Itre Edromë 18:1-24
18 Ame la ka xele ma wai atr, angeic a thele la itre sipu aja i angeic;Angeic a methinëne* la itre aqane huliwa inamacan.
2 Ame la atr ka hmo, tha aja i angeice kö la trotrohnin;Aja i angeice pe troa qaja amamane la aliene hni i angeic.
3 Kola ce xulu la atr ka iakötrë memine la imethinë,Nge kola ce traqa la hmahma memine la ithaipië.
4 Itre timi ka jui la itre trengewekë ne la atr.
Hneopegejë ka cua la qeqe ne la inamacan.
5 Tha ka loi kö troa wangatrune la atr ka ngazoMe cipane la itre emekötine la atr ka meköt.
6 Ame la itre trengewekë ne la hmo, ke ka axulune la iwesitrë,Nge që i angeic a ukune la itre xan troa lepi angeic.
7 Ame la që ne la hmo, ke ka ahnëjinë angeic,Nge ketre theth kowe la mele i angeic, la ukeineqë i angeic.
8 Ame la itre trengewekë ne la ka silitrengathoi, ke ceitu me xen ka hnyapa;*Hne së hna ulum nge ka uti meköt kowe la itrengenan.
9 Ame la atr ka geny ngöne la huliwa i angeicKe angeic la trejin memine la atre axulune la hnëjin.
10 Ita ne thup ka catr la ëje i Iehova.
Hnë kötre zae* ne la atr ka meköt.
11 Ame la itre ewekë ka tru thupen ne la trenamo, ke celë hi traone i angeic ka catr;Ame koi angeic, ceitun ej me ketre ihag ka thupë angeic.
12 Ame la pi tru ngöne la hni ne la atr, ke ka xomi angeic kowe la hnëjin,Nge ipië a xomi angeic kowe la lolo.
13 Ame la atr ka canga ithanata, ngo tha ka pane atre hnyawa kö la jol,Ke ka hmo lai nge nyine hmahman.
14 Tro la itre mekun ka loi ne la atr, a xatua angeic la angeic a wezipo,Ngo drei la ka atreine xomihnine la itre mekun ka hleuhleu?*
15 Kola nyixan la hni ne la atr ka trotrohnin hnene la atrehmekun,Nge kola thel la atrehmekun hnene la hnangenyë ne la ka inamacan.
16 Ame la ahnahna ne la atr, ke kola fe gojenyi angeic;Kola thue jë i angeic kowe la itre atr ka hlemu.
17 Ame la ka pane qaja la mekuna i angeic, ke kösë nyipici angeice hi,Uti hë la kola traqa la hna upezön, me upi angeic troa anyipicine* la hna qaja.
18 Ame la troa uthidrönegöti, ke kola apëne la iwesitrëMe aisane la itre ithupëjia ka catr.
19 Hmaloi ju kö la troa thapa la ketre traon hna eköhagen, hune la troa aupune la trejin hna akötrën,Ceitune hi la itre iwesitrë memine la itre agö ka thinge la qëhnelö ne la traon ka catr.
20 Tro ha nyialiene la hni ne la atr hnene la itre trengewekë ka tro qa ngöne la që i angeic;Tro hë angeic a mej hnene la itre ithanata ka tro qa ngöne la që i angeic.
21 Ame la mec me mel, ke lue eje fene la musi ne la thinem;Ame la itre ka ajan troa huliwan ej, ke tro kö angatr a kepe thangan.
22 Ame la atre öhne la föe ka loi thiina, ke kola öhne la ketre trengamo,Nge kola kepe angeic hnei Iehova.
23 Kola xëwe hnene la ka pë ewekë,Ngo kola sa akötrën hnene la trenamo.
24 Hetre itre sinatro ka iwajahuj,Ngo hetre sinee ka ihnim catre kö hune la sipu trejin.
Itre mekun ecahu fen
^ Maine, “xele ma wang.”
^ Maine, “hna ajan troa canga ulum.”
^ Heb., “hna adraiën,” kola hape, thatreine kö troa ketri angeic.
^ Maine, “pë hë aliene la mele i angeic.”
^ Maine, “sine thel.”
