Roma 11:1-36
11 Haawe, eni a pi hnyingëne ka hape, hnei Akötresieti kö hna nuetrije la nöje i nyidrë? Pëkö, ke atre Isaraela fe hi ni, nge matra* i Aberahama qa ngöne la lapa i Beniamina.
2 Matre tha hnei Akötresieti kö hna nuetrije la nöje i nyidrë, lo hnei nyidrëti hna pane wangatrun. Hapeu, thatre kö nyipunie lo hna qaja hnine la hna cinyihan göi Elia lo angeic a hë Akötresie pi Isaraela?
3 Öni angeice lo: “Iehova* fe, hnei angatre hna humuthe la itre perofeta i nyipë, me thëtrije la itre ita ne huuje i nyipë, nge enehila, eni casi pe hi, nge angatr a thele troa humuthi ni.”*
4 Matre nemene lo hnei Akötresieti hna sa koi angeic? “Ala 7 000 lao hlueng ka tha hane kö sa iwatingöne ca koi Baala.”
5 Haawe, enehila mina fe, hetrenyi la ketre munën hna iëne pine la ihnimi gufa.
6 Matre, maine hna ië angatr pine la ihnimi gufa, haawe, tha hna iëne kö pine la huliwa, ke maine hna iëne ju pine la huliwa, tha ihnimi gufa hmaca kö lai.
7 Matre nemene ju hë? Ame lo ewekë hnei Isaraela hna thele catrën, tha hnei angatr asë kö hna kapa, ngo hna kapa pe hnene la itre hna iën. Nge ame pë hë la itre xan, xele kö angatre ma dreng.
8 Nge celë hi hna qaja hnene la hna cinyihan, lo kola hape: “Uti pala hi enehila, hnei Akötresieti hna kuca matre tro angatr a tune la itre ka hmulizië, me hamë angatre la itre alameke ka tha öhne koilo, me itre hnangenyë ka sim.”
9 Nge hnei Dravita mina fe hna qaja ka hape: “Nue pi matre thethi angatre kö la itre laulau i angatr, nge matre tro lai a ketre ewekë nyine akeinyi angatr, me ahnëjinë angatr.
10 Ketre, nue pi matre miti ju la itre luemeke i angatr, matre tha tro kö angatr a öhne koilo, nge kuca ju matre tro pala hi angatr a wenini.”
11 Celë hi matre eni a pi hnyingëne ka hape, hna wali angatre kö matre kei hnyawa pi angatr? Pëkö! Ngo qa ngöne laka, tro tria ha angatr, hetre iamele jë hi kowe la itre atre ne fen, matre cia jë la aja thene la angetre Isaraela.
12 Nge enehila, maine kola atrenamone la fen hnene la itre tria i angatr, nge kola atrenamone la itre atre ne fen ngacama ala xalaithe hi angatr, haawe, the qaja pala ha la itre manathith e pexeje pi la etru i angatr.
13 Ngo enehila, eni a ithanata koi nyipunie itre atre ne fen. Pine laka, eni la ketre aposetolo hna upe kowe la itre xa nöj, eni a wangatrune* la huliwang,
14 nge eni fe a thelejëne troa aciane la zalu thene la itre atrene la nöjeng, matre amelene la itre xan e angatr.
15 Ke maine pine la hna triji angatr kola aijijëne la itre atre ne fen troa iloi me Akötresie, nga nemene jë la thangan elanyi e kepe angatre hmaca jë? Tro ha tune la kola mele hmaca qa hna mec.
16 Nge hanawang, maine ka hmitrötre la hnepe farin hna jeköth nyine pane wen, haawe, hmitrötr asë hi lai farin; nge maine ka hmitrötr la itre iwaan, tro fe a hane hmitrötre la itre wapicin.
17 Ngo maine hna hutra la itre xa picine Elaio* hna traan, nge nyipunie la ketre Elaio ne hnitr hna acasin memine lai hna traan, tro hë nyipunie a kepe eloine la sian qa ngöne la itre iwaan.
18 Haawe, the pi tru kö kowe la itre nyipi picin. Ke maine tro nyipunieti a pi tru koi angatr, mekune pala kö, tha nyipunieti kö la ka thue ane la itre iwaan, ngo iwaane pe la ka thue a i nyipunie.
19 Maine jë, tro nyipunie a qaja ka hape: “Hna hutra la itre nyipi picin göi troa ami ni.”
20 Nyipici hi, ke pine la pë lapaune i angatr, hna hutri angatr, ngo ame nyipunie, nyipunieti a cil hnene la lapaun. Haawe, the pi tru kö, ngo wai nyipunieti pala kö.
21 Ke maine hnei Akötresie hna hutratrije la itre nyipi picin, ketre ijije fe tro nyidrëti a hutratriji nyipunie.
22 Pane mekune jë la aqane lolo i Akötresie me aqane ameköti ewekë i nyidrë. Nyidrëti a elëhni kowe la itre ka tria, ngo ka lolo nyidrë koi nyipunie. Nge tro pala hi nyidrëti a lolo, e tro nyipunie a kuca la itre ewekë hna kapa hnei nyidrë, ngo maine tha eje kö, tro ha satriji nyipunie.
23 Nge tune mina fe, maine tro angatre hmaca a lapaun, tro ha acatrenyi angatr, ke atreine hi Akötresie acatrenyi angatre hmaca.
24 Ke maine hna xomi nyipunie qa ngöne la Elaio ne hnitr, me ce acasi nyipunie memine lai hna traan, nga the qaja pala ha e acatrene hmaca jë la itre nyipi picin!
25 Nyipici itre trejin, tha ajange kö tro nyipunieti a thatre la ewekë ka hmitrötr nge hna juetrën, matre tha tro kö nyipunieti a mekune ka hape, ka inamacane nyipunie. Haawe, ame lai ewekë hna juetrën tre: hnene la itre xa angetre Isaraela hna thinge la itre hni angatr, uti hë pexeje la etrune la itre hna iëne qa ngöne la itre xa nöj.
26 Nge qa ngöne lai, tro ha amele Isaraela, tune lo hna cinyihane ka hape: “Tro ha traqa la atre iamele qa Ziona, me ananyine qaathei Iakobo la itre huliwa ka ngazo.
27 Nge celë hi isisinyikeung me angatr göne la ijine tro ni a köletrije la itre ngazo i angatr.”
28 Nyipici, pine la maca ka loi, itre ithupëjia angatr, nge nyine loi lai koi nyipunie. Ngo hna iëne la itre xan e angatr, matre itre hnimina angatr pine la itre qaaqaa i angatr.
29 Ke e mekune hë Akötresie troa nyi ahnahna me ihë, tha tro kö nyidrëti a hace pin e thupen.
30 Ame ekö, tha ka drengethenge Akötresieti kö nyipunie, ngo enehila, nyidrëti a utipi nyipunie ke hna tha idrei hnei angetre Isaraela.
31 Haawe, nyidrëti a utipi nyipunie pine la hnei angatr hna tha idrei, ngo ame la thangan elany, tre tro fe Akötresieti a hane utipine la angetre Iudra.
32 Nge hnei Akötresie hna xome ceitunë angatr me itre hna akalabusin pine la tha idrei i angatr. Ngo kola traqa tun, matre mama pi koi angatr asë la utipine i nyidrë.
33 Nyipici, ka pë sane la manathith,* me inamacan, me ini hna kapa qaathei Akötresie! Pëkö ka trotrohnine la itre iameköti nyidrë! Nge pë fe kö ka hane öhn la etrune la itre huliwa i nyidrë!
34 Ke “drei la ka atreine trotrohnine la mekuna i Iehova?* Maine drei la atre eamo nyidrë?”
35 Maine, “Drei la atre hamë ewekë koi nyidrë matre hetre gufa i nyidrëti jë?”
36 Ke qaathei nyidrë, nge jëne nyidrë, nge thatraqai nyidrë la nöjei ewekë asë. Haawe, epi tro pala hi a atrunyi nyidrë. Amen.
Itre mekun ecahu fen
^ Ger., “itin.”
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, “qajaloin.”
^ Maine, “Oliv.”
^ Ger., “ ‘ejuine la trenamo.’ Kola qaja la itre ini ka tru qaathei Akötresie.”
^ Wange ju la HQP.
