Itre Edromë 8:1-36
8 Hapeu, tha inamacane kö la ka hë?
Tha trotrohnine kö la ka ithanata catr?*
2 Ngöne la itre gaa draië me e cahu gojeny,Ej a cil ezine la hna ijejea.
3 Ezine la itre qanahag ne la traon,Ngöne la hnë lö,Eje pala hi a sue catr:
4 “Eni a hë epuni asë itre atr;Eni a ithanata koi epuni asë.*
5 Ame epun itre ka majemin kapa asë la hna qaja, inine jë troa hmek;Ame epun itre hmo, inine jë la trotrohnin.*
6 Drenge ju, ke ka nyipiewekë la hnenge hna qaja,Kola qejepengöne la meköt hnene la ukeineqëng;
7 Ke kola uliline la nyipici hnene la qëng,Nge kola methinëne la iakötrë hnene la ukeineqëng.
8 Ka meköt asë la itre trengewekë ne la qëng.
Pëkö hnepe iaö maine thoi.
9 Ka lualai asë kowe la itre ka atreine waiewekëNge ka meköt asë kowe la itre ka öhne la atrehmekun.
10 Iëne jë la ihajing* hune la sileva,Memine la atrehmekun hune la nyipi gool,
11 Ke sisitria kö la inamacan hune la itre korai;*Pëkö ketre ewekë ka atreine weje la esisitrian ej.
12 Eni inamacan a ce lapa memine la ka hmek;Öhne hë ni la atrehmekun memine la atreine thelewekë.
13 Ame la xoue Iehova, ke ene la troa sisine la ngazo.
Methinge la catre që, me pi tru, memine la aqane ujë ka ngazo, me itre trengewekë ka iakötrë.
14 Eje theng la itre eamo ka lolo, memine la atreine troa huliwane la inamacan;Ewekënge la trotrohnin memine la men.
15 Jëne ni, itre joxu pala hi a mus,Nge itre he ne nöj a acile la itre wathebo ka meköt.
16 Jëne ni, itre nekö i joxu pala hi a cilëne la itre hnëqa i angatr,Nge itre tan a amekötin cememine la meköt.
17 Ka tru koi ni la itre ka hnimi ni,Nge tro la itre ka thele ni a öhnyi ni.
18 Eje theng la trenamo me iatruny,Itre mo ka cile hut* memine la meköt.
19 Ame la hnenge hna troa hamën, ke ka sisitria kö hune la gool, hune la nyipi gool,Nge ame la hnenge hna traqa fë, ke ka sisitria kö hune la nyipi sileva.
20 Eni a trongëne la hmene gojenyi hna musinën hnene la meköt,Nyipine la itre gojenyi laka, hna metrötrëne la meköt;
21 Eni a hamëne la edrö ka mingöming kowe la itre ka hnimi ni,Nge eni a nyialiene la itre hna ami xen i angatr.
22 Hnei Iehova hna xupi ni, kösë eni la hnei nyidrëti hna pane xup,Ene la huliwa i nyidrë ka hekö catre kö.
23 Qaane hë ekö, hna acili ni ngöne la hnëqang,Qaane lo qaan, qëmeken troa xupe la ihnadro.
24 Hna hnaho ni lo ijine pë pala kö hnagejë ka jui,Pë pala kö qeqe ne tim ka cua qa kuhu hnadro.
25 Qëmeken troa acile la itre wetrMe itre sasala, ase hë hnaho ni,
26 Tha ase pala kö nyidrëti xupe la ihnadro memine la itre hlapaMaine pena, lo pane trepadro.
27 Eni fe hë la, lo ijine nyidrëti a hnëkëne la hnengödrai;Lo ijine nyidrëti a sija amë la ifego* ne la hnengödrai me hnagejë,
28 Lo nyidrëti a amë* la itre iaw e koho,Me xupe la itre qeqe ne tim ka jui,
29 Lo nyidrëti a hamëne la ketre hna amekötin kowe la hnagejëMe wathebon ej troa sasaith la hnei nyidrëti hna qaja,Lo ijine nyidrëti a ami* trepene la ihnadro,
30 Ke ce eni me nyidrë tune la atre huliwa ka maca.
Eni lo hnei nyidrëti hna hnime catrën e nöjei drai;Hnenge pala hi hna madrin qëmekei nyidrë;
31 Hnenge hna madrin göne la ihnadro, ke ijije hë troa lapan ej,Nge hnime catre ni la itre nekö i atr.*
32 Nge itre nekönge fe, drei ni ju enehila;Eje hi, madrine la itre ka trongëne la hnenge hna amekötin.
33 Kapa ju la ihaji nge inamacane pi,Nge the methinën eje kö uti hë epin.
34 Madrine la atr ka isin troa drei niKa canga traqa e hmahmakanyi ngöne la qëhnelöng e nöjei drai,*Ka itreqe ezine la hnë lö ne la umang;
35 Ke ame la atre öhnyi ni, ke tro ha öhne la mel,Nge tro ha kepe angeic hnei Iehova.
36 Ngo ame la ka xele ma drei ni, angeice a sipu akötrë angeice kö,Nge ame la itre ka methinë ni, angatr a ajane la mec.”
Itre mekun ecahu fen
^ Maine, “atreine waiewekë.”
^ Heb., “itre nekö i atr.”
^ Heb., “Trotrohnine ju la hni.”
^ Wange ju la HQP.
^ Maine, “agojij.” Wange ju la HQP.
^ Maine, “edrö.”
^ Heb., “sija la ketre raon.”
^ Heb., “acatren.”
^ Maine, “acil.”
^ Maine, “itre atr.”
^ Maine, “ka hmek ezin.”
