Roma 10:1-21
10 Ange trejin, ame la aja ka ej e kuhu hning me itre xëwenge koi Akötresie, tre thatraqai angatr, matre tro angatr a hane mel.
2 Nge eni a anyipicine göi angatr ka hape, angatr a catre huliwa koi Akötresie, ngo tha thenge kö la nyipi atrehmekun.
3 Ngazo pe, tha hnei angatre kö hna thele troa atre la ka meköti koi Akötresie, ngo angatre kö a sipu iëne la ka meköti koi angatr, matre tha trongëne hë angatre la meköt i Akötresie.
4 Ketre, Keriso la ka nyipune la Wathebo, matre ame la nöjei atr ka amamane la lapaune i angatr, ijiji angatre fe troa hane meköt.
5 Nge hnei Mose mina fe hna cinyihane ka hape, ame la atre kuca la meköt thenge la hna qaja hnine la Wathebo, tro hë angeic a mel.
6 Ngo önine pe la itre hna Cinyihan ka hape, tro ha jelemekötine la atr hnene la lapaun. Ke hna cinyihane ka hape, “The qaja kö e kuhu hni eö, ‘Drei la atre elë hnengödrai?’ Kola hape, Drei la atre elë hnengödrai troa autinyi Iesu?
7 Maine pena: ‘Drei la atre uti kowe la hnaop ka jui nge ka thatrehmekun?’ Kola hape, Drei la atre uti kowe la mec matre abëekë Keriso?”
8 Ngo nemene la hna qaja hnene la Trengewekë i Akötresie? “Ezi nyipunieti hë la maca, nge eje hë ngöne la itre ineqë i nyipunie, me itre hni i nyipunie.” Nge celë hi “maca” ne lapaun hne huni hna tro fë.
9 Haawe, maine tro fe nyipunie a qaja trongëne ka hape, Joxu hë Iesu, nge maine tro nyipunie a lapaune qa kuhu hni laka, ase hë Akötresie amele Iesu hmaca, tro hë nyipunieti a hane mel.
10 Ke eje hi, maine tro la ketre atr a ajane troa jelemeköti angeic, nyipiewekë tro angeic a amamane la lapaune i angeic qa kuhu hni, nge maine aja i angeice troa mel, nyipiewekë tro angeic a qaja trongëne la maca hnene la që i angeic.
11 Nge hna cinyihane lo ka hape: “Tha tro kö a hmahma la atre lapaune koi nyidrë.”
12 Ke ceitune hi la angetre Iudra me angetre Geres. Nge casi hi la Joxu, atre hamë manathithi atrunyi kowe la nöjei atre hë nyidrë.
13 Ke “tro ha amelene la nöjei atre ka hëne la ëje Iehova.”*
14 Ngo hapeu, tro angatr a hë nyidrëti tune kaa e tha pane lapaune kö angatre koi nyidrë? Nge tro angatr a lapaune tune kaa kowe la hnei angatre hna thatre? Nge tro angatr a atre tune kaa e pëkö ka cainöj?
15 Nge tro angatr a cainöje tune kaa e tha hna pane upi angatre kö? Ke hna cinyihane lo ka hape: “Mingöminge la lue waca ne la itretre tro fë maca ka loi!”
16 Ngazo pe, tha hnei angatr asë kö hna kapa* la maca ka loi. Ke öni Isaia lo ka hape: “Iehova* fe, drei la atre lapaune kowe la itre ewekë hne huni hna qaja?”
17 Haawe, ame la lapaun, tre ka xulu qa ngöne la hna dreng. Nge ame la ewekë hna dreng, tre, itre ithanata göi Keriso.
18 Ngo eni pe a hnyinge ka hape, hane jë fe kö angatre drenge lai? Eje hi, ke kola mexemi la maca cili e cailo fen, nge goi mexeme fe ngöne la itre götrane gaa nanyi catr.
19 Ngo eni hmaca kö a hnyinge ka hape, hane jë fe kö Isaraela drenge la maca cili? Hnei Mose lo hna pane qaja ka hape: “Tro ni a amejëne la zalu i nyipunie jëne la itre atrene la itre xa nöj. Nge jëne la ketre nöje ka hmo, tro ni a aelëhni nyipunie.”
20 Nge goi qaja catrëne fe Isaia ka hape: “Hna öhnyi ni hnene la itre atre ka tha thele ni, nge hnenge hna mama kowe la itre ka tha hë ni.”
21 Ngo öni angeice göi Isaraela ka hape: “O drai ka pexej, eni a sathe la imenge kowe la nöj ka tha idrei nge ka catre që.”
