Roma 1:1-32
1 Paulo hlue i Iesu Keriso, nge hna iën troa aposetolo me acile troa tro fë trongëne la maca ka loi i Akötresie.
2 Jëne la itre perofeta, ase hë Akötresie qaja amë hnine la itre Hna Cinyihane ka hmitrötr
3 la itre ithuemacanyi göne la Nekö i nyidrë laka, tro ha hnaho nyën, nge tro nyën a xulu qaathene la matra* i Dravita.
4 Ngo ame pe, hna anyipicine laka, Nekö i Akötresieti hi lai, ke jëne la mene ne la uati hmitrötr, hna amele nyidrëti hmaca. Haawe, Iesu Keriso hi lai, Joxu së.
5 Nge jëne nyidrë, easë a kapa la ihnimi gufa me hnëqa ne aposetolo, matre tro la nöjei nöj a drengethenge pine la lapaun, me metrötrëne la ëje i nyidrë.
6 Nge nyipine la itre nöje cili, hna hane hë nyipunieti fe troa itre atre i Iesu Keriso.
7 Haawe, koi nyipunie angetre Roma, itre hnimina i Akötresie, itre hna iën troa hmitrötr:
Epi tro nyipunieti a kapa la ihnimi gufa me tingetinge qaathei Akötresie Keme së, me Iesu Keriso Joxu së.
8 Eje hi, eni a pane olene koi Akötresie jëne Iesu Keriso pi nyipunie, ke kola hlemu loi la etrune la lapaun i nyipunie ngöne la fene hnengödrai asë.
9 Nge öhne hi la Akötresie hnenge hna nyihluen cememine la hni ka pexej, nge thenge la maca ka loi göi nekö i nyidrë, ka hape, eni pala hi a thithi sai nyipunie,
10 me sipon, maine aja i nyidrë, tro hmaca ni a tro koi nyipunie.
11 Ke tru catre la ajange troa iöhnyi me nyipunie me xatuane la lapaune i nyipunie, matre tro nyipunie a catre huliwa koi Akötresie,
12 ngo loi e tro sa itö ithuecatrekeu qa ngöne la isa lapaune së, lapauneng me lapaune i nyipunieti mina fe.
13 Itre trejin, loi e tro nyipunie a atre laka, anyimua thele ni troa wai nyipunie, ngo hna sewe ni uti pala hi enehila. Ngo kolo hi matre, mama pi thei nyipunie la itre thangane la hnenge hna cainöj e cili, tune la aqane mama ngöne la itre xa nöj.
14 Nge eje hi, hetre gufang koi angetre Geres me itre trenyiwa,* koi itre ka inamacan me itre hmo.
15 Celë hi matre, atraqatre la ajange troa cainöjëne la maca ka loi koi nyipunieti fe e celë e Roma.
16 Nge tha hmahmane kö ni la maca ka loi, ke celë hi jëne iamele qaathei Akötresie thatraqane la itretre lapaun, hna nyiqaane thei angetre Iudra, nge thupene lai, koi angetre Geres.
17 Ke kola mama cile la thiina ka meköti i Akötresie jëne la lapaune kowe la itretre lapaun, nge kolo hi a ihmeku memine lo hna cinyihane ka hape: “Tro la atre ka meköt a mel hnene la lapaun.”
18 Nge qaa hnengödrai, Akötresieti a amamane la elëhni i nyidrë kowe la itre ka xele ma drengethenge nyidrë, me itretre thiina ka tha meköti kö. Angatr a kuca la itre ewekë ka tha meköti kö matre thingi jëne la itre atr troa atre la nyipici.
19 Ngo maine ju, tro hi angatr a atrepengöi nyidrë, ke nyimutre hë la itre ewekë hnei nyidrëti hna amamane koi angatr.
20 Eje hi, kola mama cile la itre thiina i nyidrë qaane lo kola xupe la fen, ke itre ej a mama jëne la itre ewekë hna xup, laka, nyidrëti hi la nyipi Akötresie, nge atraqatre la mene i nyidrë. Haawe, thatreine hmaca kö angatre qaja ka hape, “thatre nyidrëti kö hun.”
21 Nge ngacama atre Akötresieti ju hë angatr, ngo tha angatre kö a atrunyi nyidrë me olene koi nyidrë. Nge menu hë la aqane waiewekë i angatr, nge miti hë la itre hni angatre ka menu.
22 Matre, maine selëne ju hë angatre la inamacane i angatr, ngo hmo hë angatr,
23 ke pi tro kö angatr a atrune la itre ewekë ka nyihatrene la itre atr ka troa hnyiqetr, me itre waco, me itre öni ka foa lao wacan, me itre öni ka wewë, hune la troa atrune la Akötresie ka tha tro kö a hane hnyiqetr.
24 Celë hi matre hnei Akötresieti hna nue angatr kowe la itre aja ne la hni angatr, itre aja ka sis, matre ahmahmane la isa ngönetrei angatr.
25 Nge angatr a nyihnane la nyipici i Akötresie troa hnine la thoi, me thil* me atrune la ewekë hna xup hune la Atre Xup, lo nyine atrun epine palua. Amen.
26 Celë hi kepin, matre Akötresieti a nue angatre pi kowe la itre aja ka sis, ke itre föe thei angatr a xelene troa ce meköl me trahmany, matre kuca la ewekë nyine hmahmane me itre föe. Ngo eje hi laka, tha hna xupi angatre kö tune lai hnei Akötresie.
27 Nge ame la itre trahmany, tha ajane hmaca kö angatr troa ce meköl me itre föe. Ngo angatre a meci hnei pi kuca la nyine hmahmane me itre trahmany. Haawe, qa ngöne laka, angatr a kuca catrëne la ewekë ka sis, angatre hë a xeni pune* la menu i angatr.
28 Nge pine laka, tha ka nyipiewekë kö koi angatre troa atrepengöi Akötresieti hnyawa,* nyidrëti a nue angatre pi kowe la itre mekuna i angatre ka sis, matre kuca la itre ewekë hna methinëne hnei nyidrë.
29 Nge tiqa ha angatr hnei ewekë ka tha meköti kö, me thiina ka qali, me piin, me ngazo, me meciun, me ihumuth, me iwesitrë, me mele thoi, me iangazo, me iqej,
30 nge angatr a silitrengathoi ketre, me methinë Akötresie, me nyi tru, me pi tru, me pi draië, nge angatre la itretre eköthe la ngazo, me tha drei keme me thin,
31 nge ka pë trotrohnin, me pë nyipici kowe la hna sisiny, nge goi pë fe ihnimi angatr kowe la itre atrene la hnalapa i angatr, me pë utipin.
32 Haawe, ngacama atre hnyawa hi angatre la hna amekötin hnei Akötresie, ene laka, meci la pun kowe la itre ka ujë tun, ngo angatre kö a kuca catrëne me kapa la itre ka ujë tun.
Itre mekun ecahu fen
^ Ger., “itin.”
^ Maine, “tha angetre Geres.” Ger., “angetre fen.”
^ Maine, “nyihluen.”
^ Maine, “thangan.”
^ Maine, “tha ajane kö angatre troa qale catre koi Akötresie thenge la nyipi atrehmekun.”
