HNA fejane la itre hna Cinyihan Ka Hmitrötr jëne la uati hmitrötr i Akötresie. Itre hna cinyihane qene Heberu, me qene Arama, me qene Geres. Nge matre tro la “nöjei nöj” a kepe thangane la Trengewekë i Akötresie, nyipiewekë troa ujëne la itre hna cinyihan ngöne la nyimu qene hlapa. (Mataio 24:14) Hna hëne la truedri seven lao Tus qaane Mataio koi Hna Amaman ka hape, “itre hna Cinyihan Qene Geres.” Hna hëne tun, ke hnene lo itre pane Keresiano, itre ka mel lo M.K, hna cinyihan qene Geres.

Hna pane mama lo tusi hmitrötr: Tusi Hmitrötr Fene Ka Hnyipixe Hna Ujën Itre Hna Cinyihan Qene Geres, lo 1950 Qene Papale. Hna nyitrepen hnene la ketre tusi hna ewath ka hlemu, ene lo tusi Westcott me Hort, qene Geres, ka ihmeku memine la itre tusi hna ewath ka hekö catr. Ame la Tusi Hmitrötr Fene Ka Hnyipixe Hna Ujën, ej a trongën e ijij, la aqane ithanata qene Geres. Nge hna tune fe hi kowe la tusi hmitrötr celë qene Drehu, hna ujëne qa ngöne la tusi hmitrötr qene papale hna ahnyipixen lo macatre 2013.

Traqa koi 237 lao mama la ëje i Akötresie, ene Iehova hnine la Tusi Hmitrötr Fene Ka Hnyipixe Hna Ujën Itre Hna Cinyihan Qene Geres. Ej a amamane la enyipiewekëne troa ahmitrötrëne la ëje i Akötresie, me hëne la ëje i nyidrë, matre mel. Tusi Hmitrötre celë a amë hmaca la ëje i Iehova ngöne la nyipi göhnen, hnine la itre Hna Cinyihan Ka Hmitrötr.—Mataio 6:9; Roma 10:13.

Ame la ëj, Tusi Hmitrötr Fene Ka Hnyipixe Hna Ujën, tre hna xome qa ngöne la fene ka hnyipixe hnei Akötresie hna thingehnaean thatraqai nöjei atr. (2 Peteru 3:13) Ame la itre ka ujëne la tusi celë, angatr a hnime la Atrekë Ewekëne la itre hna Cinyihan Ka Hmitrötr, nge angatr a isin matre meköt la aqane tro fë la itre mekun, me itre trengewekë i Nyidrë. Trenge aja huni tro la tusi hna ujëne celë a xatuane la itre ka ajan, troa “atrehmekune hnyawa la nyipici.”—1 Timoteo 2:4.