Hnaaluene Tus Kowe La Angetre Korinito 11:1-33
11 Ngacama ceitunge me ketre hmo, ngo ajange tro nyipunieti a pane xomihni ni. Ngo eje hi, nyipunieti a xomihni ni.
2 Ke eni a zalu göi nyipunie, nge zalu lai qaathei Akötresie. Ke ase hë ni othi nyipunie troa faipoipo me ketre trahmany, hnenge hna tro sai nyipunie kösë jajinyi ka pë ethan koi Keriso.
3 Ngo eni pe a xouene wanga tune lo aqane iaö Eva hnene la un, tro fe a angazone la itre mekuna i nyipunie, me apatrene la ihnim ka wië me nyipici i nyipunie koi Keriso.
4 Matre e hetre ka cainöjëne la ketre Keriso, lo tha hne huni hna cainöjën, maine kapa la ua, lo tha hnei nyipunieti hna kapa, maine tro fë la maca ka loi, lo tha hnei nyipunieti hna kapa, nyipunieti hi lai a canga drei angeic.
5 Ngo eni a mekun, pëkö ketre ewekë ka amamane ka hape, ka co ni hune la itre aposetolo i nyipunie ka tru talan.
6 Nge ngacama thatreine hnyawa kö ni cile fë cainöj, ngo tha hna tune kö göne la atrehmekun; ke ase hë huni amamane lai koi nyipunie ngöne la nöjei ewekë asë.
7 Hnenge hna madrine troa tro fë gufane koi nyipunie la maca ka loi i Akötresie. Matre hapeu, ka ngazo ni pine ni ipië matre draië jë nyipunie?
8 Hnenge hna apë ewekëne* la itre xa ekalesia ke hnenge hna kapa la ixatua i angatr, matre atreine jë ni nyihlue i nyipunie.
9 Matre ame lo eni thei nyipunie, nge hetre ka pë theng, tha hnenge kö hna nyi ehnefe i ketre, ke hnene la itre trejin ka traqa qaa Makedonia hna hamën atrun koi ni matre hetrenyi asë jë ni. Nyipici, ngöne la nöjei ewekë, hnenge hna thupën wanga nyi ehnefe i nyipunieti jë, nge tro pala pë hë ni a kuca tun.
10 Nge e tro pala hi ni a xötrethenge Keriso, tro pala kö ni a selë ni pine lai ngöne la nöjei götran e Akaia.
11 Ngo hnauëne la eni a xele ma kepe ixatua qaathei nyipunie? Hnene laka, pëkö ihniming koi nyipunie? Waea, öhne kö Akötresieti la ihniminge koi nyipunie.
12 Hetre itre xan ka selëne ka hape, itre aposetolo angatr tui eahun. Celë hi matre tro pala hi ni a kuca la hnenge hna kuca ha, matre tha tro kö ni a nyi jë i angatr troa sipu selë angatr.
13 Ke itre aposetolo thoi angatr, itretre huliwa iaö, me nyi aposetolo i Keriso.
14 Nge tha sesëkötre kö së, ke Satana a nyi angela ne lai.
15 Haawe, ketre tha sesëkötre kö së laka, itretre huliwa koi angeic a nyi atre huliwa kowe la meköt. Ngo tro kö a ihmeku la pune koi angatr, memine la itre huliwa i angatr.
16 Eni hmaca a qaja: Loi e tha tro kö ketre a mekune ka hape, hmo ni. Ngo maine aqane mekun i nyipunieti hi lai, haawe, kepe ni ju tune la ketre hmo, matre tro fe ni a ketre selë ni.
17 Nge tha eni kö a xötrethenge Joxu la eni a qaja lai, ngo eni pe a qene hmo, me ithanata tune la atre mejiune koi angeice kö.
18 Nge pine laka, ala nyimu la itre ka sipu iselë ngöne la ngönetrei, ketre tro fe ni a hane selë ni.
19 Ngo pine laka, ka inamacane catre nyipunie, tha jole kö lai koi nyipunie troa ce me itre hmo.
20 Nyipici, atreine pi hë nyipunieti xomihnine la itretre thahluë nyipunie, me ulume la itre ewekë i nyipunie, me atrekënö nyipunie, me thaipië nyipunie, me xe la itre iluemeke i nyipunie.
21 Ngo eni a qaja lai nyine ahmahmanyi hun, ke kösë hne huni hna pujehnine troa elemeken.
Ngo pine laka, tha hmahma kö itre xane troa sipu selë angatr, ketre tha tro fe ni lai a hane hmahma troa sipu selë ni, ngacama itre xan a mekune ka hape, hmo ni.
22 Angetre Heberu angatr? Ketre tunge fe. Angetre Isaraela angatr? Eni fe hi la ketre. Itre matra* i Aberahama angatr? Nga tunge hi.
23 Nge angatre la itre hlue i Keriso? Eni a sa tune la hmo, pëkö pengöi angatre lai hui eni: Tru catre kö la itre huliwang, nge hna anyimua akalabusi ni hui angatr, nge hna anyimua lepi ni, nge anyimua qëmeke ni kowe la mec.
24 Ketre, ame lo faif lao ijine kola lepi ni hnei angetre Iudra, hna athötre naene lao hna koi ni.
25 Nge hna akönia lepi ni hnei jia, nge hna aca tranyi ni hnei etë, nge hna akönia lö la heeng matre hnenge hna manij e hnahedr a ca jidr nge ca lai.
26 Nge ngöne la itre trongeng, hnenge pala hi hna qëmeke kowe la mec pine la itre hneopegejë, me itre atrekënö, me itre atrene la nöjeng, me itre xa nöj, nge hnine la itre traon, me hnapapa, me hnagejë, me nyipine la itre trejine thoi,
27 nge qa ngöne laka, hnenge hna catre huliwa me hnehengazo, me anyimua hlë jidr, me pi xen me pi ij, me pë xen, me hnötr, me pë iheetr.*
28 Itre ewekë lai tröne la ngönetrei, ngo e hnin, hetre ketre ewekë ka lapane la hning o drai:* Eni a hnehengazone la itre ekalesia.
29 Ke drei la ka kucakuca nge tha kucakuca kö ni? Nge drei la ka kei nge tha elëhni kö ni?
30 Nge e traqa jë ni sipu selë ni, tro ni a selëne la itre ewekë ka amamane la itre triang.
31 Nge ame la Akötresie me Keme i Iesu Joxu, lo nyine troa atrun epine palua, atre kö nyidrë ka hape, tha eni kö a thoi.
32 E Damaseko lo, hnene la gavena me Areta joxu, hna upe la itretre thup troa thupëne la itre qëhnelö ne la traon matre xolouthi ni.
33 Ngo qa ngöne la ketre mamala ne la itra etë, hna autinyi ni hnine la ketre treng,* ene pe, mele pi ni.
Itre mekun ecahu fen
^ Ger., “atrekënö.”
^ Maine, “itin.”
^ Ger., “tro xöe.”
^ Maine, “ajolëne la hning.”
^ Maine, “ti itreng.”
