Roma 9:1-33
9 Tune la ketre atre drei Keriso, eni a qaja la nyipici, nge tha eni kö a thoi, ke jëne la uati hmitrötr, kola anyipici ni me amekötin hnene la mekuthetheunge* ka hape,
2 eni a hleuhleu, nge hace pala hi la hning.
3 Nge eje hi, maine nyine xatuane la itre trejin me eni e tro ni a kapa la pune hna amekötine koi angatr, angetre Iudra ka xele Keriso, nga tro ni a kapa.
4 Angatr, angetre Isaraela, lo itre hna troa nyi kukun, nge thatraqai angatre la lolo me isisinyikeu, nge angatre lo itretre kapa la Wathebo, memine lo huliwa ka hmitrötr, me itre ewekë hna thingehnaean.
5 Ketre, angatre fe la itre matrane lo itre xötrapane i Keriso. Haawe, epi troa atrunyi Akötresie epine palua, la atre musi kowe la nöjei ewekë asë. Amen.
6 Ngo tha kolo kö lai a hape, tria kö lo trengewekë i Akötresie. Ke eje hi, tha angetre Isaraela kö la itre nyipi atre “Isaraela.”
7 Nge tune fe, tha itre neköne kö angatr pine hi laka, itre matra* i Aberahama angatr; ngo hna cinyihane pe ka hape: “Ame la itre hna troa hëne ka hape, matra i eö, tro angatr a xulu qaathei Isaaka.”
8 Ke eje hi, ame la itre sipu matran, tre tha itre nekö i Akötresieti kö lai, ngo ame la itre kuku ne la isisinyikeu, angatre hi la itre ka nyi matran.
9 Hna eatrëne lo itre trengewekë ne la isisinyikeu lo kola hape: “Tro ni a traqa ngöne la ijine cili, nge tro Sara a upunene la ketre nekönatr trahmany.”
10 Ngo tha ngöne la ijine cili hmekuje kö, ngo memine fe lo ijine Rebeka a upunene la lue fini, nge Isaaka qaaqaa së la keme i nyidro.
11 Nge atre hë Akötresie la aqane troa ië atr, nge tha nyidrëti kö a iën thenge la huliwa ne la atr, ngo nyidrëti pe a iëne la atr hnei nyidrëti hna ajan. Celë hi matre, ame ngöne lo ijine tha mala petre kö lo lue fini, nge pëkö ewekë ka loi me ka ngazo hnei nyidroti hna kuca,
12 ase fe hë qaja koi Rebeka ka hape: “Tro la haetra a nyihluene la cipa.”
13 Nge kolo fe a tune lo hna cinyihane ka hape: “Hnenge hna hnimi Iakobo me methinë Esau.”
14 Matre tro sa qeje nemen? Ka tha meköti kö Akötresie? Pëkö!
15 Ke öni nyidrë koi Mose: “Tro ni a hnime la atr hnenge hna hnim, me utipine la hnenge hna pi utipin.”
16 Haawe, tha Akötresieti kö a iën thenge la aja maine huliwa* ne la atr, ngo thenge la aja i nyidrë, atre utipin.
17 Kola qaja hnine la itre hna cinyihan göi Farao ka hape: “Hane hi lai kepin matre hnenge hna nue eö troa mel, matre troa mama thei eö la etrune la meneng, nge matre troa hlemu la ëjeng ngöne la fene hnengödrai asë.”
18 Haawe, Akötresieti a utipine la hnei nyidrëti hna pi utipin, me nue la itre xan matre xeti pi la itre hni angatr.
19 Matre maine jë, tro hë nyipunieti a qaja koi ni ka hape: “Pine laka, pëkö atr ka atreine cile kowe la aja i Akötresie, hnauëne laka, nyidrëti pala kö a thele la tria thene la atr?”
20 Ngo ka ue nyipunie matre sa koi Akötresie? Tro kö la dro ka fedr a qaja kowe la atre xup ka hape: “Hnauëne la eö a xupi ni tune la?”
21 Matre nemen? Tha ijije kö tro la atre huliwane la dro ka fedr a xupe qa ngöne la ca trepadro la lue trengen, ca nyine loi, nge ca nyine ngazo?
22 Haawe, tui Akötresieti hi. Aja i nyidrë troa amamane la elëhni i nyidrë me etrune la mene i nyidrë kowe la itre atre ka ngazo. Ngo ame pe, hnei nyidrë hna xomihnine la itre hnei nyidrëti hna elëhni kow,* itre nyine troa apatren.
23 Nyidrë a kuca tun, matre mama pi la lolo i nyidrë kowe la itre hnei nyidrë hna utipin,* ene lo itre ka troa kapa la thupen hnei nyidrëti hna hnëkëne koi angatr.
24 Haawe, kolo hi lai a qeje së, itre hna hën nyipine la angetre Iudra me itre atre ne fen. Matre nemene hmaca kö la nyine tro sa qaja?
25 Nge celë fe hi lo hnei nyidrëti hna qaja koi Hosea, öni nyidrë: “Ame la itre atr ka tha sine la nöjeng, tro hë ni a hë angatre ka hape, ‘nöjeng.’ Nge ame fe la föe hna xelen, tro hë ni a hëne ka hape, ‘hniminang.’
26 Nge ame ngöne la itre götrane hna qaja koi angatre ka hape, ‘Tha nöjenge kö nyipunie,’ troa hë angatr e cili a hape, ‘nekö ne la Akötresie ka mel.’ ”
27 Nge hnei Isaia mina fe hna qaja catrëne göi Isaraela ka hape: “Ngacama tro la etrune la itre nekö i Isaraela a tune la itre wenengöni, ngo xalaithe hi la itre hna troa amelen.
28 Nge tro Iehova* a amekötine la fen, me umuthe hnyawa la iameköti me ahopatren.”*
29 Nge tune lo hna qaja ha hnei Isaia: “Maine tha hnei Iehova* ju, joxu ne la itre trongene isi e hnengödrai, hna nue la matrane koi hun, tro hë huni a tui Sodroma me Gomora.”
30 Matre nemene hmaca la nyine tro sa qaja? Ame itre atre ne fen, ngacama tha angatre kö a thele troa meköt, ngo pine la lapaun, ka meköti angatr qëmeke i Akötresie.
31 Ngo ame angetre Isaraela, ngacama angatr a thele troa meköt thenge la wathebo, ngo tha trongëne pe angatr.
32 Ngo hnauëne la kola traqa tun? Pine laka, tha angatre kö a thele la meköt hnene la lapaun, ngo thenge la itre huliwa. Matre hna hna i angatr hune la “etë ne iakeiny”;
33 nge kola ihmeku memine lo hna cinyihane ka hape: “Hanawang! eni a amë e Ziona la ketre etë ne iakeiny, me etë ne thingi gojenyi angatr, ngo ame la atre lapaune kowe la etë cili, tha tro jë kö angeic a hmahma.”
Itre mekun ecahu fen
^ Wange ju la HQP.
^ Ger., “itin.”
^ Ger., “ke ketre a ajan, maine nyinyap.”
^ Ger., “trenge hni.”
^ Ger., “trenge utipin.”
^ Wange ju la HQP.
^ Maine, “canga eatrën.”
^ Wange ju la HQP.
