Roma 4:1-25
4 Qa ngöne lai, nemene hë la nyine tro sa qaja göi Aberahama qaaqaa së?
2 Maine hna jelemeköti Aberahama pine lo itre huliwa i nyidrë, hetre nyine tro nyidrëti a selëne qëmekene la itre atr, ngo tha qëmeke i Akötresieti kö.
3 Ngo nemene lo hna qaja hnine la itre hna cinyihan? “Hnei Aberahama hna lapaune koi Iehova,* nge hna jelemeköti angeic pine lai.”
4 Nyipici, ame la atre huliwa, tro angeice lai a kepe thupen, ngo tha ihnimi gufa kö lai, ke angeic a kapa la thupene* la huliwa i angeic.
5 Ngo tro ha jelemekötine la atre ka tha huliwa, ngo ka lapaune pe kowe la Atre jelemekötine la itre ka tha meköti kö.
6 Ka ihmeku memine lo aqane qejepengöne Dravita la madrine ka ej thene la hna jelemekötin hnei Akötresie, ngacama tha hna jelemekötine pine la itre huliwa i angeic. Öni Dravita:
7 “Madrine la itre atr hna nue ngazon, me itre hna köletriji ngazon.
8 Nge madrine la atre hnei Iehova* hna thëthëhmi ngazon.”
9 Matre hapeu, ame la manathithi cili, tre kowe la itre hna xötrehatrene hmekuje hi, maine kowe la itre tha hna xötrehatrene fe? Ke easë a qaja ka hape: “Hna jelemeköti Aberahama pine la lapaune i angeic.”
10 Nge tune kaa Aberahama lo kola jelemeköti nyidrë? Ase hë lo xötrehatrenyi nyidrë, maine tha ase petre kö? Eje hi, ame lo ijine cili, tha ase petre kö xötrehatrenyi nyidrë.
11 Matre hetre hatren* hnei nyidrëti hna kapa, ene la troa ixötrehatreny. Hatren la hna jelemeköti nyidrë pine la lapaun, ngacama tha hna xötrehatrenyi i nyidrëti petre kö. Qa ngöne lai, ijije tro nyidrëti a keme ne la itretre lapaun ngacama tha hna xötrehatrene kö, matre tro fe a hane jelemeköti angatr.
12 Haawe, nyidrëti hi la keme ne la itre matran hna xötrehatren, ngo tha itre hna xötrehatren hmekuje kö, ngo kowe fe la itretre trongëne me nyitipune la lapaune ne la keme së Aberahama, lo tha ase petre kö xötrehatrenyi nyidrë.
13 Ke tha hnene kö la wathebo matre kapa jë Aberahama me itre matra* i nyidrë lo hna thingehnaeane ka hape, tro angatr a kapa la fen,* ngo hnene hi la hna jelemeköti angatr pine la lapaun.
14 Ke maine tro hi a kapa lai hnene la itretre catre fë la wathebo, nga luzi pë hë la lapaun memine lo hna thingehnaean.
15 Eje hi, ame la wathebo, ej a axulune la elëhni i Akötresie, ngo maine pëkö wathebo, ketre pëkö ngazo.
16 Celë hi matre lapaun la ka nyipiewekë, ke kola mama la ihnimi gufa, nge jëne lai, tro asë hi la itre matra i Aberahama a kapa lo hna thingehnaean, tha itretre trongëne la wathebo hmekuje kö, ngo memine fe la itretre nyitipune la lapaune i Aberahama keme së asë.
17 (Kola tune lo hna cinyihane ka hape: “Hnenge hna ië eö troa keme ne la nöjei nöj asë.”) Nge ka eatre pala hi la itre ewekë hna thingehnaeane hnei Akötresie, matre hnei Aberahama hna lapaune koi nyidrë, ke hnei nyidrëti hna amelene hmaca la itre ka mec, me canga ithanatane la itre ewekë ka troa traqa* kösë eatre hë.
18 Haawe, hnei Aberahama hna mejiun me lapaun laka, tro kö nyidrëti a keme ne la itre nöj, ngacama ewekë lai hna thatreine mekun. Hnei nyidrëti hna mejiune kowe lo hna thingehnaeane ka hape: “Tro ha tune lai la itre matra i eö.”
19 Nge ngacama tha patre kö la mejiune i nyidrë, ngo ame lo ijine cili, hnei nyidrëti hna mekune ka hape, meci hë la ngönetrei nyidrë, ke 100 hë lao macatre i nyidrë, nge meci* fe hë la itrengene hnaho i Sara.
20 Ngo pine laka, ka lapaune Aberahama kowe la hna thingehnaeane hnei Akötresie, tha luelue kö nyidrë, ngo hnei nyidrëti pe hna catr hnene la lapaun, me atrunyi Akötresie.
21 Nge xecie hnyawa koi Aberahama laka, ame la nöjei ewekë hnei Akötresieti hna thingehnaean, tro kö nyidrëti a eatrën.
22 Qa ngöne lai, “hna jelemeköti Aberahama.”
23 Ngo eje hi laka, tha koi Aberahama hmekuje kö lo hna hape: “Hna jelemekötin,”
24 ngo koi easë mina fe, itre hnei Akötresieti hna jelemekötin pine la hne së hna lapaune kowe la Atre amele Iesu Joxu së qa hna mec.
25 Hna nue Iesu lo troa meci pine la itre ngazo së, nge hna amele nyidrëti hmaca matre troa jelemeköti së.
Itre mekun ecahu fen
^ Wange ju la HQP.
^ Maine, “gufa.”
^ Wange ju la HQP.
^ Maine, “nyine anyipicin.”
^ Ger., “itin.”
^ Maine, “fene ka hnyipixe.”
^ Maine jë, “axulune la itre ewekë.”
^ Maine, “ka thatreine hnaho.”
