Hnaaluene Tus i Aqane Lapa Itre Joxu 31:1-21
31 Thupene lai, hnene la angetre Isaraela asë ka ce traqa e cili, hna tro ngöne la itre traon ne Iudra, me apatrene la itre ipoto etë ka hmitrötr, me satrije la itre ipoto ka hmitrötr, me thëtrije la itre hnë hmi gaa hmitrötr, me itre ita ne huuj e Iudra asë me Beniamina, me e Eferaima, me Manase, uti hë la angatr a ase apatren asë. Thupene lai, hnene la angetre Isaraela asë hna isa ije kowe la itre traone i angatr, ngöne la isa hnepadro i angatr.
2 Nge hnei Hezekia hna acil la itre atre huuj, thenge la isa lapa i angatr, me angetre Levi, thenge la isa lapa i angatr. Hna isa acil la itre atre huuj me angetre Levi, thenge la isa huliwa i angatr, kowe la itre huuj ne dreuth asë, me itre huuj ne tingeting. Hna kuca tun, matre eatrëne la huliwa, me olen, me atrunyi Akötresie, ngöne la itre qëhnelö ne la itre götrane gaa pë ihakun* ne la uma i Iehova.
3 Ame la itre xa ewekë i joxu, ke hna hamën thatraqane la itre huuj ne dreuth asë, me itre huuj ne dreuth asë e hmakanyi me hej, me itre huuj ne dreuth asë e Sabath, me itre treu ka hnyipixe, me itre feet, thenge lo hna cinyihan ngöne la Wathebo i Iehova.
4 Ketre, hnei Hezekia hna amekötin kowe la itre atre Ierusalema, troa hamën kowe la itre atre huuj me angetre Levi, lo edrö i angatr thenge lo hna amekötin. Matre tro angatr a trongëne hnyawa* la wathebo i Iehova.
5 Ame ju hi la kola amekötine lai, hnei angetre Isaraela hna traqa fë atrun la itre pane wene* feja, me waina ka hnyipixe, me oel, me miel, me itre xa wenene la hlapa. Hnei angatr hna traqa fë atrun la sin* ne la nöjei ewekë asë.
6 Nge ame la angetre Isaraela me Iudra, itre ka mel ngöne la itre traon ne Iudra, hnei angatr hna traqa fë la sin* ne la itre kau, me mamoe, me sin* ne la itre ewekë ka hmitrötr, lo hna amë acon* thatraqane la hmi Iehova Akötresi angatr. Angatr a traqa fë asë pi, me kuci nyimu xawa.
7 Nge ngöne la hnaakönine treu, angatr a nyiqaane traqa fë jë la itre ahnahna i angatr me kuci xawa, uti hë la hna 7 ne treu.
8 Ame hë la Hezekia me itre he ne nöj a traqa troa wange la itre xawa, angatr a atrunyi Iehova jë, me amanathithi Isaraela nöje i nyidrë.
9 Nge hnei Hezekia hna hnyingën kowe la itre atre huuj me angetre Levi la pengöne la itre xawa cili.
10 Matre öni Azaria atre huuj ka sisitria, lo atrene la fami* Zadoka: “Qane lo angatr a nyiqaane traqa fë ahnahna kowe la uma i Iehova, hne huni pala hi hna isa xeni mej. Nge tru pe kö la munën, ke hnei Iehova hna amanathithine la nöje i nyidrë. Nge goeëne la hnënge xawa, itre munëne pe hi lai.”
11 Ame hnei Hezekia hna iup troa hnëkë hnahag nyine ami munën,* hnine la uma ne hmi Iehova, matre angatr a hnëkëne jë.
12 Nge ka nyipici pala hi la aqane traqa fë ahnahna ne la nöj, memine la sin* ne la itre ewekë, me itre ewekë ka hmitrötr. Nge hna ahnithe la nöjei ahnahna cili koi Konania atre Levi, nge Semei trejin me angeic la ka xatua angeic.
13 Nge Iehiela, me Azazia, me Nakath, me Asael, me Ieremoth, me Iozabada, me Eliela, me Isemakia, me Mahatha, me Benaia, la itre ka xatua Konania, me Simei trejin me angeic, thenge la hna amekötin hnei Hezekia joxu. Nge ame pena Azaria, angeice la atrekë hnëqane la uma ne hmi ne la nyipi Akötresie.
14 Nge ame Kore nekö i Iemina, lo atre Levi ka thupë qëhnelö götrane koië, angeic la atrekë hnëqane la itre huuj hna hamëne xanën kowe la nyipi Akötresie. Nge angeic a thawa la itre ahnahna hna hamën koi Iehova, me itre ewekë ka nyipi hmitrötr.
15 Fene la mus i nyidrë, hna acili Edena, me Miniamin, me Iesua, me Semaia, me Amaria, me Sekania, ngöne la itre traon ne la itre atre huuj, matre cilën la huliwa hna mejiune kow. Qa i angatr troa thawa ceitun la itre ewekë, kowe la itre trejin me angatr qa ngöne la isa lapa. Troa ceitu la aqane kepe ewekë hnene la itre lapa ka tru, me itre lapa ka co.
16 Kolo lai a nyixane la hna thawa koi angetre Levi,* lo itre hna siji ëjen ngöne la itre itus ne la itre xötr atr, nge ka traqa e nöjei drai troa huliwa hnine la uma ne hmi Iehova, me eatrëne la hnëqa hna athip kowe la lapa i angatr, me kowe la itre nekö i angatr ka köni macatre a tro draië.
17 Hna siji ëjene la itre xötre atre huuj, thenge la itre lapa. Hna tune fe koi angetre Levi ka 20 lao macatre a tro draië, nge hna kuca thenge la hnëqa hna athip kowe la isa lapa i angatr.
18 Kolo fe a e la itre föi angatr, me itre nekö i angatr, trahmanyi me jajiny, uti fe hë la itre ka co, nöjei atrene la lapa. Nge pine laka, angatr a cilëne la hnëqa hna mejiune kow, angatr a thupëne troa hmitrötr pala hi, matre eatrën hnyawa la huliwa ka hmitrötr i angatr.
19 Nge hna siji ëjene fe la itre matra i Arona, me itre atre huuj ka lapa ngöne la itre hnepadro* ezine la itre traone i angatr. Ngöne la nöjei traon, hna iën me qeje ëjene la itre xa trahmany, matre thewe xen kowe la itre atre huuj, me nöjei atr hna siji ëjen ngöne la itre itus ne la itre xötr atr i angetre Levi.
20 Hnei Hezekia hna kuca tun e Iudra asë, nge hnei nyidrëti pala hi hna kuca la loi memine la ka meköt qëmeke i Iehova Akötresi nyidrë. Hnei Hezekia hna mele nyipici koi Akötresie.
21 Nge ame la nöjei ewekë hnei nyidrëti hna kuca troa thele la Akötresi nyidrë, qane la huliwa hnine la uma ne hmi ne la nyipi Akötresie, uti hë la itre Wathebo me itre hna amekötin, hnei nyidrë hna kuca asë qa kuhu hni, nge hna eatr asë la itre huliwa i nyidrë.
Itre mekun ecahu fen
^ Heb., “lapa.”
^ Maine, “nu asë.”
^ Wange ju la HQP.
^ Ene, 1/10.
^ Ene, 1/10.
^ Ene, 1/10.
^ Heb., “ahmitrötrën.”
^ Heb., “hnalapa.”
^ Maine, “hnë xen.”
^ Ene, 1/10.
^ Heb., “trahmany.”
^ Heb., “hna axö öni.”
