Pane Tusi Itre Joxu 12:1-33
12 Ame hnei Reoboama hna tro Sekema, ke Isaraela asë e Sekema troa acili joxu nyidrë.
2 Nge drenge hë Ieroboama nekö i Nebata (ngöne la ijine cili, angeice pala kö e Aigupito, ke hnei angeice hna kötre Solomona joxu me lapa e Aigupito),
3 matre hnene la itre atr hna traqa troa thei angeic. Thupene lai, Ieroboama me nöjei atrene* la nöje Isaraela a tro ju koi Reoboama, me hape:
4 “Hnene la keme i nyipë hna ahacene la ehnefe* hun, ngo maine tro nyipëti a ahmaloeëne la huliwa hna athip hnene la keme i nyipë, nge maine tro nyipëti a ahmaloeëne la hnei nyidrëti hna ahacenyi hun, tro hë huni a nyihlue i nyipë.”
5 Öni Reoboama ka hape: “Bëeke hmaca jë koi ni thupene la köni drai.” Matre angatr a tro hmaca pi.
6 Ame hnei Reoboama hna thele eamo thei itre qatr, itre ka huliwa koi Solomona keme i nyidrë, lo mele pala kö nyidrë. Öni Reoboama: “Nemene la nyine tro ni a sa koi angatr?”
7 Sa jë hi angatre ka hape: “E tro nyipëti a huliwa kowe la nöj, me nyipiewekëne la sipo i angatr, me sa amenyiken, tro hë angatr a nyihlue i nyipë epine palua.”
8 Ngo tha kapa kö nyidrëti la eamo ne la itre qatr, matre hnei nyidrëti hna hnying kowe la itre sine xötre i nyidrë, lo itre ka huliwa koi nyidrë.
9 Öni nyidrë: “Hnene la nöje celë hna sipo ni troa ahmaloeëne la ehnef hnei kaka hna atë hui angatr, matre nemene la nyine tro ni a sa koi angatr?”
10 Önine jë hi la itre sine xötre i Reoboama ka hape: “Ame kowe la nöj ka qaja koi nyipë ka hape, ‘Hnene la keme i nyipë hna ahacene la ehnefe hun, ngo loi e tro nyipëti a ahmaloeën,’ qaja jë, ‘Tro kö la hene wanakoimeng ka co, a isaisa hune la gö* i kaka.’
11 Hnei kaka hna sili ehnefe ka hace koi epun, ngo tro hmaca kö ni a ahacene catrën. Hnei kaka hna lepi epun hnei none kau, ngo tro ni a lepi epun hnei none kau ka hetre faon.’”
12 Ngöne la hnaakönine drai, hnei Ieroboama me itre sinatronge i angeic, hna bëeke hmaca koi Reoboama joxu, ke öni nyidrëti lo: “Bëeke hmaca jë koi ni thupene la köni drai.”
13 Ngo ka catre la aqane sa i joxu koi angatr. Tha kapa kö nyidrëti lo eamo ne la itre qatr,
14 ngo hnei nyidrëti hna trongëne la eamo ne la itre thupëtresij. Matre öni nyidrë: “Hnei kaka hna sili ehnefe ka hace koi epun, ngo tro hmaca kö ni a ahacene catrën. Hnei kaka hna lepi epun hnei none kau, ngo tro ni a lepi epun hnei none kau ka hetre faon.”
15 Haawe, tha kapa kö joxu la sipo ne la nöj, ke Iehova la qaane la ewekë cili. Eje hi, hna traqa tun matre eatre jë la hnei Iehova hna qaja koi Ieroboama, nekö i Nebata, jëne Ahia qa Silo.
16 Matre ame hë la Isaraela a öhne laka, xele kö joxu ma drei angatr, öni angatre jë hi: “Drei pena lae Dravita! Pëkö edrö së qaathene la nekö i Iese. Haawe angetre Isaraela, isa bëeke jë koi isa hazen! Ngo Dravita, qaan enehila, ketre wange ju kö nyipë la fami nyipë!” Thupene lai, hnene la angetre Isaraela* hna isa bëeke kowe la itre hnalapa* i angatr.
17 Ngo Reoboama pala hi la ka mus hune la angetre Isaraela ka mel ngöne la itre traon ne Iudra.
18 E thupen, hnei Reoboama joxu hna upi Adorama, tane la itre hna up troa huliwa koi joxu, troa wai Isaraela asë. Ngo hnei angatr hna tranyi angeice hnei etë. Nge ame Reoboama joxu, hnei nyidrë hna canga sesë kowe la ikatr i nyidrë, me kötr a tro Ierusalema.
19 Nge qaane ju hi lai, hnene la angetre Isaraela hna icilekeu memine la fami i Dravita.
20 Matre ame hë la Isaraela a drenge laka, bëeke hë Ieroboama, angatr a hë angeice jë qëmekene la ka ala nyim. Nge angatr a acili joxu angeice jë hui Isaraela. Haawe, pëkö tribu ka ce xöl memine la lapa i Dravita, ngo tribu i Iudra hmekuje hi.
21 Ame hë la Reoboama nekö i Solomona a traqa e Ierusalema, hnei nyidrëti hna canga acasine la nöjei trahmany ne la tribu ne Iudra, me Beniamina. Ala 180 000 lao sooc ka atreine isi,* matre troa isi me Isaraela, me bëeke fë la mus i Reoboama.
22 Ame hnene la nyipi Akötresie hna ithanata koi Semaia, atre ne la nyipi Akötresie, me hape:
23 “Qaja jë koi Reoboama joxu ne Iudra, nekö i Solomona, me kowe la tribu ne Iudra asë, me tribu ne Beniamina, me itre xa atrene la nöj ka hape,
24 ‘Hane hi la hna qaja hnei Iehova: “The tro kö epuni a isi memine la itre trejin me epun qa Isaraela, ngo tro pe epuni a isa bëeke koi hnalapan, ke eni la ka axulune la jole cili.”’” Ame hnei angatr hna drenge la hna qaja hnei Iehova, me isa bëeke koi hnalapan, thenge la hna amekötin hnei Iehova.
25 Nge hnei Ieroboama hna xupe la traon ne Sekema, ngöne la itre wetr e Eferaima, me lapa e cili. E thupen, angeic a tro ju troa xupe la traon ne Penuela.
26 Ieroboama a mekune ka hape: “Ma tro hmaca a bëeke la baselaia kowe la hnalapa i Dravita,
27 e tro pala hi la nöj a elë a tro Ierusalema troa tro fë huuj ngöne la uma ne hmi Iehova, tro hë angatre lai a fedre kowe la joxu i angatr, Reoboama joxu ne Iudra. Tro hë angatr lai a humuthi ni, me bëeke hmaca koi Reoboama joxu ne Iudra.”
28 Matre, thupene la angeic a ase ithanatan me itre atresi, angeic a kuca jë la lue kau gool. Nge öni angeic kowe la nöj: “Ka hace koi epuni troa elë a tro Ierusalema. Haawe Isaraela, hane hi la haze i epun, atre thepe epun qa Aigupito.”
29 Angeic a acile jë la ketre kau gool e Bethela, me ketre e Dana.
30 Qa ngöne lai, hnene la nöj hna kuca la ngazo, me tro uti hë Dana troa nyihluene la kau gool.
31 Ieroboama a kuca jë la itre uma ne hmi hune la itre hnë hmi gaa hmitrötr,* me acile la itre atre menu troa atre huuj ngöne la nöj, ngo tha itre matra i Levi kö.
32 Nge angeic a acile jë la ketre feet ngöne la hna 15 ne drai, ne la hna 8 ne treu ne la macatre. Ketre feet ka ceitu memine lo feet hna kuca e Iudra. Matre hune la ita ne huuj hnei angeic hna xup e Bethela, angeic a tro fë jë la huuj thatraqane la itre neköi kau gool hnei angeic hna xup. Nge e Bethela, angeic a acile jë la itre atre huuj, ngöne la itre hnë hmi gaa hmitrötr hnei angeic hna iën.
33 Celë hi kepin matre nyiqaane huuje jë angeic hune la ita ne huuj hnei angeic hna xup e Bethela, ngöne la drai 15 ne la hna 8 ne treu. Angeice kö la ka iëne la treu celë, me amekötin kowe la nöje Isaraela troa feetëne la feete cili. Nge hnei angeic hna kuca la itre huuj hune la ita ne huuj, me huhajin itre ej.
Itre mekun ecahu fen
^ Maine, “ekalesia.”
^ Maine, “ithahluë.”
^ Maine, “co ju hi kaka.”
^ Ma kolo jë a qaja la angetre Isaraela ne la 10 tribu ne kolopi.
^ Heb., “itat.”
^ Maine, “ka isi catr.”
^ Wange ju la HQP.
