Deuteronomi 7:1-26
7 “Ame hë la Iehova Akötresi ö a lö sai ö, ngöne la nöj hnei ö hna troa thapa, tro nyidrëti a helëne qëmekei ö la itre nöje ka tru: ene la angetre Heth, me Girigasa, me Amora, me Kanana, me Perizi, me Hivi, me Iebuzi, lo 7 lao nöj ka tru, nge ka catre kö hui ö.
2 Tro Iehova Akötresi ö a nue angatre koi ö, nge tro eö a ngaa angatr. Qa i ö troa apatrenyi angatr asë. Tha tro kö eö a isisinyikeu me angatr, me hnimi angatr.
3 Tha tro kö eö a faipoipo me angatr. Tha tro kö eö a hamëne la itre nekö i ö jajiny kowe la itre nekö i angatr trahmany. Nge tha tro kö eö a xome la itre nekö i angatr jajiny kowe la itre nekö i ö trahmany.
4 Ke tro hë angatr a ananyine la itre nekö i ö trahmanyi qaatheng me uku angatr troa nyihluene la itre xaa haze; e cili, tro hë Iehova a elëhni koi ö, me canga apatrenyi ö.
5 “Ngo hane hi la nyine tro eö a kuca koi angatr: tro eö a thëtrije la itre ita ne huuje i angatr, me thëtrije la itre ikapa ka hmitrötre* i angatr, me satrije la itre ipoto ka hmitrötre* i angatr, me dreuthetrije la itre idrola i angatr hna tratraun.
6 Ke eö la nöje ka hmitrötre koi Iehova Akötresi ö. Nge qa ngöne la nöjei nöj e celë fen, hnei Iehova Akötresi ö hna ië eö troa nöje i nyidrë, me atu ka co* i nyidrë.
7 “Tha hnene kö laka, nöje ka tru eö hune la itre xaa nöj matre hnei Iehova hna hnimi ö, me ië eö. Ke eje hi, nöje ka co eö hune la itre xaa nöj.
8 Ngo hnene laka, Iehova a hnimi ö, me metrötrëne la isisinyikeu hna kuca memine la itre qaaqaa i ö, matre hnei Iehova hna thepe eö hnene la ime ka catre i nyidrë, me itö eö qa ngöne la nöj ka thahluë* eö, me amele eö qa ngöne la mus* i Farao joxu ne Aigupito.
9 Atre hi ö laka, ame Iehova Akötresi ö, nyidrëti la nyipi Akötresie me Akötresie ka mele nyipici, lo ka metrötrëne la isisinyikeu i nyidrë me itre ka hnimi nyidrë me drengethenge la itre hna amekötin, nge ka amamane la ihnimi nyipici i nyidrë koi angatr, uti hë la hna 1 000 ne xötre i angatr.
10 Ngo ame la itre ka methinë nyidrë, tro nyidrëti a të mekötin koi angatr, me apatrenyi angatr. Tro nyidrëti a canga amekötin la itre ka methinë nyidrë; tro nyidrëti a të mekötin koi angatr.
11 Haawe, qa i ö troa drengethenge la itre hna amekötin, me itre hna ahnith, me itre wathebo hnenge hna hamë eö enehila; trongëne jë itre ej.
12 “Maine tro pala hi ö a drenge la itre hna amekötin, me drengethenge me trongën itre ej, tro hë Iehova Akötresi ö a metrötrëne la isisinyikeu i nyidrë, me amamane la ihnimi nyipici i nyidrë, tune lo hnei nyidrëti hna sisinyi kowe la itre qaaqaa i ö.
13 Tro hë nyidrëti a hnimi ö, me amanathithi ö, me atiqane la itre matra i ö. Eje hi, ngöne la nöj hnei nyidrëti hna sisiny kowe la itre qaaqaa i ö troa hamë eö, tro hë nyidreti a kuca matre ala nyimu jë la itre nekö i ö, me itre xeni ne la dro i ö, me itre wene feja i ö, me waina i ö ka hnyipixe, me oele i ö, me itre neköi kau, me itre neköi mamoe qa ngöne la itre si i ö.
14 Tro hë eö a manathith hune la itre xaa nöj. Pëkö trahmany maine föe thei ö ka troa pë nekönatr, nge tha tro kö la itre si i ö a pë nekön.
15 Tro Iehova a ananyine qaathei ö la nöjei mec, nge tha tro kö nyidrëti a lepi ö hnene la itre meci ka catrehnin, hnei ö hna öhn e Aigupito. Ngo tro pe nyidrëti a lepe la itre ka methinë eö hnene la itre meci cili.
16 Tro eö a apatrene la nöjei nöj hnei Iehova Akötresi ö hna nue koi ö. Tha tro pi kö eö a hnimi angatr, me nyihluene la itre haze i angatr, ke celë hi ketre thethi koi ö.
17 “Maine jë tro eö a mekun ka hape: ‘Ala nyimu catre kö la itre nöje cili hui easë. Matre tro sa helë angatre tune kaa?’
18 Ngo tha tro kö eö a xoue angatr. Loi e tro pe eö a mekune hmaca lo hnei Iehova Akötresi ö hna kuca koi Farao, me kowe la nöje Aigupito asë,
19 ene la itre akötr* ka tru hnei ö hna öhn hnene la luemeke i ö, me itre hatren, me itre iamamanyikeu, memine la iwanakoim me ime ka catre* i Iehova Akötresi ö, lo nyidrëti a thepe eö qa Aigupito. Celë hi hnei Iehova Akötresi ö hna troa kuca kowe la nöjei nöj hnei ö hna xouen.
20 Tro Iehova Akötresi ö a akucakucanyi* angatr, uti hë la troa mec hnene la itre atr ka mele pe, me itre ka zae qëmekei ö.
21 Haawe, the hmengöhmengöne kö pi angatr, ke Iehova Akötresi ö a ce me eö, lo Akötresie ka tru nge hna xouen.
22 “Tro Iehova Akötresi ö a helëne trongëne la itre nöje cili qëmekei ö. Tha tro kö eö a canga apatrenyi angatr, wanga tru jë hnei öni wael, nge wanga akötrë epuni pi.
23 Tro Iehova Akötresi ö a nue la itre nöje cili koi ö me ngaa angatr, uti hë la kola apatrenyi angatr asë.
24 Tro nyidrëti a nue la itre joxu i angatre koi ö, nge tro eö a köletrij la itre ëje i angatr qa celë fen. Pëkö ka atrein troa cil koi ö, uti hë la tro eö a apatrenyi angatr asë.
25 Qa i ö troa dreuthetrij la itre idrola hna tratraun ne la itre haze i angatr. The piine kö nge the xome kö la sileva me gool hun itre ej, wanga tra thethi ö pi hnene la itre ewekë cili, ke methi Iehova Akötresi ö la itre idrola.
26 Tha tro kö eö a lö fë la ketre ewekë ka sis ngöne la hnalapa i ö, ke tune la ewekë cili, tro ha apatrenyi ö. Nge tro eö a sisin ej me methinën ej, ke ketre ewekë lai nyine troa apatren.
Itre mekun ecahu fen
^ Wange ju la HQP.
^ Wange ju la HQP.
^ Maine, “ka tru alameken.”
^ Heb., “uma ne la itre hlu.”
^ Heb., “im.”
^ Maine, “itupath.”
^ Heb., “saath.”
^ Maine jë, “xou; hmengöhmengön.”
