Pane Tusi Itre Joxu 15:1-34
15 Ngöne la kola 18 lao macatre ne mus i Ieroboama, nekö i Nebata, hna acili Abiama troa joxu ne Iudra.
2 Hnei nyidrë hna musi koi köni macatre e Ierusalema. Maaka la ëjene la thine i nyidrë, nge api Abisaloma eahlo.
3 Casi hi la itre ngazo i Abiama me keme i nyidrë. Nge tha pexeje* kö la hni nyidrë koi Iehova Akötresi nyidrë, tune lo aqane pexej la hni Dravita qaaqaa i nyidrë.
4 Ngo pi Dravita, hnei Iehova Akötresi nyidrë hna nue koi Abiama la ketre laam* e Ierusalema, me acile la nekö i Abiama troa mus, me nue Ierusalema troa cil,
5 ke hnei Dravita pala hi hna kuca la loi koi Iehova. Nge ngöne la mele i nyidrë, tha hnei nyidrëti kö hna ena la ketre wathebo hna hamën hnei Akötresie, ngo göi Uria atre Heth hmekuje hi.
6 Ngöne la mele i Reoboama, tha mano kö nyidrëti isi me Ieroboama.
7 Nge ame la mele i Abiama, me nöjei huliwa i nyidrë, hna fejan asë ngöne la itre itusi ne la mele ne la itre joxu ne Iudra. Nge hnei Abiama fe me Ieroboama hna hane isi.
8 Thupene lai, hnei Abiama hna meköl me itre qaaqaa i nyidrë ngöne la mec. Nge hna kelemi nyidrë ngöne la Traone i Dravita. Nge hnei Asa nekö i nyidrë hna nyihna i nyidrë troa joxu.
9 Ngöne la kola 20 lao macatre ne musi Ieroboama joxu ne Isaraela, kola nyiqaane mus hnei Asa e Iudra.
10 Hnei nyidrëti hna musi koi 41 lao macatre e Ierusalema. Nge Maaka la qaaqa i nyidrë, eahlo lo api Abasaloma.
11 Hnei Asa hna kuca la loi koi Iehova, tui Dravita qaaqaa i nyidrë.
12 Nyidrëti a helëne pi qa ngöne la nöj, la itre trahmanyi ka salemë ngönetrei thatraqane la hmi. Nge nyidrëti a xometrije pi la itre idrola ka sis,* hna kuca hnei itre qaaqaa i nyidrë.
13 Nge nyidrëti a amekötine jë, matre tha tro hmaca kö Maaka qaaqaa i nyidrë a isola, pine eahlo kuci idrola ka sis thatraqane la hmi ne lo sine feni ka hmitrötr. Ame hnei Asa hna thëtrije la idrola ka sis, me dreuthetrij ngöne la hnathup e Kederon.
14 Ngo tha hna apatrene kö la itre hnë hmi gaa hmitrötr, ame pe, ka pexeje* la hni i Asa koi Iehova ngöne la mele i nyidrë.
15 Asa a traqa fë pi hnine la uma ne hmi i Iehova, la itre ewekë hnei nyidrë me keme i nyidrë, hna amë acon thatraqane la hmi.* Itre sileva, me gool, me itre xa ewekë ju kö.
16 Tha mano kö Asa isi me Baasa joxu ne Isaraela.
17 Ame hnei Baasa joxu ne Isaraela hna tro troa isi me Iudra. Nge nyidrëti a eköhagene* jë la traon ne Rama, matre tha tro kö la itre atr a kötr maine lö* kowe la nöje i Asa joxu ne Iudra.
18 Nge Asa a xom asë jë la sileva me gool ka lapa pe hnine la trengamo ne la uma ne hmi Iehova, me hnine la trengamo ne la hnalapa i joxu. Nyidrëti a ahnith asë jë kowe la itre hlue i nyidrë, me upi angatr koi Benadada nekö i Taberimona, nekö i Heziona. Benadada la joxu ne Suria ka lapa e Damaseko. Hane hi la maca i Asa:
19 “Hetre isisinyikeu i nyiso, me isisinyikeu i kaka me keme i nyipë. Eni a iupi fë sileva me gool nyine ahnahna koi nyipë, haawe, apëne pi la isisinyikeu i nyipë me Baasa joxu ne Isaraela, matre tro angeic a mejë qa ngöne la nöjeng.”
20 Ame hnei Benadada hna drei Asa joxu, me upe la itre tane isi i nyidrë troa lepe la itre traon ne Isaraela. Matre hnei angatr hna thepe Ion, me Dana, me Abela-bethe-maaka, me nöjei traon ne Kinereth, memine la nöje Nafatali.
21 Matre ame hë la Baasa a drenge lai, tha eköhagene* ju hi nyidrë la traon ne Rama, ngo nyidrëti pala hi a lapa e Tireza.
22 Ame hnei Asa joxu hna hëne la nöje Iudra asë—pëkö ca ka patr—hna hë angatr troa kapa la itre etë, me itre agö hnei Baasa hna xome troa eköhagenyi* Rama. Nge Asa a huliwane jë la itre etë cili, troa eköhagenyi Geba ngöne la nöje Beniamina, me Mizepa.
23 Nge ame la mele i Asa, me etrune la catre i nyidrë, me nöjei huliwa i nyidrë, me itre traon hnei nyidrëti hna xup acatren,* hna fejan asë hnine la itus ne la mele ne la itre joxu ne Iudra. Ame hë la qatre hë Asa, hna tithe la lue ca i nyidrë hnei mec.
24 Ame hnei Asa hna meköl me itre qaaqaa i nyidrë ngöne la mec, nge hna kelemi nyidrë me angatr ngöne la Traone i Dravita, qaaqaa i nyidrë. Nge hna acili joxu Iehosafata nekö i nyidrë, troa nyihna i nyidrë.
25 Nge hna acili Nadaba nekö i Ieroboama troa joxu ne Isaraela, hmekune la hnaaluene macatre ne mus i Asa e Iudra. Hnei Nadaba hna musi koi lue macatre e Isaraela.
26 Hnei nyidrëti hna kuca la ngazo koi Iehova, me xome la thiina* ne la keme i nyidrë. Matre casi hi la itre ngazo hnei nyidrëti hna kuca me keme i nyidrë, memine la itre ngazo hna kuca hnei Isaraela fene la musi ne la keme i nyidrë.
27 Ame hnei Baasa nekö i Ahia, qa ngöne la fami i Isakara, hna tra thethi Nadaba. Matre Baasa a humuthi Nadaba ju e Gibethon, traon i angetre Filisiti. Hna traqa lai, hmekune lo Nadaba me Isaraela asë a lapa xötreithe la traone cili.
28 Baasa a humuthi nyidrëti ju, hmekune la hnaakönine macatre ne mus i Asa e Iudra. Nge hna acili joxu Baasa, troa nyihna i Nadaba.
29 Matre ame hë la Baasa a joxu, hnei nyidrëti hna humuth asë la fami Ieroboama, matre pëkö ca ka mel.* Hnei nyidrëti hna apatrenyi angatr asë, thenge lo aqane qaja i Iehova jëne Ahia hlue i nyidrëti qa Shilo.
30 Hna traqa tun, ke hnei Ieroboama hna ngazo, nge hnene la nöj hna ngazo fene la musi nyidrë, nge pine nyidrë amejëne la trenge hni i Iehova Akötresi Isaraela.
31 Nge ame la mele i Nadaba, me nöjei huliwa i nyidrë, hna fejan asë hnine la itus ne la mele ne la itre joxu ne Isaraela.
32 Tha mano kö Asa isi me Baasa Joxu ne Isaraela.
33 Ngöne la kola köni macatre ne mus i Asa joxu ne Iudra, hna acili Baasa nekö i Ahia troa joxu ne Isaraela asë. Hnei nyidrëti hna mus koi 24 lao macatre e Tireza.
34 Hnei nyidrëti hna kuca la ngazo koi Iehova, me xome la thiina i Ieroboama. Nge casi hi la itre ngazo i nyidrë me Ieroboama, me itre ngazo hnei Isaraela hna kuca fene la mus i Ieroboama.
Itre mekun ecahu fen
^ Maine, “fedre hnyawa koi.”
^ Ketre matran.
^ Ame la hnëewekë qene heberu, tre ma kolo jë a qaja la “agetrin,” nyine amamane la ewekë hna sisin.
^ Maine, “fedre hnyawa koi.”
^ Heb., “hna ahmitrötrën.”
^ Maine, “xupe hmaca.”
^ Heb., “lö pi, maine lö koi Asa joxu ne Iudra.”
^ Maine, “xupe hmaca.” Heb., “xup.”
^ Maine, “xupe hmaca.” Heb., “xup.”
^ Maine, “xupe hmaca.”
^ Heb., “xötrëne la gojeny.”
^ Maine, “pëkö ka mano.” Heb., “pëkö hnamano.”
