Hnaaluene Tus i Samuela 5:1-25
5 E thupen, hnene la nöjei tribu ne Isaraela hna traqa koi Dravita e Heberona me hape: “Atre hi nyipë laka, casi hi la madra së.
2 Ame lo Saulo a musi koi hun, nyipëti la ka elemeken* la itre trongene isi i Isaraela, nge hnei Iehova hna qaja koi nyipë ka hape, ‘Eö la ka troa thupëne la nöjeng Isaraela, nge tro hë eö a tane la nöje Isaraela.’”
3 Nge hnene la nöjei qatr ne Isaraela hna tro koi Dravita joxu e Heberona. Nge hnene la joxu hna isisinyikeu me angatr qëmeke i Iehova. Thupene lai, angatr a ië* Dravita jë troa joxu ne Isaraela.
4 Nge 30 lao macatre i Dravita lo kola acili joxu nyidrë. Hnei nyidrëti hna musi koi 40 lao macatre.
5 Matre ngöne la 7 lao macatre nge 6 lao treu, hnei Dravita hna musi e Heberona kowe la nöje Iudra. Nge ngöne la 33 lao macatre, hnei angeic hna musi e Ierusalema kowe la nöje Iudra me Isaraela.
6 Nge ngöne la ketre drai, hnei Dravita me itre soce i nyidrë hna tro Ierusalema, me isi me angetre Iebusi, lo itre atrekë nöjen. Nge angetre Iebusi a hnyimasai Dravita jë me hape: “Tha tro kö eö a hane lö hnine la traone celë! Nge goi tro fe la itre timek, me itre ka peje ca a atreine helë eö.” Angatre a mekune laka, ‘thatreine kö Dravita thapa la nöje i angatr.’
7 Ngo hnei Dravita pe hna thapa la ihag atraqatr ne Ziona, nge hna hën enehila ka hape, Traone i Dravita.
8 Ngöne la drai cili, öni Dravita: “Tro la itre soc a lepe la angetre Iebusi, me lö qa ngöne la jë i tim ne la traon, me humuthe la ‘itre timek me itre ka peje ca,’ lo hnenge hna methinën.” Qa cili hi lo trengewekë hna hape: “The tro kö la itre timek me itre ka peje ca a lö hnine la uma.”
9 Nge Dravita a lapa ju nyipine la ihag atraqatr, lo hna hën* e thupen ka hape, Traone i Dravita. Nge Dravita a nyiqaane xupe trongën qa ngöne lo Hna Jë,* uti hë e cahu nyipin.
10 Haawe, kolo pala hi a hlemu catr hnei Dravita, nge ce Iehova me angeic, lo Akötresie ne la itre trongene isi e hnengödrai.
11 Hnei Hirama, joxu ne Turo, hna upe la itre atre tro fë maca koi Dravita, me iupi fë sinöe arasi,* me itre ka tratrau sinöe, me itre ka thupe etë nyine xupi ngöne uma. Angatr a nyiqaane xupi hnalapa* i Dravita jë.
12 Qa ngöne lai, xecie hnyawa ju hi koi Dravita laka, hnei Iehova hna acatrene la musi angeic e Isaraela, nge nyidrëti a atrune la baselaia i Dravita, pi Isaraela nöje i nyidrë.
13 Thupene la Dravita a tro qa Heberona me traqa e Ierusalema, hnei nyidrëti hmaca hna xomi föe, me itre xa föe, matre hnahone pi hi la itre xa nekö i nyidrë, trahmanyi me jajiny.
14 Hane hi la ëjene la itre xa nekö i Dravita trahmany, ka mala e Ierusalema: Samua, Sobab, Nathana, Solomona,
15 Ibara, Elisua, Nefega, Iafia,
16 Elisama, Eliada, me Elifelet.
17 Ame hë la angetre Filisiti a drenge laka, joxu hë Dravita hui Isaraela, angatr a thele Dravita jë. Nge ame hë la Dravita a drenge lai, nyidrëti a zae ju hnine la ketre hunapo.
18 Matre ame hë la angetre Filisiti a traqa, angatr a isa cilë göhnene jë ngöne la Hnathup* e Refai.
19 Nge Dravita a hnyinge jë koi Iehova ka hape: “Tro kö ni a isi me angetre Filisiti? Tro kö nyipëti a xatua ni troa lepi angatr?” Sa jë hi Iehova ka hape: “Tro jë, ke tro ni a xatua eö troa lepi angatr.”
20 Dravita a tro ju a tro Baala-Farez, nge e cili hi la nyidrëti a ngaa angetre Filisiti. Matre öni Dravita: “Tune la hneopegejë ka catr, hnei Iehova hna thawaluëne la itre xötre soc ne la itre ithupëjiang.” Celë hi matre angeic a hëne jë la götrane cili ka hape, Baala-Farez.*
21 Ke hnene la angetre Filisiti hna nuetrije la itre idrola i angatr, nge hnei Dravita me itre soce i nyidrë hna hlem itre ej.
22 E thupen, hnei angetre Filisiti hmaca hna traqa me haöthe la hnathup* e Refaim.
23 Matre Dravita a hnyinge hmaca jë koi Iehova, nge öni nyidrë: “The qëmeke kö koi angatr, ngo tro eö a pane kanothi angatr. Pane tro ju hutrö i angatr, nge lepi angatre jë qa hutrö, qëmekene lo itre isinöe baka.
24 Nge e drenge hë eö la mejene soc ka tro nyipine la itre baka, sesë pi troa lepi angatr, ke Iehova a tro pa troa lepi angetre Filisiti.”
25 Dravita a trongëne jë la hna qaja hnei Iehova, nge hna nyiqaane lepi angetre Filisiti qaa Geba uti hë Gezera.
Itre mekun ecahu fen
^ Heb., “atre trosai, me atre ilösai e Isaraela.”
^ Heb., “nei oel.”
^ Maine jë, “angeic a hëne jë ka hape.”
^ Maine, “Milo,” qene heberu kola hape, “nyialien.”
^ Ketre sinöe.
^ Maine, “hnalapa i joxu.”
^ Maine, “Gaa Paapa.”
^ Kola hape, “Maseta ne fe gojeny.”
^ Maine, “Gaa Paapa.”
