Esetera 1:1-22
1 Hane hi la itre ewekë ka traqa ngöne la ijine i Asueru,* (lo atre mus hune la 127 lao provës, qa Ëd uti hë Aithiope.)*
2 Ngöne la ijine cili, Asueru joxu a mus e Susani, ketre traon hna eköhagen.
3 Ngöne la kola köni macatre ne mus i nyidrë, hnei nyidrëti hna hnëkën la ketre xeni ka tru kowe la itre he ne nöj, me itre ka huliwa koi nyidrë. Matre hnene la itre tane sooc i angetre Peresi me Madai, me itre atre ka tru, me itre he ne nöj ngöne la itre provës, hna traqa troa xen.
4 Nge ngöne la 180 lao drai, hnene la joxu hna amamane la itre trengamo ne la baselaia i nyidrë, memine la ecatren me elolone la mus i nyidrë.
5 Thupene la ijine cili, hnene la joxu hna hnëkë xeni koi 7 lao drai kowe la nöjei atre ka hlemu nge ka co e Susani, lo traon hna eköhagen. Hna kuca lai, ngöne la götrane gaa pë ihakun ne la uma i nyidrë.
6 Hna thaipine la götrane cili hnene la itre maano lino hna nyi han, me itre maano koto, me itre imaano ka bulu. Nge hna acatren hnei itre eno hna kuca hnei nyipi maano, me lino ka madra hna othe kowe la itre otru sileva. Nge hetre ikapa etë ka wië,* me itre göhnë hna kuca hnei gool me sileva, nge hna atë hune la trepen hna kuca hnei etë ka wië, me penina, me etë ka wetrewetr.
7 Nge hna nenge la waina hnine la itre vere* gool ka isa pengön. Nge tru catre la waina hna hamën hnene la joxu, thenge la etrune la itre trengamo i nyidrë.
8 Nge ame göi nyine ij, hna amekötin ka hape, tha tro kö a imusinë,* ke hnene la joxu hna amekötin kowe la itre tane la hnalapa i nyidrë ka hape, troa nue la atr troa ij thenge la aja i angeic.
9 Nge ame fe isola Vaseti, hnei eahlo hna hnëkë xen kowe la itre föe ngöne la hnalapa i Asueru Joxu.
10 Nge ame hë ngöne la hna 7 ne drai, madrine hë la joxu hnene la waina, matre hnei nyidrëti hna upi Meuman, me Bizetha, me Harebona, me Bigetha, me Abagetha, me Zethar, me Karekas, lo 7 lao atre ka huliwa meköti koi Asueru Joxu,
11 troa hë isola Vaseti, me traqa sai eahlo. Nge tro eahlo a petrëne la korona, matre amamane la emingömingö i eahlo kowe la nöj, me kowe la itre he ne nöj, ke ketre föe ka mingöminge catre eahlo.
12 Ngo xele catre kö isola Vaseti ma drenge la maca hna tro fë hnene la itre ka huliwa koi joxu. Ame hna elëhni hnene la joxu, nge kösë eë ka mele la elëhni i nyidrë.
13 Nge hnene la joxu hna ithanata memine la itre ka inamacan, itre ka atre la hna isenyine ekö.* (Ke eje hi, celë hi aqane kuca kowe la itre jole ne la joxu, laka, troa tro fë kowe la itre ka atrepengöne hnyawa la itre wathebo, me itre hna isenyin.
14 Ame la itre ka hamë eamo koi nyidrë, ke Karesena, me Sethar, me Adematha, me Tasesa, me Meres, me Maresena, me Memukan, lo 7 lao hene nöj i angetre Peresi me Madai, itre ka ijije troa tro koi joxu, nge ka cilëne la itre götrane qa ka tru hnine la baselaia.)
15 Hnene la joxu hna hnyingë angatre ka hape: “Thenge la wathebo, nemene la nyine troa kuca koi Vaseti isola, pine eahlo xele ma drenge la hna amekötin hnei Asueru joxu, lo hna tro fë hnene la itre atre i nyidrë?”
16 Matre öni Memukane kowe la joxu, me itre he ne nöj ka hape: “Tha joxu hmekuje kö la hnei isola Vaseti hna akötrën, ngo itre he ne nöje fe, me nöjei atr asë ngöne la itre provës i Asueru joxu.
17 Ke e drenge hë la nöjei föe la hna kuca hnene la isola, tro hë angatr a wangacone la itre föi angatr me hape: ‘Hnei Asueru joxu hna amekötine koi isola Vaseti troa traqa koi nyidrë, ngo xele kö eahlo.’
18 Nge ngöne la drai cili, tro hë la nöjei föe ne la itre he ne nöj ne Peresi me Madai, a atre la hna kuca hnene la isola, nge tro hë angatr a porotrikën kowe la itre he ne nöj, nge tro ha mama la pë metrötr me ixele ma iwai.
19 Haawe, maine ka meköti koi joxu, loi e tro la joxu a amekötine la ketre ewekë, nge tro ha fejan ngöne la itre trenge wathebo i angetre Peresi me Madai, matre thatreine kö troa apën. Tro la hna amekötine celë, a wathebo Vaseti troa mama qëmeke i Asueru joxu, nge tro la joxu a iëne la ketre isola, ketre föe ka lolo kö hui angeic.
20 Nge ame hë la kola drei mejen la hna amekötin hnei joxu, ngöne la baselaia ka tru i nyidrë, tro hë la nöjei föe a atrune la itre föi angatr, qane ju hi la ka tru uti hë la ka co.”
21 Ame hna kapa madrin hnene la joxu me itre he ne nöj la hna qaja hnei Memukan, matre hnene la joxu hna trongëne la eamo i Memukan.
22 Nge hnei nyidrëti hna iupi fë tusi kowe la nöjei provës ne la baselaia i nyidrë, nge hna fejan ngöne la aqane cinyihan ne la itre provës, me ngöne la qene hlapa ne la nöjei atr. Hna fejan ngöne la itre tusi cili ka hape, tro la trahmany a joxu* ngöne la hnalapa i angeic, nge tro angeic a ithanatane la qene hlapa ne la sipu zi angeic.*
Itre mekun ecahu fen
^ Ma kolo jë a qeje Zerses 1, nekö i Dariu Ka Tru (Dariu Isetap).
^ Maine, “Kusi.”
^ Qene wiwi,“marbre.”
^ Maine, “trengen.”
^ Maine, “sawa.”
^ Maine, “aqane kuca.” Heb., “ijin.”
^ Maine, “maseta.”
^ Ma kola hape, e hnine la hnalapa, tro la fami a ithanatane la qene hlapa ne la trahmany, ngacama föe a ithanatane la ketre qene hlapa.
