Roma 16:1-27
16 Eni a upi Fibi koi nyipunie, ketre trejine föe ka catre huliwa ngöne lo ekalesia ne Kenikerea.
2 Nge pine laka, ange ka hmitrötr nyipunie, kepe angeice hnyawa ju pine la ëje i Joxu, nge xatua angeice jë e kola aja ixatua. Ke nyipici, ala nyimu la itre hnei angeice hna xatuan, nge eni fe la ketre.
3 Nge tro fë jë la ibozung koi Perisila me Akula, lue sine huliwange thei Iesu Keriso,
4 lue atre nue la mele i nyidro koi ni.* Nge tha eni casi kö la ka olene koi nyidro, ngo nöjei ekalesia i angetre fene fe.
5 Nge tro fë jë la ibozunge kowe la ekalesia ka icasikeu thei nyidro, nge tro fë jë la ibozung koi Epaineto hnenge hna hnim, ketre ne lo itre pane hlue i Keriso e Asia.
6 Nge tro fë jë la ibozung koi Maria, atre huliwa catre koi nyipunie.
7 Nge tro fë jë la ibozung koi Anedroniko me Iunia lue sineeng, lue hna ce akalabusine me eni, nge lue trahmanyi hna qaja aloine hnene la itre aposetolo, nge lue ka hekö hë huliwa koi Keriso hung.
8 Tro fë jë la ibozung koi Amepelia hnenge hna hnim, atre huliwa koi Joxu.
9 Tro fë jë la ibozung koi Ubano, trejine me easë göi Keriso, me Sataki hnenge hna hnim.
10 Tro fë jë la ibozung koi Apele, atre hna kapa hnei Keriso, me kowe la itre atrene la hnalapa i Arisobulo.
11 Tro fë jë la ibozung koi Herodiona sineeng, me kowe la hnalapa i Nakiso itre hlue i Joxu.
12 Nge tro fë jë la ibozung koi Trufaina me Trufosa lue föe ka huliwa catre koi Joxu, nge tro fë jë la ibozung koi Peresi hne së hna hnim, ke ketre föe ka huliwa catre koi Joxu.
13 Nge tro fë jë la ibozung koi Rufo, ketre hna iën koi Joxu, me thine i angeic hnenge hna xome ceitu me thineng.
14 Nge tro fë jë la ibozung koi Asungerito, me Felegona, me Herema, me Pateroba, me Hereme, me itre trejin ka ce me angatr.
15 Nge tro fë jë la ibozung koi Filologo, me Iulia, me Nerea me xa i angeic, me Olumepa, me ange ka hmitrötr thei angatr.
16 Nge ibozu jë nyipunie nge itö idremi* jë. Itre ekalesia i Keriso e cailo fen a upe la ihnimi angatre koi nyipunie.
17 Nge enehila, eni a iele nyipunie itre trejin troa hmekëne la itre ka thi lapa, me itre ka iakeiny, nge ka cil kowe la itre ini hnei nyipunieti hna kapa. Haawe, ananyine pi la itre ewekë cili.
18 Ke ame la itre ka kuca la itre ewekë cili, itre hlue hë angatr. Tha itre hluene kö la Joxu së Keriso, ngo angatre pe a nyihluene la itre aja i ngönetrei ka ngazo. Nge jëne la itre trenge ithanata ka iahmo me ka iaö, angatr a ahmalane la hni ne la itretre mejiune menun.
19 Ngo eje hi laka, atre hë la nöjei atr la aqane idrengethenge i nyipunie. Celë hi matre eni a madrine koi nyipunie. Ngo ajange tro nyipunieti a inamacane göne la itre ewekë ka loi, nge troa lapa pë ethane göne la itre ewekë ka ngazo.
20 Nge ame koi Akötresie, atre hamëne la tingeting, easenyi hë matre tro nyidrëti a wajahuji Satana fene la lue ca i nyipunie. Haawe, epi tro pala hi a lapa thei nyipunieti la ihnimi gufa i Iesu Joxu së.
21 Timoteo sine huliwang, a ibozu me nyipunie, me Lukio, me lasona, me Sosipatero, itre sineeng.
22 Nge eni, Teretio, atre cinyihane la tusi celë, a ibozu me nyipunie ngöne la ëje i Joxu.
23 Nge Gaio fe, atre kepe ni memine la ekalesia ngöne la uma i angeic, a ibozu me nyipunie. Nge tui Eraseto fe, atre thupë manien la traon, me Karato trejine me angeic.
24 —
25 Matre ame la maca ka loi hnenge hna cainöjën, memine la maca göi Iesu Keriso, lue eje lai a amamane hnyawa ka hape, atreine hi Akötresie acatrenyi nyipunie. Nge ka ce tro hi la maca ka loi cili memine la hne së hna trotrohnin göne lo maca ka hmitrötr nge hna juetrën, ene lo hnei Akötresie hna amamane koi së. Nyipici, hna pane juetrëne lai maca cili koi nyimu macatre,
26 ngo mama ha enehila, nge ase hë qaja amamane fe kowe la nöjei nöj jëne la itre hna perofetan, thenge lo hna amekötin hnene la Akötresie ka epine palua. Qa ngöne lai, ijije hë tro la itre nöj a amamane la lapaun i angatr me drengethenge nyidrë.
27 Haawe ka pë sane la inamacane i Akötresie, matre epi tro pala hi sa atrunyi nyidrë jëne Iesu Keriso epine palua. Amen.
Itre mekun ecahu fen
^ Maine, “u.” Ger., psy·kheʹ. Wange ju la HQP.
^ Ger., “idrem ka hetre ehmitrötren.”
