Hnaaluene Tus i Aqane Lapa Itre Joxu 26:1-23
26 Nge hnene la nöje Iudra asë hna acili joxu Uzia, troa nyihnai Amazia keme i nyidrë. Nge ngöne la ijine cili, kola 16 lao macatre i Uzia.
2 Nyidrëti hi la ka xupe hmaca la traon ne Eloth, me hamëne hmaca koi Iudra, thupene la Amazia joxu a meköl ngöne la mec me itre qaaqaa i nyidrë.
3 Nge 16 lao macatre i Uzia lo kola acili joxu nyidrë. Hnei nyidrëti hna mus koi 52 lao macatre e Ierusalema. Iekolia la ëjene la thine i nyidrë, föe ne Ierusalema eahlo.
4 Hnei nyidrëti hna kuca la loi qëmeke i Iehova, tui Amazia keme i nyidrë.
5 Nge nyidrëti pala hi a thele Akötresie ngöne la ijine mele Zakaria, atre ini nyidrë troa xouene la nyipi Akötresie. Ngöne la ijine nyidrëti a thele Iehova, hnene la nyipi Akötresie hna amanathithi nyidrë.
6 Hnei nyidrëti hna tro troa isi me angetre Filisiti, me thë la itre ihag ne Gatha, me Iabene, me Asedoda. Thupene lai, hnei nyidrëti hna xupi traon e Asedoda, me ngöne la zi angetre Filisiti.
7 Nge kola xatua nyidrë hnene la nyipi Akötresie troa isi me angetre Filisiti, me angetre Arab, itre ka lapa e Gure-baala, me angetre Maon.
8 Nge hnene la angetre Amona hna nyiqaane kuiëne la mani hna athip koi Uzia. Matre hlemu catre hë Uzia uti hë e Aigupito, ke catrecatre hë nyidrë.
9 Ketre, hnei Uzia hna xupi ita ne thup e Ierusalema, ezine la qëhnelö ne la kona, me ezine la qëhnelö ne la hnathup, me ezine la nyine sajuë ihag, nge nyidrëti a xup acatrene ju.
10 Hnei nyidrëti fe hna xupe la itre ita ne thup ngöne la hnapapa, me kuji tim* (ke nyimu öni i nyidrë). Nyidrëti a kuca tune ju fe ngöne la Sefela me ngöne la itre gaa papa. Nge hetre atre eëny i nyidrë, me itre ka eënyi vin* ngöne la itre wetr, me e Karemela, ke ka pi eënyi catre nyidrë.
11 Ketre, hnei Uzia hna hnëkë trongene isi i nyidrë, me thue jia ne isi angatr. Itre lapa ne sooc a isa tro troa isi, nge hna isa eköthi angatr thenge la itre gurup. Hna e me fejane la etru i angatr hnei Ieiela lo sekreter, me Maseia, lo tane ka ixatua. Nyidroti a huliwa fene la mus i Hanania, ketre he ne nöj i joxu.
12 Matre ame la etrune la itre tixe ne lapa ka musinëne la itre sooc ka catre cili, ke ala 2600.
13 Angatr a elemekene la 307500 lao sooc, itre hna inine troa isi. Ketre trongene isi lai ka catr, nge ka xatuane la joxu troa isi me itre ithupëjia me nyidrë.
14 Nge hnei Uzia hna thue petr, me jo, me itrapetr, me nyine heetrë imano, me tane pehna, me trehle kowe la trongene isi asë.
15 E Ierusalema, hnei nyidrë hna xup la itre masin ne isi, itre hna kuca hnei itre ka inamacan. Hna acile la itre masine cili hune la itre ita ne thup, me ngöne la itre kona ne la itre ihag. Nge itre masine cili a huji ane pehna, me hna la itre etë ka tru. Celë hi matre hlemu catre pi hë Uzia e cailo, ke tru la ixatua hnei nyidrë hna kapa, nge joxu ka catre hë nyidrë.
16 Ngo ame hë la Uzia a joxu ka catr, pi tru jë hi la hni nyidrë. Celë hi ka aluzi nyidrë, matre tha nyipici hë nyidrë koi Iehova Akötresi nyidrë. Eje hi, hnei nyidrëti hna lö hnine la uma ne hmi Iehova, me dreu ka pui loi hune la ita ne dreu ka pui loi.
17 Ame hnei Azaria lo atre huuj, me 80 lao atre huuj ka catr i Iehova hna canga tro koi joxu.
18 Angatr a cile ju qëmeke i Uzia joxu me hape: “Uzia, tha ijiji nyipëti kö troa dreu ka pui loi koi Iehova. Itre atre huuj hmekuje hi la ka ijij, ke itre matra i Arona angatr, itre hna ahmitrötrën. Lö pi qa ngöne la uma ne hmi, ke tha mele nyipici hë nyipë. Nge tha tro kö Iehova Akötresie a atrunyi nyipë, pine la aqane ujë i nyipë.”
19 Ngo elëhni jë hi Uzia la nyidrë a cile fë lo nyine dreu ka pui loi qëmekene la itre atre huuj. Ame hna mama pi la lepera hune la göbadri nyidrë, hnine la uma ne hmi Iehova, ezine la ita ne dreu ka pui loi.
20 Nge ame hë la Azaria atre huuj ka sisitria, me itre xa atre huuj a goeë nyidrë, öhne ju hi angatr laka, lepera ha la göbadri nyidrë! Ame hnei angatr hna canga lö sai nyidrëti qa lai, nge nyidrëti a canga kötre lö pi, ke ase hë Iehova lepi nyidrë.
21 Nge lepera ju pë hë Uzia joxu uti hë la nyidrëti a mec. Nyidrëti a lapa ngöne la ketre uma e trön, ke tha ijiji nyidrëti hmaca kö troa lö kowe la uma ne hmi Iehova pine laka, lepera ha nyidrë. Matre Iotham nekö i nyidrë la ka musi kowe la uma i joxu, me amekötine la nöj.
22 Nge ame la mele i Uzia, hna qejepengön qane la qan uti hë la pun, hnei Isaia perofeta nekö i Amona.
23 Ame hnei Uzia hna meköl me itre qaaqaa i nyidrë ngöne la mec, nge hna kelemi nyidrë me angatr. Ngo hna kelemi nyidrëti pë hë ngöne hna kele wezipo ne la itre joxu, ke hna qaja ka hape: “Ka lepera nyidrë.” Nge hna acili joxu Iotham nekö i nyidrë, troa nyihnai nyidrë.
