Roma 3:1-31
3 Nemene la eloine e troa atre Iudra, maine troa xötrehatren?
2 Nyimu eloin. Ame la hnapan, tre, hna ahnithe koi angatre la itre hna amekötine ka hmitrötre i Akötresie.
3 Matre, nemene ju hë e tha lapaune kö la itre xa angetre Iudra? Kolo kö lai a hape, tha ijije hmaca kö tro la itre atr a lapaune koi Akötresie ke tha lapaune kö la angetre Iudra?
4 Pëkö! Ngo epi nyipici pala hi Akötresie ngacama ka thoi la nöjei atr, tune lo hna cinyihane ka hape: “Matre mama cile pi qa ngöne la itre trengewekë i nyipë ka hape, ka nyipici nyipë, nge e traqa ju angatre upezö nyipë, tro nyipëti a amamane ka hape, itre ka thoi angatr.”
5 Ngo ame la easë a kuca la ngazo, itre atr a atrehmekune ka hape, ka meköti Akötresie. Ngo hapeu, kolo kö lai a hape, tha tro kö Akötresieti a meköt ngöne la ijine tro nyidrëti a ameköti së? (Celë hi mekuna ne la itre xan.)
6 Pëkö! Ka meköti pala hi Akötresie. Ke maine tha ka meköti ju nyidrë, tro nyidrëti a amekötine tune kaa la fen?
7 Ngo maine eni a thoi, nge pine la thoing kola mama cil koi nöjei atr laka, ka nyipici la itre trengewekë i Akötresie, nge angatr a thili koi nyidrë, nga hnauëne hö laka, tro Akötresieti a jelengazo ni?
8 Nge tune kaa e tro huni a qaja tune lo itre ka nyizö huni ka hape, “Loi e troa kuca la ngazo matre kepe loi pi së?” Iameköti la pun kowe la itre atre cili.
9 Nge nemene ju hë? Ka loi kö së hui angatr? Pëkö! Ke tune lo hne së hë hna qaja, itre atre ka ngazo asë hi la angetre Iudra me angetre Geres.
10 Nge kola ihmeku memine lo hna cinyihane ka hape: “Pëkö atre ka meköt, nge goi pë fe ala cas;
11 nge pë fe kö ala casi ka inamacan, nge pë fe kö ala casi ka thele Akötresie.
12 Hnene la nöjei atr hna jea nge luzi pë angatr asë, nge pëkö ka loi hni, nge goi pë fe ala cas.”
13 “Itre ineqë i angatr a tune la itre hua hna fe; nge angatre a iaö hnene la thineme i angatr.” “Hetre poizine i un hnine la itre ineqë i angatr.”
14 “Nge ka tiqa la itre trengewekë i angatr hnei ieji me trenge ithanata ka haitr.”
15 “Itre waca i angatr a nyinyape troa aneni madra.”
16 “Nge angatre pala hi a iangazo, me akötrëne la itre atr,
17 nge thatre kö angatre la jë ne tingeting.”
18 “Nge pëkö xoue Akötresie ngöne la luemeke i angatr.”
19 Nge atre hë së laka, ame la nöjei ewekë hna qaja hnine la Wathebo, tre thatraqane la itretre lapa fene la Wathebo, matre ahumune la nöjei ineqë asë. Qa ngöne lai, tro hë la fen a trene gufa koi Akötresie.
20 Haawe, pë fe kö ala cas* hna troa jelemekötine qëmeke i nyidrë pine la itre huliwa ne la wathebo, ke wathebo la atre qajaqaja la ngazo.
21 Nge tune lo hna qaja ha hnene la Wathebo me itre perofeta, mama cile hë enehila ka hape, ijije tro la ketre atr a meköt qëmeke i Akötresie, ngo tha hnei Trenge Wathebo kö.
22 Eje hi, kola mama la thiina ka meköti Akötresie qa ngöne la hna lapaune koi Iesu Keriso, nge thatraqai nöjei atr asë ka lapaun. Ke tha atre ië hna hnime kö Akötresie.
23 Itre ka ngazo asë hi la nöjei atr, matre tha ijiji angatre kö la lolo i Akötresie.
24 Haawe, ame la kola jelemeköti angatr, ahnahna lai hna hamëne gufan pine la ihnimi gufa, nge hna hamëne jëne la thupene mel hna të hnei Iesu Keriso.
25 Hnei Akötresieti hna xomi Iesu ceitu me huuj, matre tro la nöjei atr a iloi hmaca me nyidrë qa ngöne la hnei angatre hna lapaune kowe la madra i Keriso. Celë hi matre mama pi la thiina ka meköti nyidrë, ke ase hë nyidrëti lo köletrije la itre ngazo hna kuca ekö, ngöne lo ijine nyidrëti a xomihni.
26 Nge kolo fe a mama enehila la thiina ka meköti nyidrë, ngöne la nyidrëti a jelemekötine la atre lapaune koi Iesu.
27 Matre hapeu, ijije kö tro ketre a sipu selë angeic? Waea. Nemene la wathebo ka sewe angeic troa ujë tun? Hapeu, kolo kö lo wathebo ka amamane ka hape, ka nyipiewekë la hnei angeice hna kuca? Waea, ngo kolo wathebo ka upi angeice troa lapaun.
28 Ke atre hi së laka, kola jelemekötine la ketre atr hnene la lapaun, ngo tha hnene kö la itre huliwa ne la wathebo.
29 Hapeu, nyidrëti kö la Akötresi i angetre Iudra hmekuj? Maine nyidrëti fe la Akötresie ne la itre atre ne fen? Eje hi, nyidrëti fe la Akötresie ne la nöjei atre ne fen.
30 Nge pine laka, casi hi la Akötresie, tro hë nyidrëti a jelemekötine la itre hna xötrehatren pine la lapaune i angatr, nge tune mina fe kowe la itre tha hna xötrehatren, pine la lapaune i angatr.
31 Matre hapeu, easë kö a apatrene la Trenge Wathebo pine la lapaune së? Pëkö, ngo easë pe a acatren ej.
Itre mekun ecahu fen
^ Ger., “ngönetrei.”
