Pane Tus Samuela 20:1-42
20 Ame hnei Dravita hna kötre qa Naioth e Rama. Angeic a tro ju koi Ionathana me hnyingëne ka hape: “Nemene la hnenge hna kuca? Hetre ngazong? Hnenge kö hna akötrëne la keme i eö, matre nyidrëti a pi humuthi ni?”
2 Öni Ionathana jë hi: “Waea, pëkö ka troa humuthi eö! Tha tro kö eö a mec. Dreng! Thatreine kö kaka kuca la ketre ewekë, ka co maine ka tru, e tha hna pane ithanatane kö me eni. Tro kaka a juetrëne fë nemene koi ni? Thatreine jë kö nyidrë kuca tun!”
3 Ngo öni Dravita: “Atre hi keme i eö laka, ka tru catre la ihnimi eö koi ni, matre nyidrëti jë a mekune ka hape, ‘Tha tro kö a qaja koi Ionathana, wanga hace pi la hni angeic.’ Ngo qëmeke i Iehova me eö, ka tro hë ni la a mec!”
4 Matre öni Ionathana koi Dravita ka hape: “Ame asë hi la hnei eö hna qaja, tro ni a kuca koi eö.”
5 Sa jë hi Dravita ka hape: “Elanyi la treu ka hnyipixe, nge atre hi joxu laka, tro ni a xeni ngöne la laulau i nyidrë. Ngo eni a sipone troa tro koi köni drai, nge tro ni a zae ngöne la itre hlapa uti hë la heji ne la hnaakönine drai.
6 Nge e traqa ju keme i eö öhne laka, patre kö ni, hape jë koi nyidrë: ‘Hnei Dravita hna sipo ni troa canga tro Bethelema, ke fami angeic asë a aca traqa e cili ngöne la macatre, troa tro fë huuj.’
7 Nge e öni nyidrëti jë: ‘Ka loi,’ haawe, tingetinge hë ni, hlue i eö. Ngo e tro nyidrëti a elëhni, atre ju hi eö ka hape, xecie hë koi nyidrë troa humuthi ni.
8 Nge amamane pi la ihnimi nyipici eö koi ni, ke ase hë nyiso lue treme sineen isisinyikeu qëmeke i Iehova. Ngo e hetre ngazong, humuthi ni pi, ke hnauëne laka, tro eö a nue ni kowe la keme i eö?”
9 Öni Ionathana ka hape: “Thatreine kö ni troa kuca tune lai! Nge maine atre hë ni laka, kaka a thele troa akötrë eö, tro hë ni a canga thuemacanyi eö!”
10 Ngo öni Dravita ka hape: “Tro ni a atre tune kaa ka hape, ngazo la aqane sa i keme i eö?”
11 Sa jë hi Ionathana ka hape: “Jë fe, tro nyiso a pane tro kowe la itre hlapa.” Nge nyidroti a tro ju ngöne la itre hlapa.
12 Ame hnei Ionathana hna sa ka hape: “Qëmeke i Iehova, Akötresi Isaraela, tro hë ni a thel elany maine euj, troa atre la mekuna i kaka. Nge e aja i nyidrë troa wai eö, tro ni a upe la maca koi eö.
13 Ngo e kaka a pi akötrë eö, tro ni a thuemacanyi eö, matre tro eö a zae. Nge e tha kuca ha ni, loi e tro Iehova a të la ngazo koi ni. Ngo epi tro Iehova a ce me eö, tune la aqane ce me kaka hnei nyidrë.
14 Nge epi tro eö a tui Iehova, me amamane la ihnimi nyipici i eö koi ni, e mele pala kö ni, nge uti fe hë la tro na mec.
15 Sisinyi jë koi ni laka, maine tro ju hë Iehova a apatrene qa la fen la itre ithupëjia me eö, tha tro kö a patre la ihnimi nyipici eö kowe la faming.”
16 Ionathana a sisinyi jë memine la fami i Dravita me hape: “Tro Iehova a të koi itre ithupëjia me Dravita.”
17 Ame hnei Ionathana hna sipone koi Dravita matre tro nyidroti a isisinyikeu hmaca, ke lue treme sineene nyidro, nge Ionathana a hnimi Dravita ceitu me angeice* hi.
18 Thupene lai, öni Ionathana: “Elanyi la treu ka hnyipixe, nge tro lai a mama laka, patre kö eö, ke pëkö ka troa lapane la göhne i eö.
19 Ngo the qaja pala ha la hnaakönine drai. Matre loi e tro eö a tro kowe lo hnei eö hna zae lo ketre ijin.* Nge tro eö a lapa hnyawa e cili, ezine lo etë atraqatr.
20 Tro hë ni a huje la köni ane pehna ezine la ietë, kösë hetre hnenge hna pehnan.
21 Nge tro ni a upe la hlueng me hape: ‘Bëeke fë jë la köni ane pehna.’ Nge e tro ni a hape: ‘Goeën! Tha nanyi kö la köni ane pehna, hleme jë.’ Kolo lai a hape, ijiji eö troa bëek, ke qëmeke i Iehova, kolo lai a hape, pëkö nyine tro eö a xouen, ke pëkö hna mecin.
22 Ngo e traqa jë ni qaja kowe la thupëtresij ka hape: ‘Nanyi catre la köni ane pehna,’ kolo hi lai a hape, kötre pi, ke aja i Iehova tro eö a tro.
23 Haawe, epi tro Iehova a anyipicine uti hë epin, la isisinyikeu ka iothekeu nyiso lue treme sineen.”
24 Dravita a zae ju ngöne la itre hlapa, matre ame la kola mama la treu ka hnyipixe, hnei Saulo hna elë troa xen.
25 Casi pala hi la göhnë i nyidrë, ezine la ngöne uma. Nge Abinera a lapa ezi nyidrë, nge Ionathana a iqëmekekeu me Saulo. Ngo pëkö ka lapane la icea i Dravita.
26 Matre ngöne la drai cili, pëkö hnei Saulo hna qaja, ke öni angeic: ‘Ma tha hna ahmitrötrë Dravita kö, ke hna traqa la ketre ewekë. Ma eje jë hi lai, tha hna ahmitrötrë angeice kö.’
27 Ngo ngöne la drai thupene la treu ka hnyipixe, patre pala hi Dravita. Matre öni Saulo koi Ionathana ka hape: “Hnauëne laka, patre kö la nekö i Iese troa xen eidri lo, me enehila?”
28 Sa jë hi Ionathana ka hape: “Hnei Dravita hna sipo ni troa tro Bethelema.
29 Öni angeic: ‘Eni a sipo troa tro, ke kola icasikeu la faming e Bethelema troa tro fë huuj, nge kola iele ni hnene la mamang troa traqa. Matre, pane nue ni pi troa tro juetrë kowe la itre mamang.’ Haawe, hane hi lai kepin la kola patr hnei Dravita ngöne la laulau i joxu.”
30 Elëhni jë hi Saulo, nge öni nyidrë koi Ionathana ka hape: “Nekö i föe ka catre që, ame la mekuna i eö ka hape, thatre kö ni laka, eö a ce xöl memine la nekö i Iese? Eö a ahmahmanyi eö me thine i eö!*
31 Nge e mele pala kö la nekö i Iese, tha tro kö eö a cile hut memine la musi eö. Matre upi ketre jë troa thei angeic, ke loi e tro angeic a mec.”*
32 Ngo öni Ionathana koi Saulo ka hape: “Nyipëti a pi humuthi angeice fë nemen? Nemene la hnei angeic hna kuca?”
33 Nge Saulo a hna pi la jo troa jaqanyi Ionathana. Haawe, trotrohnine ju hi Ionathana laka, xecie hë koi keme i angeic troa humuthi Dravita.
34 Nge Ionathana a canga mejë jë, ke tru la elëhni i angeic. Tha xeni kö angeice la hnaaluene drai ne la treu ka hnyipixe, ke angeic a akötr pi Dravita, nge hna ahmahmanyi angeic hnei keme i angeic.
35 Ame hë lai hmakany, hnei Ionathana hna tro kowe la itre hlapa, lo hnë isapui i angeic me Dravita. Nge ce angeic me ketre hlu, ketre nekö trahmany.
36 Matre öni angeic kowe lai hlu ka hape: “Pane nyinyape pi eö koilo, nge tro ni a huji pehna, nge tro eö a bëeke fë hmaca koi ni.” Ame hnene lai hlu hna nyinyap, nge Ionathana a huji pehna catre jë matre sasaithe lai hlu.
37 Nge ame hë la nyën a traqa kowe la götrane hna mala lai ane pehna, sue jë hi Ionathana ka hape: “Nanyi catre la ane pehna!”
38 Nge öni angeice hmaca jë: “Lolo jë, the hmitr kö!” Matre hnene lai hlu hna hleme la itre ane pehna, me bëeke fë koi Ionathana.
39 Tha trotrohnine kö lai hlue la aliene la itre ewekë cili, ngo Ionathana hmekuje hi me Dravita.
40 Thupene lai, Ionathana a line pi kowe lai hlu la itre jia ne isi i angeic, nge öni angeic: “Tro jë, nge bëeke fë jë kowe la traon.”
41 Tha nanyi kö Dravita qa lai, matre ame hë la kola tro lai hlu, fetra pi hi Dravita qa kolojë hnei angeic hna zae. Nge angeic a sa iwatingöneca pi, me akönia thil e kuhu hnadro. Nge nyidroti a idremi jë, me itreijekeu, ngo tru kö la trenge treije i Dravita.
42 Öni Ionathana jë hi: “Tro jë hë memine la tingeting, ke ase hë nyiso isisinyikeu qëmeke i Iehova me hape, ‘epi tro Iehova a anyipicine uti hë epin, la isisinyikeu ka iothekeu nyiso lue treme sineen, me itre matra* i nyiso.’”
Ame hnei Dravita hna tro pi, nge hnei Ionathana hna bëeke hmaca kowe la traon.
Itre mekun ecahu fen
^ Maine, “sipu mele i angeic.”
^ Heb., “ngöne lo drai ne huliwa.”
^ Heb., “thine i eö ka cile xöe.”
^ Heb., “ke nekö ne la mec angeic.”
^ Heb., “itin.”
