la itre dremoni.”
35 Nge Iesu a tro kowe la itre traon me itre hunahmi trootro, me hamë ini ngöne la itre sunago, me cainöjëne la maca ka loi ne la Baselaia, me aloine la nöjei pengöne meci asë ne la itre atr.
36 Nge ame la Iesu a öhne la itre atr, nyidrëti a utipi angatre ju, ke ceitu i angatr me itre mamoe ka pë atre thupën.
37 Matre, öni nyidrëti jë hi kowe la itretre dreng: “Eje hi, tru catre la nyine menuën, ngo xalaithe hi la itretre menu.
38 Matre, sipone jë kowe la Maseta troa pane upe la itre xa atr kowe la huliwa cili.”
Itre mekun ecahu fen
^ Maine, “saath aqeany hune la laulau.”
^ Hna kuca hnei kupeine öni.
^ Maine, “thil.”
^ Kolo itre ka ufi trutru nyine elo miuzik.
