Roma 6:1-23
6 Matre nemene ju hë la nyine tro sa qaja? Tro kö së lai a kuca catrëne la ngazo matre mama hnyawa pi la ihnimi gufa?
2 Pëkö! Öhne hnyawa hi së ka hape, easë hi a mec hnene la ngazo, matre tro sa kuca catrëne fë nemen?
3 Nge hapeu, thatre kö nyipunie itre hna bapataison göi Iesu Keriso ka hape, hna bapataiso nyipunie ngöne la mec i nyidrë?
4 Qa ngöne lai, hna ce kelemi së me nyidrë lo kola bapataiso së ngöne la mec i nyidrë, nge pine laka, hna amele Iesu qa hna mec jëne la men atraqatr ne la Keme i nyidrë, loi e tro fe sa hane nyiqaane la ketre mele ka hnyipixe.
5 Haawe, pine laka, hne së hna meci tui nyidrë, tro fe a hane amele së hmaca tui nyidrë. Qa ngöne lai, casi hë së me nyidrë.
6 Ke atre hi së laka, ame lo itre thiina së hnapan, hna ce athipe me nyidrë hune la sinöe, matre tha tro hmaca kö la ngönetrei së ka ngazo a musi koi së. Celë hi matre, tha easë hmaca kö a itre hlue ne la ngazo.
7 Nge ame la atre ka mec, tre pëhë* ngazo i angeic.
8 Haawe, maine hne së hna ce meci me Keriso, ketre easë fe a mejiune ka hape, tro fe hë së a ce mele me nyidrë.
9 Nge atre hë së laka, mele hmaca ha Iesu, nge tha tro hmaca kö nyidrëti a hane mec; ke tha musi hmaca kö la meci thei nyidrë.
10 Nge ame la kola meci hnei nyidrë, aca meci hi nyidrëti pine la ngazo,* ngo ame la mele i nyidrë, tre mele göi Akötresie.
11 Haawe, nyipunieti mina fe, mekune ju laka, meci hë nyipunie göne la ngazo, ngo mele hë nyipunie göi Akötresie jëne Iesu Keriso.
12 Ketre, the nue hmaca kö la ngazo troa musinëne la ngönetrei nyipunie ka troa mec, matre tha tro kö nyipunie a kei thenge la itre aja ne ej.
13 Nge the huujëne kö la itre ngönetrei* nyipunie ceitu me itre jiane huliwa ne la ka tha meköt, ngo amamai nyipunieti jë koi Akötresie ceitu me itre hna amelene hmaca, me itre ngönetrei* i nyipunie ceitu me itre jiane huliwa ne la meköt.
14 Haawe, tha ngazo kö la ka troa musinë nyipunie, ke tha nyipunieti hmaca kö fene la wathebo, ngo fene la ihnimi gufa i Akötresie.
15 Matre nemene ju hë? Tro kö sa kuca la ngazo ke tha easë hmaca kö fene la Wathebo ngo fene la ihnimi gufa? Pëkö!
16 Nge hapeu, thatre kö nyipunie laka, e tro nyipunie a selëne ka hape, nyipunie la itre hlu ka idrei, tro hë nyipunieti a drengethenge la itre hnei nyipunieti hna nyihluen? Haawe, maine tro nyipunie a itre hlue ne la ngazo, meci la pune koi nyipunie, ngo maine tro nyipunieti a itre hlue ne la idrengethenge, tro ha jelemeköti nyipunie.
17 Ngo ole koi Akötresie ke, ngacama itre hlue ne la ngazo nyipunieti ekö, ngo enehila, nyipunieti hë a drengethenge qaa kuhu hni la itre ini hna hamë nyipunie hnei Akötresie.
18 Haawe, pine laka tha nyipunieti hmaca kö la itre hlue ne la ngazo, nyipunieti pë hë a itre hlue ne la meköt.
19 Matre eni a ithanata qene atr koi nyipunie pine la itre ngönetrei nyipunie ka ngazo, ke nyipunieti ekö a huujëne la itre ngönetrei nyipunie troa kuca la itre huliwa ka sis nge hna wathebon göi troa kuca catrëne la ngazo, ngo enehila, tro fë jë la itre ngönetrei nyipunie troa hlue ne la meköt, matre wië pi nyipunie.
20 Haawe, ame lo ijine nyipunieti a itre hlue ne la ngazo, tha itre hlue ne la meköti kö nyipunie.
21 Matre nemene la itre wene ne lo itre huliwa i nyipunieti ekö? Itre ewekë hnei nyipunieti hna hmahman enehila, ke meci la pune qa ngöne la itre ewekë cili.
22 Ngo enehila, pine laka, hna thepe nyipunie qa ngöne la ngazo, nge nyipunieti fe hë a nyihlue i Akötresie, itre wene ka loi la hnei nyipunieti hna kapa, itre wene ka ihmeku memine la thiina ka hmitrötr, matre kapa nyipunie la mele ka pë pun.
23 Ke ame la pune la ngazo tre mec, ngo ame la ahnahna hna hamëne gufane hnei Akötresie, tre mele ka pë pun jëne Iesu Keriso Joxu së.
Itre mekun ecahu fen
^ Maine, “nue maine köletrije la ngazo.”
^ Ene la troa apatrene la ngazo.
^ Ger., “hnepe ngönetrei.”
^ Ger., “hnepe ngönetrei.”
