Roma 15:1-33
15 Nge ame easë itre ka catre lapaun, qa së troa kapa la itre tria ne la itre ka nango kucakuca, ngo tha loi kö e tro hi sa thele loi koi së kö.
2 Haawe, loi e tro së a isa amadrinëne la atre lapa easenyi së, matre aegöcatrenyi angeic.
3 Ketre tui Keriso, tha hnei nyidrëti kö hna thele loi koi nyidrë, ngo tune lo hna cinyihane kola hape: “Ame lo aqane qaqa nyipë hnei itre atr, angatre fe a hane qaqa ni tun.”
4 Nyipici, ame la nöjei ewekë hna cinyihan ekö, tre hna cinyihan göi troa ini së. Matre, jëne la hne së hna cile huti memine la iakeukawanyi qa hnine la itre hna cinyihan, hetre mejiune së hë.
5 Ngo enehila, epi tro la Akötresie ka aijijë së troa cile hut me hamë së la iakeukawany, a xatua nyipunie troa atreine waiewekë tui Iesu Keriso.
6 Qa ngöne lai, tro hë nyipunieti a ce nine* atrune la Akötresie me Kem ne la Joxu së Iesu Keriso.
7 Haawe, loi e tro nyipunieti a itö ikep, tune lo aqane kepe nyipunie hnei Keriso matre atrunyi Akötresieti jë.
8 Ke eni a qaja hnyawa koi nyipunie laka, hnei Keriso hna nyihluene la itre hna xötrehatren pine la aqane nyipici i Akötresie. Celë hi matre, eatre jë lo itre ewekë hnei Akötresieti hna thingehnaeane kowe la itre qaaqaa i angatr.
9 Nge tro hë la itre nöj a atrunyi nyidrë pine la utipine i nyidrë koi angatr. Tro ha tune lo hna cinyihane ka hape: “Celë hi matre eni a pi atrunyi nyipë nyipine la nöjei nöj, me nyimane la itre nyima thatraqane la ëje i nyipë.”
10 Nge kolo fe a qaja ka hape: “Ce madrine jë itre nöj memine la nöje i nyidrë.”
11 Nge hna qaja fe ka hape: “Atrunyi Iehova* jë, nyipunie itre nöj, nge epi tro la nöjei atr asë a atrunyi nyidrë.”
12 Nge öni Isaia mina fe: “Hetre iwaane i Iese, nge tro la ketre a cia me musi kowe la itre nöj, nge tro la nöjei nöj a mejiune koi nyidrë.”
13 Haawe, epi tro Akötresie, atre hamë mejiune a atiqane la itre hni nyipunie hnei madrine me tingeting, ke nyipunie a mejiune koi nyidrë. Qa ngöne lai, tro ha catrecatre* la mejiune i nyipunie hnene la emene ne la uati hmitrötr.
14 Nge enehila itre trejin, ka xecie hnyawa koi ni ka hape, ka itreqe hnyawa nyipunie troa kuca la loi, nge tiqa ha nyipunie hnei atrehmekun, nge ijiji nyipunieti fe hë troa eamo* itre xan.
15 Ngo nyipici laka, eni a cinyihane la itre xa ewekë göi troa amexeje koi nyipunie. Eni a kuca tun, pine la ihnimi gufa hnenge hna kapa qaathei Akötresie
16 troa anyipici Keriso Iesu kowe la itre xa nöj. Eni a sine la ketre huliwa ka hmitrötr troa tro fë la maca ka loi i Akötresie. Qa ngöne lai, tro hë la itre nöje cili a tune la ketre huuje ka lolo, nge hna ahmitrötrën hnei uati hmitrötr.
17 Haawe, hetre kepin matre eni a madrin, ke atre drei Iesu Keriso ni, nge eni fe a kuca la huliwa i Akötresie.
18 Tha tro kö ni a qaja la itre huliwang. Ngo tro hi ni a ithanatane la itre huliwa hnei Keriso hna kuca jëne eni, matre tro la itre atre ne fen a drengethenge nyidrë. Hnei nyidrëti hna kuca lai, jëne la itre trengewekëng me aqane ujëng,
19 nge jëne la itre iamamanyikeu nyine hain me itre hatren, nge cememine la emene ne la uati hmitrötre i Akötresie; matre qaane Ierusalema uti hë la itre götran ne Iluriko, hnenge hna catre cainöjën la maca ka loi göi Keriso.
20 Ngo eje hi laka, hnenge hna thupëne hnyawa matre tha tro kö ni a cainöjëne la maca ka loi ngöne la itre götran hna qaja ha la ëje i Keriso, ke wanga xupe jë ni hune la trepene hna amë hnei ketre.
21 Nge hna cinyihane lo ka hape: “Ame koi itre atr hna tha qeje nyidrëti kow, tre tro angatr a goe, nge ame koi itre ka tha hane drei meje i nyidrë, tro angatr a trotrohnin.”
22 Nge celë hi kepin matre hna anyimua ajolë ni troa traqa koi nyipunie.
23 Ngo enehila, pë hë götran ngöne la nöje cili tha hnenge hna cainöjëne la maca ka loi, nge pine laka, nyimu* macatre ne pi tro hë ni koi nyipunie,
24 eni a ajane catrëne laka, ame hë la eni a tro Espany, tro fe ni a hane iöhnyi me nyipunie, me pane lapa, me ce madrine me nyipunie, nge tro hë nyipunie a nango ce tro me eni, me nue ni pe.
25 Ngo enehila, tro ni a pane tro Ierusalema matre troa ce huliwa memine la ange ka hmitrötr.
26 Ke atraqatre la madrinene la itre trejin e Makedonia me Akaia troa thawa la itre ewekë i angatr, matre ahnahna thatraqane la itre ka pë ewekë thene la ange ka hmitrötr e Ierusalema.
27 Nyipici, atraqatre la madrine i angatre troa kuca lai, ngo eje hi laka, hnëqa i angatre kö lai. Ke hnene la itre atre Iudra hna ce thawa me angatre la itre ewekë ka lolo hnei angatre hna kapa qaathei Akötresie. Nge enehila, hnëqa ne la itre atre ne fen troa xatuane la angetre Iudra matre hetrenyi jë la ka pë thei angatr.
28 Haawe, ame ju hi la eni a ase hamëne mekötine la itre ahnahna* cili koi angatr, tro hë ni a pane wai nyipunie la eni a tro Espany.
29 Nge atre hi ni laka, e traqa ha ni koi nyipunie, tro hë ni a traqa fë la wenge manathithi qaathei Keriso.
30 Ngo enehila itre trejin, jëne la Joxu së Iesu Keriso, nge pine la ihnim hna acian hnene la ua, eni a sipone iele nyipunie matre tro ni me nyipunie a ce thithi sai ni koi Akötresie,
31 matre tro ni a mel qa ngöne la ime ne la itre ka tha lapaun e Iudra. Nge matre troa kapa la huliwang e Ierusalema hnene la ange ka hmitrötr.
32 Thupene lai, maine aja i Akötresie, tro hë ni a traqa koi nyipunie fë la madrin, nge tro fe a hane ce akeukawanyi ni me nyipunie.
33 Haawe, epi tro la Akötresie, atre hamë tingeting a ce me nyipunieti asë. Amen.
Itre mekun ecahu fen
^ Ger., “që.”
^ Wange ju la HQP.
^ Maine, “atraqatr.”
^ Maine, “hamë ini.”
^ Maine jë, “itre hnepe.”
^ Ger., “wen.”
