Roma 12:1-21
12 Qa ngöne lai, eni a sipone iele nyipunie ange trejin, thenge la utipine i Akötresie troa tro fë la itre ngönetrei nyipunie kösë huuje ka mel, nge ka hmitrötr, nge hna kapa hnei nyidrë. Haawe nyihlue i Akötresieti jë cememine la mekune ka pexej.
2 Nge loi ju hë hna mele thenge la itre thiina ne la fene celë,* ngo saze pi hnene la hna ahnyipixene la aqane mekun i nyipunie, matre tro hë nyipunieti a isa tupathe la aja i Akötresie laka, ka lolo, nge ka iamadrinë, nge ka pexej.
3 Nge pine la ihnimi gufa hna hamëne* koi ni, eni hë a qaja koi nyipunie isa ala cas ka hape, the tro kö nyipunieti a sipu wangatrunyi nyipunie, ngo tuluthe ju la aqane troa sipu waipengöi nyipunie, thenge la etrune la lapaun hna isa hamëne hnei Akötresie.
4 Ke tune la ngönetrei, nyimutre la itre hnepe igötranen, nge isa hetre huliwa ne itre ej,
5 haawe, tu së mina fe, ngacama ala nyimu së, ngo casi hë së me Keriso, nge easë la itre hnepe ngönetrei hna iacasinekeun.
6 Qa ngöne lai, hne së hna kapa la itre ahnahna ka isapengön thenge la ihnimi gufa hna isa hamë së. Nge maine hna aijijë së troa perofeta, haawe, perofeta jë së thenge la etrune la lapaune hna hamën.
7 Nge maine hna aijijë së troa ixatua, haawe, loi e tro pala hi së a catre ixatua. Nge maine hna aijijë së troa hamë ini, haawe, loi e tro pala hi së a catre hamë ini.
8 Nge ame la atre ithuecatre, loi e tro pala hi angeic a ithuecatr,* nge ame la atre hamë ewekë, the sewe angeice kö. Nge ame la atre elemekene la ekalesia, nue angeice pi troa eatrëne hnyawa la hnëqa i angeic. Nge ame la atre iutipi, tro angeic a kuca lai cememine la madrin.
9 Loi e pëkö thoi ngöne la ihnimi nyipunie. Haawe, sisine jë la ngazo, nge hnine jë la loi.
10 Nge nyipiewekë troa ihnimikeu, tune la itre sipu trejin, me pa* troa metrötrë ketre.
11 Matre, huliwa jë, the genyi kö. Nue pi la uati hmitrötre troa aegöcatrenyi nyipunie, nge nyihlue i Iehova* jë.
12 Madrine jë ngöne la mejiun. Cile huti ju hnine la itupath, nge thithi jë the mano kö.
13 Ce thawa jë me ange ka hmitrötr thenge la hna isa ajane hnei angatr, nge the mano kö ikep.
14 Nge catre jë amanathithine la itre ka axösisi nyipunie; amanathithine jë, ngo the ieji kö.
15 Ce madrine jë memine la itre ka madrin, nge ce treije jë memine la itre ka treij.
16 Nge wai itre xane ju tune la aqane tro nyipunieti a isa sipu waipengöi nyipunie. The thele kö troa pi draië, ngo ipië ju, matre tha tro kö nyipunieti a mekune ka hape, ka inamacane catre kö nyipunie.
17 The iatëkeune kö la ngazo, ngo wangatrune jë la ka loi koi* nöjei atr.
18 Nge isa isine jë troa mele tingetinge memine la itre atr.
19 The të kö la ngazo hna kuca koi nyipunie ange hnimina, ngo nue Akötresieti pi troa të la elëhni, ke hna cinyihane ka hape: “Qange troa të la ngazo, nge tro kö ni a nyithupen, öni Iehova.”*
20 “Ngo maine kola pi xeni la ithupëjia me nyipunie, thue a i angeice jë, nge maine angeic a pi ij, thue ime i angeice jë, ke e kuca tune hë nyipunie, kösë nyipunieti hi lai a atë la itre wanalepe ka mel hune la he* i angeic.”
21 Haawe, the nue kö la ngazo troa ngaa nyipunie, ngo catre pi pe nyipunieti ngaane la ngazo hnene la loi.
Itre mekun ecahu fen
^ Maine, “hneijin.” Wange ju la HQP.
^ Maine, “thawa.”
^ Maine, “eamo.”
^ Maine, “kuca xanën.”
^ Wange ju la HQP.
^ Maine, “qëmeken.”
^ Wange ju la HQP.
^ Ene la troa apujene la elëhni i ketre.
