Roma 5:1-21
5 Haawe, pine laka, ase hë jelemeköti së pine la lapaun, epi tro pala hi sa tingetinge* me Akötresie, jëne Iesu Keriso Joxu së.
2 Ke jëne nyidrë, ijiji së hë troa easenyi koi Akötresie me kapa la ihnimi gufa i nyidrë, nge celë hi ihnimi gufa hne së hna kapa enehila. Nge epi tro sa madrine* fë la mejiune qaathei Akötresie laka, tro sa lapane la itre göhnë ka draië.
3 Ngo tha göne casi kö lai mejiun, ngo loi e tro fe sa madrin* hnine la itre itupath, ke atre hi së ka hape, ame la thangane la itre itupath, tre cile hut;
4 nge pine laka, easë a cile hut, easë fe a itre atr hna kapa hnei Akötresie, nge pine laka, kola kepe së hnei nyidrë, hetrenyi jë hi the së la mejiun.
5 Nge xecie hë koi së la mejiune cili, ke Akötresieti a huliwane la uati hmitrötr hnei nyidrëti hna hamëne koi së, matre amamane ka hape, nyidrëti a hnimi së.
6 Ngacama itre ka ngazo pala kö së, ngo ngöne la ijine hna sa, hnei Keriso hna meci pine la itre atre ka ngazo.
7 Eje hi, ewekë ka hace troa meci pine la atre ka meköt, ngo ma ka hmaloi kö e troa meci pine la atre ka lolo thiina.
8 Ngo ame Akötresie, hnei nyidrëti hna amamane la ihnimi nyidrë laka, ngacama itre atre ka ngazo pala kö së, ngo hna meci pi së hnei Keriso.
9 Haawe, tha nyine qaja pala ha enehila, ke ase hë jelemeköti së hnene la madra i Keriso, matre thepe së pi qa ngöne la elëhni i Akötresie.
10 Ke ngacama itre ka ithupëjia së me nyidrë, ngo jëne la hna meci hnene la Nekö i nyidrë, hna ialoinekeu së me nyidrë. Haawe, pine laka, ase hë ialoinekeu së me Akötresie, ka xecie hnyawa fe koi së ka hape, troa amele së ke mele hë Iesu.
11 Ngo tha göi iamele casi kö, ngo easë fe a ce madrin me Akötresie jëne Iesu Keriso Joxu së, atre ialoinekeu së me Akötresie.
12 Ngo pine laka, hna haöthe la fen hnene la ngazo ne la ala cas, nge meci a traqa pine la ngazo, ene pe, traqa pi la meci kowe la nöjei atr asë, ke itre ka ngazo asë hë së.
13 Nge hna traqa pa i ngazo e celë fen nge pine pë hë la Trenge Wathebo, matre tha hna e kö la ngazo ngöne lo ijine pë pala kö wathebo.
14 Qa ngöne lai, qaane Adramu uti hë Mose meci la ka mus, nge hna ketre fe la itre atr ka tha hane eni wathebo tui Adramu. Nge ceitu i Adramu memine la atre ka troa traqa.
15 Ngo isapengöne kö la ahnahna qaathei Akötresie memine la ngazo.* Ke maine nyipici laka, kola meci la nöjei atr asë pine la ngazo ne la ala cas, ngo jëne la ihnimi gufa i Iesu Keriso, ala nyimu hmaca kö la itre ka kapa la ihnimi gufa i Akötresie, me ahnahna hna hamëne gufan hnei nyidrë.
16 Nge isapengöne kö la thangane la ahnahna hna hamëne gufan, memine la ngazo ne la ala cas. Ke qa ngöne la ngazo ka cas, hnëjine hë la nöjei atr asë, ngo hna upe la ahnahna hna hamëne gufan pine la itre ngazo ka nyimutre, matre jelemekötine la ka ala nyim.
17 Haawe, pine laka, hna musi la mec qa ngöne la ngazo ne la ala cas, xecie hnyawa fe koi së laka, tro la itre atr a mel me mus ceitu me itre joxu jëne la atre ka cas, ene Iesu Keriso. Ewekë lai hna atreine kuca hnene la ihnimi gufa i Akötresie, memine la ahnahna hna hamëne gufan, ene la hna jelemeköti angatr.
18 Haawe, qa ngöne laka, meci la pune kowe la nöjei atr pine la ngazo ka cas, ketre tune mina fe, jëne la loi ka cas hna jelemekötine la nöjei atr matre mel.
19 Nge eje hi laka, hna jelengazone la nöjei atr asë pine la hna tha idrei hnene la ala cas, haawe, tune mina fe, jëne la idrengethenge ne la ala cas, ala nyimu la itre hna troa jelemekötin.
20 Nge ame hi la kola traqa la Wathebo kowe la fen, mama pi hi ka hape, ka tiqa hnei ngazo, ngo ame la götrane gaa tiqa hnei ngazo, tre hnë tro fe a mama la etrune la ihnimi gufa i Akötresie.
21 Nge nemene hë la pun? Tune la ngazo a musi me itroxome kowe la mec, ketre tro fe la ihnimi gufa a musi ngöne la meköt, me itroxome kowe la mele ka pë pun jëne Iesu Keriso Joxu së.
Itre mekun ecahu fen
^ Maine jë, “hetrenyi hë së la tingeting.”
^ Maine jë, “easë a madrin.”
^ Maine jë, “easë a madrin.”
^ Ene la ngazo i Adramu.
