Daniela 5:1-31
5 Hnei Belesaza joxu hna kuca la ketre feet ka tru kowe la 1 000 lao he ne nöj, nge hnei nyidrëti hna iji waina qëmekei angatr.
2 Pine laka, traqa hë la thangane waina koi Belesaza, matre hnei nyidrëti hna iup troa traqa fë la itre trengen hna kuca hnei gool me sileva, lo hnei Nebukaneza keme i angeic hna xom qa ngöne la uma ne hmi e Ierusalema. Nyidrëti a pi ijin* la itre ewekë cili memine la itre he ne nöj, me itre hanyi i nyidrë, me itre xaa föi nyidrë.
3 Ame hna traqa fë pi la itre trengen hna kuca hnei gool, lo hna xom qa ngöne la uma ne hmi i Akötresie e Ierusalema, matre hnene pë hë la joxu hna ijin,* me itre he ne nöj, me itre hanyi i nyidrë, me itre xaa föi nyidrë.
4 Hnei angatre hna iji waina, me atrune la itre haze hna kuca hnei gool, me sileva, me kopa, me fao, me sinöe, me etë.
5 Haawe, mama pi hi la iwanakoime i atr, kola cinyany ngöne la ngöne uma i joxu, qëmekene la ita ne laam. Nge hnene la joxu hna öhne la iwanakoim e cinyany.
6 Nge wië qatresi* ju hi nyidrë, ke meci hë nyidrëti hnei xou pine la itre mekuna i nyidrë; ame hna hmengöhmengöne la gö i nyidrë, nge hna ijengekeune la lue iwatingöneca i nyidrë.
7 Matre hnene pë hë la joxu hna sue troa alöne la angetre Kaledaia,* me itre ka goeëne la itre wëtresij, me itre ka ithanata me itre u, nge öni nyidrë kowe la itre ka inamacan e Babulona: “Ame la atr ka atreine troa e la hna cinyanyin e caha, me qejepengön, tro ha heetrë angeic hnei iheetr ka madra, me afena angeic hnei fini ceine gool, nge tro hë angeic a cilën la hnaakönine göhnë ka sisitria ne la baselaia.”
8 Ame hna isa lö hnene la itre ka inamacane i joxu, ngazo pe, thatreine kö angatr e la hna cinyanyin me qejepengön koi joxu.
9 Ame hna meci hnei xou hnei Belesaza joxu, matre wië qatresi pi hi nyidrë; nge ame lo itre he ne nöj i nyidrë, angatr a pe hi a igoeny.
10 Ame ju hi la kola drei mejen hnene la isola la hna qaja hnei joxu me itre he ne nöj, hnei eahlo hna lö kowe la hna feet, me hape: “Epi tro nyipëti a mel epine palua joxu. The nue kö la itre mekuna i nyipë troa axouenyi nyipë, nge epi troa lolo hmaca la iqëmeke i nyipë.
11 Ke ngöne la baselaia i nyipë, hetre ketre atr* ka kapa la ua ne la itre haze ka hmitrötr. Ame lo mele pala kö la keme i nyipë, hna öhne thene la atr cili la aqane waiewekë ka lolo, memine la atreine thele ewekë, memine la inamacan ka tune la inamacanen la itre haze. Nge hnene lo keme i nyipë, Nebukaneza joxu hna acili angeic troa tane la itre atre huuj ka kuci iöni, itre ka ithanata me itre u, me angetre Kaledaia,* me itre ka goeëne la itre wëtresij; eje hi, celë hi la hna kuca hnene la keme i nyipë joxu.
12 Nge nyipici laka, ame Daniela lo hnei joxu hna ati ëjen Beletisaza, ke ka ketre pengöne kö la inamacane i angeic, memine la atrein, me aqane thele ewekë i angeic, göi troa qejepengöne la itre pu, me itre ijelaxötra, me göi troa nyinyin la itre jol ka tru.* Haawe, pane hë Daniela jë, nge tro hë angeic a qejepengön la hna cinyanyin e caha.”
13 Matre hna lö sai Daniela kowe la joxu, nge öni nyidrë: “Eö hi lae Daniela, lo hnei kaka hna hën qaathene lo itre hna kötre fë qa Iudra?
14 Drenge hë ni laka, thei ö la ua ne la itre Akötresie, nge ka ketre pengöne la aqane waiewekë i ö, me aqane thele ewekë, me inamacane i ö.
15 Ase hë traqa fë koi ni la itre ka inamacan me itre ka ithanata me itre u, troa e la hna cinyianyin me qejepengön, ngo pëkö ka atrein.
16 Ngo drenge hë ni laka, ijiji ö hi troa qejepengön, me nyinyine la itre jol ka tru.* Haawe, maine tro eö a atreine e la hna cinyanyin me qejepengön, ke tro ha heetrë eö hnei iheetr ka madra, me afena eö hnei fini ceine gool, nge tro hë eö a cilën la hnaakönine göhnë ka sisitria ne la baselaia.”
17 Ame hnei Daniela hna sa ka hape: “Amë ju kö la itre ahnahna i nyipë, nge hamëne pi koi itre xan. Ngo ame pe, tro ni a e koi joxu la hna cinyanyin me qejepengön.
18 Ame göi nyipë joxu, hnene la Akötresie Ka Draië Catr hna hamën koi Nebukaneza keme i nyipë, la baselaia memine la edraiën, me elolon, me mus.
19 Nge pine la edraiëne la mus hna hamën koi nyidrë, hnene asë hi la itre atr, me itre nöj, me itre ka qaja la itre xaa qene hlapa, hna hmengöhmengön qëmekei nyidrë: nyidrëti kö la ka amekötin troa humuth maine nuamelen la itre atr; nyidrëti kö la ka iën troa atrun maine thaipiën la hnei nyidrëti hna ajan.
20 Ngo ame ju hi la kola pi tru la hni i nyidrë, nge nyidrëti a pi hun* uti hë la troa pi draië, hna pane ami nyidrë qa ngöne la theron ne la baselaia i nyidrë, nge hna thaipië nyidrë.
21 Hna helë nyidrë qaathene la itre atr, ame hna saze la hni i nyidrë koi hni i öni, nge hnei nyidrë hna ce mel me itre boliko wael. Hna ithua i nyidrëti haö tune la itre kau, nge hna hmuhmu la ngönetrei i nyidrë hnene la xaxapo ne hnengödrai; hna traqa lai uti hë la tro nyidrëti a trotrohnin laka, musi kö la Ka Draië Catr hune la baselaia ne la itre atr, nge qanyi nyidrëti kö hamën ej kowe la hnei nyidrëti hna ajan.
22 “Ngo ame kö nyipë Belesaza nekö i nyidrë, tha hnei nyipëti kö hna aipiëne la hni i nyipë, ngacama atre hi nyipëti la itre ewekë cili.
23 Hnei nyipëti pe hna pi tru kowe la Joxu ne hnengödrai, me iup troa traqa fë la itre trengen ne la uma i nyidrë. Thupene lai, hnei nyipë, me itre he ne nöj, me itre hanyi i nyipë, me itre xaa föi nyipë, hna iji waina memin, me atrune la itre haze hna kuca hnei sileva, me gool, me kopa, me fao, me sinöe, me etë, lo itre haze ka thatreine goe, me dreng, me trotrohnin. Ngazo pe, tha hnei nyipëti kö hna atrune la Akötresie ka musi kowe la mele i nyipë, me nöjei huliwa* i nyipë.
24 Celë hi matre, hnei nyidrëti hna upe la ketre iwanakoim troa cinyanyine lai.
25 Nge hane hi la hna cinyianyin: MENE, MENE, TEKEL, me PARESIN.
26 “Nge hane hi la aliene la itre hnaewekë: MENE: ase hë Akötresie e la itre drai ne la baselaia i nyipë me nyipun ej.
27 “TEKEL: ase hë tuluthi nyipë, ngo tha ijiji nyipëti kö.
28 “PERAS: ase hë thawa la baselaia i nyipë, me hamën kowe la angetre Madai me Peresi.”
29 Thupene lai, hnei Belesaza hna amekötin troa heetrë Daniela hnei iheetr ka madra, me afena angeic hnei fini ceine gool, me acili angeic ngöne la hnaakönine göhnë ka tru ne la baselaia.
30 Nge ngöne ju kö la jidri cili, hna humuthi Belesaza joxu i angetre Kaledaia.
31 Ame hna acili Dariu qa Madai troa joxu ne la baselaia; 62 lao macatre i nyidrë.
Itre mekun ecahu fen
^ Maine, “iji waina memin.”
^ Maine, “iji waina memin.”
^ Maine, “ketre pengöne pi hi la iqëmeke i joxu.”
^ Ene la ketre gurup ka trene haze, nge ka atreine e la itre wëtresij.
^ Maine, “trahmany ka atrein.”
^ Ene la ketre gurup ka trene haze, nge ka atreine e la itre wëtresij.
^ Ara., “seng la hna hnöth.”
^ Ara., “seng la hna hnöth.”
^ Maine, “catre he.”
^ Maine, “la Akötresie ka ea la mele i ö me itre jë i ö asë.”
