Roma 14:1-23
14 Kapa hnyawa jë la atr kucakuca ngöne la lapaun, ngo tha göi tro kö a ameköti angeic pine la aqane waiewekë* i angeic.
2 Ke ame la ketre atr, hetre lapaune i angeic ka aijijë angeice troa xeni la nöjei pengöne xen, ngo ame kowe la ka tëtë lapaunen, angeice pe hi a xeni dröne sil.
3 Haawe, tha tro pi kö la atre xen a goeën amenyine la atre tha xen, nge the tro kö la ka tha xen a qajangazone la atre xen, ke hna kepe angeic hnei Akötresie.
4 Nge drei nyipunie matre troa qaja la ifekë hluen? Ke koi maseta i angeice hmekuj hi matre angeic a cile hut maine kei. Nyipici, tro ha acile huti angeic, ke atreine kö Iehova* acilë angeic.
5 Hetre itre atr ka mekune ka hape, sisitria kö la ketre drai hune la ketre; nge itre xane pena a mekune ka hape, ceitun asë hi la nöjei drai. Haawe, loi e xecie kowe la nöjei atr ka hape, meköti la hnei angatre hna isa mekun.
6 Matre ame la atre wangatrune la ketre drai, angeic a kuca lai koi Iehova.* Nge ame la atre xen, angeic a xen koi Iehova,* ke angeic a pane olene koi Akötresie. Nge ame la atre tha xen, angeic a kuca lai koi Iehova,* ke angeice fe a hane olene koi Akötresie.
7 Ngo eje hi laka, pëkö atr ka mel thatraqai angeice kö, ketre tun, pëkö atr ka mec thatraqai angeice kö.
8 Haawe, maine ka mele së, easë mel göi Iehova,* nge maine tro sa mec, easë a troa meci göi Iehova.* Qa ngöne lai, ka mele ju hë së maine mec, ngo easë a mele maine meci göi Iehova.*
9 Nge celë hi kepin matre hnei Keriso hna mec me mele hmaca, ke jëne lai, ijije tro nyidrëti a Joxu ne la itre ka mel, me ka mec.
10 Ngo hnauëne hö laka, nyipunie a qajangazone la trejine me nyipunie? Maine hnauëne la nyipunie a goeën amenyine la trejine me nyipunie? Nyipici, tro asë hi së a cile qëmekene la ita ne iameköti i Akötresie.
11 Nge hna cinyihane lo ka hape: “ ‘Loi e xecie hnyawa koi nyipunie laka, ka mele ni,’ öni Iehova,* ‘nge loi e tro fe a xecie hnyawa koi nyipunie ka hape, tro la nöjei atr a sa iwatingöne ca qëmekeng. Nge tro la nöjei atr a atrehmekune laka, eni hi la Akötresie.’ ”
12 Qa ngöne lai, tro asë hi së a isa qeje thiinan qëmeke i Akötresie.
13 Haawe loi ju hë hna iqej, ngo isine jë pe matre tha tro kö sa amë la ketre ewekë ka troa akeine la itre trejin, maine ketre ewekë qëmeke i angatr ka troa ajolëne la lapaune i angatr.
14 Nge pine laka, atre drei Iesu Joxu ni, atre hi ni ka hape, pëkö ewekë ka troa ngazo xan, ngo kola ngazo, ke hnene la atr hna mekune ka hape, ka ngazo lai, haawe, ngazo hë koi angeice la ewekë cili.
15 Maine nyipunieti a ahleuhleune la trejine me nyipunie hnene la ketre xen, tha nyipunieti hmaca kö lai a ihnim. Ngo the nue pi kö la itre a i nyipunie troa apatrene la ketre atr hnei Keriso hna meci pin.
16 Ketre, maine ka loi ju hë la hnei nyipunieti hna mekune troa kuca, ngo e hna qajangazon, the kuca kö.
17 Nge tha tro kö a sine la Baselaia i Akötresie hnei nyine xeni me nyine ij, ngo hnei thiina ka meköt, me tingeting, me madrin ngöne la uati hmitrötr.
18 Nge ame la atre nyihlue i Keriso tune lai, hna kepe angeic hnei Akötresie me itre atr.
19 Haawe, epi tro pala hi sa thele la itre ewekë ne tingeting, me itre ewekë nyine thuecatrene la itre xan.
20 Matre loi ju hë hna angazone la huliwa i Akötresie hnei itre xen. Maine nyipici laka, ka loi asë hi la nöjei pengöne xen, ngo hetre ngazo ne la atre xen, e hna akeinyi ketre.
21 Ka loi e tha tro kö a öni la ketre mitr, maine iji waina, maine kuca la ketre ewekë ka akeine la trejine me nyipunie.
22 Ngo ame la lapaune i nyipunie, isa melëne jë qëmeke i Akötresie. Haawe, manathithi la atre ka tha jelengazone la hnei angeice hna sipu kuca.
23 Nge maine tro ketre a nango luelue göi ketre xen, ngo xeni kö, ka hnëjine hë angeice lai, ke tha hnei angeice kö hna kuca thenge la lapaun. Ke nyipici, ame la nöjei ewekë hna kuca nge tha thenge kö la lapaun, ngazo lai.
Itre mekun ecahu fen
^ Maine jë, “itre hna lueluën.”
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
