Deuteronomi 5:1-33
5 Ame hnei Mose hna hëne la angetre Isaraela asë me hape: “Isaraela fe, pane drenge ju la itre hna amekötin, me itre wathebo hnenge hna troa amamane koi epun enehila. Nge qa i epun troa inine itre ej, me trongëne hnyawane itre ej.
2 Hnei Iehova Akötresi së hna isisinyikeu me easë e Horeba.
3 Tha hnei Iehova kö hna isisinyikeu memine lo itre qaaqaa së, ngo hnei nyidrëti pe hna isisinyikeu me easë, itre ka mel enehila.
4 Hnei Iehova hna ithanata meköti koi epun hune la wetr, nyipine la eë.
5 Nge ngöne la ijine cili, hnenge lo hna cil nyipi Iehova me epun, matre thuemacanyi epun la itre trengewekë i Iehova, ke hnei epuni hna xouene la eë, nge tha hnei epuni kö hna elëne la wetr. Matre öni nyidrë:
6 “‘Iehova ni Akötresi ö, atre thepe ö qa Aigupito, lo nöj ka thahluë* eö.
7 The tro kö eö a hetre* xaa haze, ngo eni hmekuje hi.
8 “‘The tro kö eö a kuci idrola thatraqai ö, maine tratraun la ketre ewekë ka ej e koho hnengödrai, maine e celë fen, maine ngöne la itre tim, nyine haze i epun.
9 The tro kö eö a thili kow, me nue la ketre troa upi ö troa nyihluen itre ej. Ke ame koi ni Iehova Akötresi ö, eni hmekuje* hi la nyine tro eö a nyihluen. Nge eni a nyithupene la ngazo hna kuca hnene la itre kem kowe la itre nekön, hune la hnaakönine xötr, me hna 4 ne xötr ne la itre ka methinë ni.
10 Ngo ka amamane pe la ihnimi nyipici kowe la hna 1 000 ne xötr ka hnimi ni, nge ka drenge la hnenge hna amekötin.
11 “‘Tha tro kö eö a huliwane menune la ëje Iehova Akötresi ö, ke tha tro kö Iehova a jele pë engazone la atre thaipiëne la ëje i nyidrë.
12 “‘Thupëne kö la drai sabath, matre tro pala hi ej a hmitrötr, tune la hnei Iehova Akötresi ö hna ahnithe koi ö.
13 Ngöne la 6 lao drai, qa i ö troa huliwa, me kuca la nöjei jole i ö,
14 ngo ame pë hë la hna 7 ne drai, ke sabath thatraqai Iehova Akötresi ö. Nge tha tro kö eö a kuca la ketre huliwa, eö, maine nekö i ö trahmanyi me jajiny, maine hlue i ö (trahmany maine föe), maine kau i ö, maine boliko i ö, maine nöjei öni i ö asë ka mem, memine la trenyiwa ka lapa ngöne la itre traone* i ö, matre tro eö memine la hlue i ö (trahmany maine föe) a mano.
15 Nge the thëthëhmine kö laka, eö ekö la ketre hlu e Aigupito, nge hnei Iehova Akötresi ö hna thepe eö qa cili hnene la iwanakoim me ime ka catre* i nyidrë. Celë hi kepin matre, hnei Iehova Akötresi ö hna upi ö troa metrötrëne la drai sabath.
16 “‘Metrötrëne ju la kem me thine i ö, tune lo hnei Iehova Akötresi ö hna ahnithe koi ö, matre tro eö a mel aqeany, me mele ka loi ngöne la nöj hnei Iehova Akötresi ö hna hamëne koi ö.
17 “‘The ihumuthi kö.
18 “‘The nyixetë kö.
19 “‘The atrekënö kö.
20 “‘The silitrengathoine kö la atre lapa ezi ö.
21 “‘The meciune kö la föe ne la atre lapa ezi ö. Nge the piine kö la uma ne la atre lapa ezi ö, memine la hlapa i angeic, me hlue i angeic (trahmany maine föe), maine kau i angeic, maine boliko i angeic, me nöjei ewekë i angeic asë.’
22 “Ame la itre wathebo* celë, hnei Iehova hna qaja kowe la icasikeu* i epun hune la wetr, hnine la eë, me ngöne la iaw, me melöhlem, cememine la nine ka catre i nyidrë, nge pëkö hnei nyidrëti hna nyixan. Nge hnei nyidrëti hna cinyianyin itre ej hune la lue sine etë hna hamëne koi ni.
23 “Ngo ame hë la epuni a drenge la kola ithanata nyipine la melöhlem, nge kola mele la eë hune la wetr, hnene la itre tan ne la itre tribu i epun me itre qatr hna easenyi ni.
24 Nge öni epun koi ni: ‘Hnei Iehova Akötresi hun hna amamai hune la elolo me esisitria i nyidrë, nge hne huni hna drenge la nine i nyidrë nyipine la eë. Ame enehila, hne huni hna öhne laka, ijiji Akötresieti hi troa ithanata memine la atr, nge mele kö angeic.
25 Ngo hnauëne pena laka, tro huni a mec enehila? Ke ijije hi tro la eë celë ka catrehnin a dreuthi hun. Nge maine tro pala hi huni a drenge la nine i Iehova Akötresi hun, tro huni a mec.
26 Nge drei la atr ka tui easë laka, angeic a drenge la kola ithanata hnene la Akötresieti ka mel qa hnine la eë, nge mele kö angeic?
27 Ngo ame eö, qa i ö troa easeny me dreng la hna troa qaja hnei Iehova Akötresi së. Eö la ka troa thuemacanyi hun la hna troa qaja hnei Iehova Akötresi së. Nge tro pë hë huni a dreng me trongën ej.’
28 “Drenge hi Iehova la hnei angatr hna qaja, matre öni Iehova jë hi koi ni: ‘Drenge hë ni la hna qaja hnene la nöj. Nge nyipici angatre hi.
29 Maine tro pala hi angatr a xoue ni qa kuhu hni, me trongëne la itre hna amekötin, ke tro pala hi a tro loi la mele i angatr, me itre nekö i angatr!
30 Tro jë troa qaja koi angatr ka hape: ‘Bëeke hmaca jë kowe la itre itate i epun.’
31 Ngo ame kö eö, tro eö a lapa e celë me eni. Nge tro ni a amamai ö la itre hna amekötin, me itre hna ahnith, me itre wathebo nyine tro eö a ini angatr. Matre tro angatr a trongën itre ej, ngöne la nöj hnenge hna troa hamën nyine zi i angatr.’
32 Haawe, thupëne kö troa kuca thenge la hnei Iehova Akötresi epun hna amekötin koi epun. Tha tro kö epuni a jea ngöne la götrane maca, me götrane mi.
33 Nge qa i epun troa trongëne la gojeny hnei Iehova hna amekötin koi epun troa trongën, matre mele pi epun, nge matre tro epuni a mele ka loi, me mel aqeany ngöne la nöj hnei epuni hna troa thapa.
Itre mekun ecahu fen
^ Heb., “qa ngöne la hnalapa ne la itre hlu.”
^ Maine, “troa thele isi.” Heb., “ithupëjia me eni.”
^ Maine, “pexej.”
^ Heb., “qëhnelö.”
^ Heb., “hna saath.”
^ Heb., “trengewekë.”
^ Maine, “ekalesia.”
