Hnaaluene Tus i Samuela 17:1-29
17 Ahitofela a qaja jë koi Abasaloma ka hape: “Pane nue ni pi troa xome la 12 000 lao soc, me huzu Dravita la jidri celë.
2 Tro ni a asesëkötrë angeic, me lepi angeic e kola kucakuca me pë trengecatr.* Nge tro ni a amejëne la xou hnine la lapa i angeic, nge tro la itre atre i angeic a isa kötr, nge tro hi ni a humuthi Dravita.
3 Thupene lai, tro ni a abëekëne koi nyipë la itre atre i angeic. Ke e meci hë la atr hnei nyipëti hna thel, tro hë la itre sinexöle i angeic a bëeke koi nyipë, nge tro la nöj a tingeting.”
4 Nge hnei Abasaloma me itre qatr ne Isaraela, hna kapa madrine la hna qaja hnei Ahitofela.
5 Ngo öni Abasaloma ka hape: “Hë Husai jë fe, lo atre Areki, nge tro sa hnyingëne la mekuna i angeic.”
6 Husai a lö jë koi Abasaloma, nge Abasaloma a qaja jë koi angeic la hna qaja hnei Ahitofela. Thupene lai, öni Abasaloma: “Tro kö sa trongëne la hnei angeic hna qaja? Nge maine waea, qaja jë hö la nyine tro sa kuca.”
7 Ame hnei Husai hna qaja koi Abasaloma ka hape: “Tha loi kö la hna qaja hnei Ahitofela!”
8 Öni Husai hmaca: “Atre hnyawa hi nyipë laka, ame la keme i nyipë me itre atre i angeic, tre itre soc ka catr. Nge pëkö ka atreine cile koi angatr, ceitu i angatr me ithinene bea ka thele* la ha nekön e helep. Nge ketre atre isi la keme i nyipë, matre tha tro jë kö angeice lai a meköl nyipine la lapa.
9 Ma keme i nyipëti a zae hnine la ngönemenyi, maine ngöne la ketre götrane pena. Nge e tro la keme i nyipëti a pane isi, tro hë la itre ka drei mejen a hape, ‘Ase hë ngaane la itre soce i Abasaloma!’
10 Matre ame ju fe la atre ka catr, lo ka hni ne liona, tro fe hë angeic a xou me pë trengecatr. Ke atre hi Isaraela asë ka hape, atre ka catre la keme i nyipë, nge ka catre fe la itre sinexöle i angeic.
11 Matre hane hi la eamong. Acasine jë la nöjei atre Isaraela, qaane Dana uti hë Bere-Seba. Loi e tro angatr a ala nyim, tune la itre wene ngöni ne ngönegejë. Nge ame nyipë, weje meke i angatre jë ngöne la isi.
12 Kötre ju hë Dravita, ngo tro pala kö sa lepi angeic. Tro sa ce uti koi angeic, tune la aqane uti la wene lepanyi kowe la ihnadro. Pëkö ala cas ngöne la lapa i angeic ka troa mele pe, angeic me itre soce i angeic.
13 Nge e traqa jë angeic zae hnine la ketre traon, tro angetre Isaraela asë a traqa fë eno, nge tro sa hule zozone la traone cili uti hë la hnathup, nge goi tha tro fe a cile la ketre wene etë.”
14 Ame hnei Abasaloma me nöjei atre Isaraela ka ce me angeic hna qaja ka hape: “Sisitria kö la eamo i Husai atre Areki hune la eamo i Ahitofela!” Eje hi, ase hë Iehova mekune* troa atriane la eamo i Ahitofela, ngacama eamo ka lolo hi. Aja i Iehova troa axulune la ngazo koi Abasaloma.
15 Thupene lai, Husai a tro ju koi Zadoka me Abiathara lue atre huuj. Nge angeic a thuemacanyi nyidro la eamo i Ahitofela koi Abasaloma, me itre qatr ne Isaraela. Nge angeic a qaja ju fe la eamo i angeic.
16 Nge öni angeic: “Canga thuemacanyi Dravita jë ka hape, ‘Edrae hej, the lapa kö ngöne la hnapapa, ezine la gaa tëtë* ne la Hneopegejë Ioridrano. Loi e tro nyipë a canga sasaithe la hneopegejë, wanga troa apatrenyi* nyipë me itre sinatronge i nyipë.’”
17 Nge Ionathana me Ahimaza a itreqe e Eni-Rogel, ke wanga öhnyi nyidroti jë hnine la traon. Matre hnene la ketre jajiny ka nyihlu, hna tro fë maca koi nyidro, nge tro pë hë nyidroti a tro fë koi Dravita joxu.
18 Ngo öhnyi nyidroti ju hi hnene la ketre nekö trahmany, nge angeic a canga tro ju troa qajaqaja koi Abasaloma. Qa ngöne lai, hnei Ionathana me Ahimaza hna canga kötr. Traqa ju hi nyidro e Bahurim, thene la ketre trahmany ka hetre tim hna kuj. Matre nyidroti a zae ju hnine lai tim hna kuj.
19 Nge hnene la föe ne la trahmanyi cili hna thinge hnei balaiketr la tim hna kuj, nge angeic a kuiekuiëne pi la itre wene feja hune la ibalaiketr. Pëkö ca ka öhn.
20 Matre ame hë la itre hlue i Abasaloma a traqa kowe lai föe, öni angatr: “Ekaa Ahimaza me Ionathana?” Önine lai föe: “Qa i nyidroti hi la, nge koilo hmaca ha kowe la hneopegejë.” Angatr a thele nyidroti ju, ngo tha öhnyi nyidroti ju kö. Matre angatr a bëeke hmaca jë a tro Ierusalema.
21 Thupene la hna tro hnene la itre hlue i Abasaloma, hnei Ionathana me Ahimaza hna elë hmaca qa hnine la tim hna kuj troa thuemacanyi Dravita joxu. Öni nyidro: “Loi e tro epuni a canga sasaithe la hneopegejë.” Nge nyidroti a qaja jë koi Dravita lo hnei Ahitofela hna mekune troa kuca.
22 Ame hnei Dravita me itre sinatronge i nyidrë hna canga mejë, me sasaithe la Ioridrano. Matre ame hë e hmahmakany, ase hë angatr asë sasaith la hneopegejë.
23 Ame hë la Ahitofela a drenge laka, tha trongëne kö la eamo i angeic, angeic a ati biritine ju la boliko i angeic, me bëeke kowe la hnalapa i angeic, me traone i angeic. Nge thupene la hna pane hamë ithanata kowe la fami i angeic, angeic a hnöjua ju. Aqane meci angeice hi lai, nge hna kelemi angeic hnine la hua ne la itre qaaqaa i angeic.
24 Ame hnei Dravita hna traqa e Mahanaima, nge Abasaloma a sasaithe la Ioridrano me itre soce i Isaraela asë.
25 Abasaloma a acili Amasa jë troa tane la itre soc, matre nyihna i Ioaba. Nge Amasa la nekö i Abigaila, me ketre trahmanyi hna hëne ka hape, Iathara, atre Isaraela. Abigaila la nekö i Nahasa, jini Zeruia lo thine Ioaba.
26 Abasaloma me itre soc ne Isaraela a acile ju la lapa i angatr e Gileada.
27 Nge ame ju hi la Dravita a traqa e Mahanaima, hnei Sobi nekö i Nahasa qa Raba i angetre Amona, me Makiri nekö i Amiela qa Lodeba, me Bazilai atre Gileada qa Rogel,
28 hna traqa fë ili, me itre pala ka jui, me itre trengen hna xup hnei dro ka fedr, me qitr, me bali, me farin, me itre wene feja hna dreudreuth, me wen ariko, me wene lati, me itre xa feja ka qaqacil,
29 me miel, me batra, me mamoe, me fromaz.* Angatr a hamëne pi koi Dravita me itre sinatronge i nyidrë, matre tro angatr a xen. Ke öni angatr: “Ma nyudreni a kucakuca, me mecijiin, me pi ij ngöne la hnapapa celë.”
Itre mekun ecahu fen
^ Maine, “pë trengecatr ngöne lue im.”
^ Maine, “haitre la mel.”
^ Maine, “amekötin.”
^ Maine jë, “ngöne ga paapa.”
^ Heb., “ulum.”
^ Heb., “meleke i kau ka nyiqaane pui hmëz.”
