Roma 13:1-14
13 Loi e tro la nöjei atr* a drengethenge la itre mus, ke pëkö mus ka cile nge tha hna nue hnei Akötresie. Nyipici, itre mus a cile thenge la aqane nue angatr hnei Akötresie ngöne la isa hnëqa i angatr.
2 Celë hi matre ame la atre icilekeu me mus, angeic a cile kowe la hna amekötine hnei Akötresie; nge ame la itre ka cile kowe ej, tro ha tranyi angatr.
3 Matre, itre ka kuca la ngazo a xouene la itre mus, ngo tha itre ka kuca la loi fe kö. Matre hapeu, aja i nyipunieti kö troa mel qa ngöne la xou cili? Haawe, catre jë nyipunie kuca la loi, nge tro hë angatr a qaja aloinyi nyipunie.
4 Nge ame la mus, celë hi hlue i Akötresie nyine loi koi nyipunie. Ngo maine nyipunieti a kuca la ngazo, xou ju, ke tha eje kö a cile fë menune la taua. Eje la hlue i Akötresie, atre elëhni me nyithupen kowe la ka kuca la ngazo.
5 Haawe, hetre nyipi kepin koi nyipunie troa idrengethenge, tha pine hmekuje kö la elëhni cili, ngo hnene fe laka, mekuthetheu* i nyipunie a jeleloine la aqane ujë cili.
6 Celë hi matre nyipunieti fe a kuiëne la manie hna athip; ke itre hlue i Akötresie la itre mus, nge hna acili itre ej thatraqane la huliwa cili.
7 Haawe, isa hamëne pi koi angatr la itre ewekë hnei angatre hna amekötin; ame kowe la atre athipi mani, hamëne pi; nge ame kowe la atre athipi thupen, nyi thupene ju; nge ame kowe la nyine xouen, xouene jë, nge ame kowe la nyine atrun, atrune jë.
8 Nge the sipone kö la hnei nyipunieti hna thatreine të hmaca, ngo ame la nyine troa kuca, tre ene la troa ihnimikeu, ke ame la atre hnime la atre lapa easenyi angeic, angeice hi la atre trongëne la Wathebo.
9 Nyipici, önine la trenge wathebo, “The nyixetë kö, the ihumuthi kö, the atrekënö kö, the piine kö.” Nge ame asë hi la itre xa wathebo, itre ej e hnine la trengewekë celë: “Qa i eö troa hnime la atre lapa easenyi eö, tui eö hi.”
10 Ke ame la ihnim, tre tha ka akötrëne kö la ka lapa easeny, ngo eje pe a eatrëne la wathebo.
11 Haawe, catre jë troa kuca lai, ke atre hë nyipunie la hneijin, hawa ha ne tro nyipunieti a hlë qa hna meköl, ke enehila, easenyi catre hë la iamele hune ekö lo easë a xötrei lapaun.
12 Nge ketre, hnenyipajidri hë, nge easenyi hë la lai. Qa ngöne lai, trije pi së la itre huliwa ne jidr, nge heetrëne jë la iheetre ne isi thatraqane la lai.
13 Ke maine easë a tro ngöne la lai, loi e tro sa tro hnyawa, ngo tha tro kö a kuci feete qenahmo, me hmo hnei ka haitr, me kuca la itre huliwa ka sis, me itre huliwa nyine hmahman,* me isi, me izalukeu.
14 Haawe, xötrethenge jë la tulu i Iesu Keriso Joxu, nge the thele jëne kö troa eatrëne la itre huliwa i ngönetrei.
Itre mekun ecahu fen
^ Maine, “u.” Ger., psy·kheʹ. Wange ju la HQP.
^ Wange ju la HQP.
^ Wange ju la HQP.
