Roma 7:1-25
7 Hapeu, thatre kö nyipunie, itre trejin (ngacama eni a ithanata kowe la itre ka atre la wathebo) ka hape, ame la Wathebo, tre ka musinëne la atr, e mele pala kö angeic?
2 Ka tune la ketre föe, maine ka faipoipo, hna othi eahlo hnene la wathebo ne la föi eahlo e mele petre kö nyidrë. Ngo e traqa ju nyidrëti mec, tha hna othi eahlo hmaca kö hnene la wathebo ne la föi eahlo.
3 Haawe, maine ka mele la föi eahlo, nge eahlo a faipoipo pena me ketre trahmany, eahlo lai a nyixetë. Ngo maine meci hë la föi eahlo, tha hna othi eahlo hmaca kö hnene la wathebo i eahlo, matre tha eahlo kö a nyixetë e tro eahlo a föi ketre.
4 Haawe, itre trejin, hna hane fe othi nyipunieti ekö hnene la Trenge Wathebo, ngo jëne la huuje i Keriso tha hna othi nyipunieti hmaca kö, matre tro hë nyipunie a itre atre i Keriso, lo hna amelene qa hna mec. Celë hi matre, ijiji së hë troa wa wene ka loi koi Akötresie.
5 Ke ame lo easë petre kö a mel thenge la ngönetrei,* kola musinëne la itre ngönetrei së hnene la itre aja ka ngazo, itre aja lai hna qajaqaja hnene la Trenge Wathebo, nge ka troxomi së kowe la mec.
6 Ngo enehila, ase hë thepe së qa ngöne la Wathebo, ke tha eje hmaca kö a hnöthi* së. Haawe, ijiji së hë troa itre hlue i Akötresie jëne la uati hmitrötr, ngo tha thenge kö lo Wathebo hna cinyihan.
7 Matre, tro sa qeje nemen? Ka ngazo kö la Wathebo? Pëkö! Ke eje hi, maine patre ju lo Trenge Wathebo, tha tro kö ni a hane atre ka hape, nemene la ngazo. Ka tune la kola piin, tha tro kö ni a atre e tha qaja kö hnei Trenge Wathebo ka hape: “The piine kö.”
8 Matre, hnene la wathebo, ame hna cia theng la nöjei pengöne aqane piin, haawe, maine patre ju la wathebo, ketre patre kö la ngazo.
9 Nge ketre, ka mele ni ekö, lo tha eni petre kö fene la wathebo, ngo ame ju hi la kola traqa la hna amekötin, mele jë hi la ngazo, nge eni pena ha la ka mec.
10 Matre ame lo hna amekötine göi troa itroxome kowe la mel, eni ha öhne ka hape, ej a itroxome kowe la mec.
11 Ke jëne la wathebo, hnene la ngazo hna öhn la aqane troa iaö ni, matre humuthi ni.
12 Ngo ame la Wathebo, tre ka hmitrötr, nge ame la itre hna amekötin, tre ka hmitrötre fe, nge ka meköt, nge ka nyipi lolo.
13 Matre hapeu, ame la ewekë ka loi, tre jëne meci lai koi ni? Pëkö! Ngo, ngazo la ka humuthi ni. Nge jëne la ewekë ka loi, hnene la ngazo hna troxomi ni kowe la mec, ene laka, hnene la ewekë ka loi hna qaja amamane la pengöne la ngazo. Matre jëne la Wathebo, kola mama hnyawa la pengöne la ngazo.
14 Ke atre hi së laka, qaathei Akötresie la Trenge Wathebo, ngo ame ni, atre ka ngazo ni, nge hna salemë ni kowe la ngazo.
15 Matre tha trotrohnine kö ni la hnenge hna kuca, ke tha kuca kö ni la hnenge hna ajan, ngo ame la hnenge hna methinën, celë hi hnenge hna kuca.
16 Haawe, pine laka eni a kuca la hnenge hna methinën, eni hi lai a jelenyipicine laka, ka lolo la Wathebo.
17 Ngo enehila, tha eni hmaca kö la ka trongën ej, ngo ngazo ka eje theng.
18 Nge atre hi ni laka, pëkö loi ngöne la ngönetreing ka ngazo, ke hetre ajange troa kuca la loi, ngo thatreine kö ni kuca.
19 Matre tha eni kö a kuca la loi hnenge hna mekun, ngo ngazo hnenge hna xelen.
20 Haawe, maine eni a kuca la hnenge hna xelen, tha eni hmaca kö lai ka kuca, ngo ngazo ka eje theng.
21 Qa ngöne lai, hnenge hna öhne theng la wathebo celë laka: Ame la eni a thele troa kuca la loi, ngazo la ka mama theng.
22 Ngacama hnine catrëne ju hë ni la trenge wathebo i Akötresie,
23 ngo eni a öhne ngöne la ngönetreing* la ketre wathebo ka cile kowe la mekunang, nge ka hnöthi ni, me nue ni kowe la wathebo ne la ngazo ka eje ngöne la ngönetreing.*
24 Ekölö pe ni atr ka ngazo, drei la ka troa amele ni qa ngöne la ngönetrei celë ka troa mec?
25 Oleti koi Akötresie jëne Iesu Joxu së! Ke eni la hlue i Akötresie hnene la mekunang, ngo pine la ngönetreing, eni a hlue ne la ngazo.
Itre mekun ecahu fen
^ Ger., “hnepe ngönetrei.”
^ Ger., “meci hë së thenge lo ewekë ka xomehnöthi së.”
^ Ger., “hnepe ngönetrei.”
^ Ger., “hnepe ngönetrei.”
