Roma 8:1-39
8 Haawe, ame la itre ka casi me Iesu Keriso, tre, pëkö zö i angatr.
2 Ke ame lo wathebo ne la uati hmitrötr ka hamë mel jëne Iesu Keriso, ej a thepe së qa ngöne la wathebo ne la ngazo ka troxomi së kowe la mec.
3 Ke eje hi, pine la ngazo ka eje thene la atr, thatreine kö troa trongëne hnyawa la Wathebo, matre tha ijije kö troa iamele; celë hi hna thatreine kuca hnene la Wathebo, ngo ewekë lai hnei Akötresie hna eatrëne ngöne lo nyidrëti a upe la nekö i nyidrë, ceitu me atr ka ngazo, matre troa apatrene la ngazo. Qa ngöne lai, Nekön a ejine la ngazo ka eje thene la atr.
4 Kolo hi matre eatre jë the së la itre hna amekötin ka meköt ne la Trenge Wathebo, easë itre ka tha tro thenge la ngönetrei ngo uati hmitrötre pe.
5 Ke ame la itre ka mele thenge la ngönetrei, angatr a lapa mekune la itre ewekë ne la ngönetrei, ngo ame la itre ka mele thenge la ua, angatr a lapa mekune la itre ewekë ne la ua.
6 Ke ame la thangane la troa meku ngönetrei, tre mec, ngo mel me tingetinge la thangane la troa mekune la itre ewekë ne la ua;
7 nge ame la ka meku ngönetrei, tre ka icilekeu me Akötresie, ke ame la ngönetrei, tha eje kö a trongëne la wathebo i Akötresie. Ketre, tha tro pi kö ej a hane drengethenge la wathebo.
8 Haawe, ame la itre ka tro thenge la ngönetrei, tha ijiji angatre kö troa amadrinë Akötresie.
9 Ngo maine nyipici ka hape, thei nyipunieti hë la uati hmitrötre i Akötresie, tha tro kö nyipunie a tro thenge la ngönetrei, ngo uati pe. Nge maine patre kö thene la ketre atr la aqane waiewekë* i Keriso, tha atre i nyidrëti kö angeic.
10 Ngo maine ka casi nyipunie me Keriso, meci hë la ngönetrei hnene la ngazo, ngo jëne iamele la ua hnene la meköt.
11 Nge maine eje thei nyipunie la ua ne la atre amele Keriso qa hna mec, jëne la ua i nyidrë tro fe nyidrëti lai a hane amelene hmaca la itre ngönetrei i nyipunie ka mec.
12 Haawe, itre trejin kola musinë së, ngo tha hnei ngönetrei kö matre mel thenge la aja i ngönetrei;
13 ke maine tro nyipunie a mele thenge la ngönetrei, tro hë nyipunieti a mec; ngo maine tro nyipunieti a humuthe la itre aja ne ngönetrei jëne la uati hmitrötr, tro hë nyipunieti a hane mel.
14 Eje hi, ame la nöjei atr hna xometrongëne hnene la ua i Akötresie, tre itre nekö i Akötresieti lai.
15 Nge ame la uati hmitrötre i Akötresie, tha eje kö a upi së troa itre hlu me xou, ngo eje pe a kuca matre nyi kuku së, nge matre tro sa suene ka hape: “Abba* Kaka!”
16 Nge ua a anyipicine koi së ka hape, itre nekö i Akötresieti hë së.
17 Haawe, maine itre kuku së, nga itre trene edrö fe së, itretre kepe edrö qaathei Akötresie, ngo itre ka ce kepe edrö me Keriso. Ngo eje hi, loi e hne së hna pane ce akötre me Keriso matre hane jë fe adraië së me nyidrë.
18 Celë hi matre ka pë pengöne koi ni la itre akötr hne së hna melën enehila, hune la edrö ka nyipi lolo hne së hna troa kapa qaathei Akötresie.
19 Nge ame asë hi la nöjei hna xup, itre ej a lapa treqene la ijine troa mama la itre nekö i Akötresie.
20 Ke eje hi, mele ka gufa la hna hamën kowe la nöjei hna xup, ngo tha qa ngöne kö la aja i angatre, ngo aja i Akötresieti pe, matre mama pi la mejiun celë:
21 Easenyi hë matre tha tro hmaca kö a othe la itre ewekë hna xup hnene la ngazo me mec, ngo tro ha nuamacanyi angatr tune la itre nekö i Akötresie.
22 Ke atre hi së laka, kolo pala hi a ce awe la itre ewekë hna xup, nge uti pala hi enehila, itre ej a ce akötr.
23 Ngo tha angatre casi kö, easë mina fe, itre ka kapa lo pane götrane la thupen, ene la uati hmitrötr, easë fe a treij e kuhu hni së, treqene la ijine troa nyi kuku së hnei Akötresie. Nge ijije tro nyidrëti a kuca lai, ke ase hë Keriso hamëne la thupene mel, matre thepe së qa ngöne la ngönetrei celë ka ngazo.
24 Haawe, hna amele së hnene la mejiune cili, ngo nyipici laka, e eatre hë lo hna mejiun, pëhë mejiun, ke e öhne hë la atr la ewekë hna mejiun, hapeu, tro pala kö angeice lai a lapa treqen?
25 Ngo ame la easë a mejiun kowe la ewekë hne së hna tha öhn, tro pala kö së lai a itreqe me cile hut.
26 Ketre tune mina fe, ua a xatua së ngöne la itre ijine easë a jol, ke eje hi, hetre itre xa ijine easë a thith ngo thatre kö së la nyine troa thithi fë, eloine pe, ua a sipone thatraqai së la itre ewekë hne së hna thatreine qaja.
27 Nge ame Akötresie, atre öhne la aliene hni së, trotrohnine hi nyidrë la hna sipon hnene la mene i nyidrë, ke ej a iele sane la ange ka hmitrötr, thenge la aja i nyidrë.
28 Nge atre hi së laka, Akötresie a kuca matre tro la nöjei ewekë hna xup a ce huliwa nyine loi kowe la itre ka hnimi nyidrë, itre hna iën thatraqane la aja i nyidrë.
29 Ke qaane lo qaan, atre hi Akötresie ka hape, troa hetre hna iën, nge ase hë nyidrëti mekune tro angatr a tune la Nekö i nyidrë, matre tro la nekön a haetra ne la itre jin ka nyimutre.
30 Ketre, ame la itre hnei Akötresieti hna iën, tre itre hnei nyidrëti hna hën; nge ame la itre hna hën, tre itre hnei nyidrëti hna jelemekötin. Haawe, ame la itre hna jelemekötin, tre itre ka troa kapa la lolo qaathei nyidrë.
31 Matre nemene la nyine tro sa qaja göne la itre ewekë cili? Maine ce Akötresie me easë, drei la sa i easë?
32 Haawe, pine laka tha hnei nyidrëti kö hna cipane la nekö i nyidrë, ngo hna nue Iesu pe troa meci pi së asë, hapeu, tha tro kö Akötresieti lai a hane hmalahnine troa hamë së la itre xa ewekë?
33 Drei la ka troa nyizöne la itre hnei Akötresie hna iën? Akötresieti hi la atre jelemeköti angatr.
34 Matre drei hmaca kö la ka troa ameköti angatr? Pëkö, ke hnei Iesu Keriso hna mec, nge mele hmaca ha nyidrë, nge nyidrëti a lapa ngöne la götrane maca i Akötresie, me xëwe sai së fe.
35 Nge nemene la ka troa thepe së qa ngöne la ihnimi Keriso? Hapeu, itre itupath, hleuhleu, iaxösisi, elëhni, tro xöe, xönë troa mec, maine taua?
36 Tune lo hna cinyihan: “Kolo pala hi a humuthi hun pi nyipë; nge kola goeë hun ceitu me itre mamoe nyine troa humuth.”
37 Ngo eje hi laka, ngöne la nöjei ewekë cili, easë pala hi a hun hnene la atre hnimi së.
38 Nge ka xecie hnyawa koi ni ka hape, thatreine kö la mec, me mel, me angela, me mus, me itre ewekë enehila, me itre ewekë elany, me men,
39 me edraiën, me ejuin, me nöjei ewekë hna xup, troa thepe së qa ngöne la ihnimi Akötresie ka mama jëne Iesu Keriso Joxu së.
