Esetera 6:1-14
6 Ngöne la jidri cili, thatreine kö la joxu meköl,* matre hnei nyidrëti hna sipone la itus ne la mele ne la nöj. Nge hna e koi nyidrë.
2 Nge hnine la itusi cili, hna fejane lo Modikai a thuemacanyine la joxu ka hape, Bigethan me Teres, lo lue ka huliwa ngöne la hnalapa i joxu nge ka thupë qëhnelö, a thele troa humuthi* Asueru joxu.
3 Matre önine la joxu: “Nemene la hna kuca troa atrun me nyithupene koi Modikai?” Matre hnene la itre ka huliwa koi joxu hna sa ka hape: “Pëkö hna kuca koi angeic.”
4 Matre e thupen, hnene la joxu hna hnyinge ka hape: “Drei la ka cil ngöne la götrane gaa pë ihakun?” Hamana la ka traqa ngöne la götrane gaa pë ihakun ne la uma i joxu, ke angeic a pi sipo joxu troa athipi Modikai hune la ipoto hnei angeic hna hnëkën.
5 Matre hnene la itre ka huliwa koi joxu hna sa ka hape: “Hamana la ka cil ngöne la götrane gaa pë ihakun.” Nge hnene la joxu hna amekötin ka hape: “Lö sai angeice jë.”
6 Matre ame hë la Hamana a lö, önine la joxu ka hape: “Nemene la nyine kuca kowe la atr hnei joxu hna pi atrun?” Nge Hamana a mekun e kuhu hni angeic ka hape: “Eni casi hi la hnei joxu hna pi atrun.”
7 Matre öni angeic kowe la joxu ka hape: “Ame kowe la atr hnei joxu hna pi atrun,
8 ke loi e troa traqa fë la ketre iheetr hnei joxu hna heetrën, me ketre hos hnei joxu hna tith, nge troa atë la otrene he i joxu hune la he ne lai hos.
9 Nge troa hamëne la iheetr memine la hos kowe la ketre he ne nöj ka tru i joxu, matre heetrëne la atr hnei joxu hna pi atrun, me ati angeic hune la hos, me ngenu sai angeic ngöne la traon, nge tro ha suene qëmeke i angeic ka hape: ‘Hane hi la hna kuca kowe la atre hnei joxu hna pi atrun!’”
10 Ame hnei joxu hna canga upi Hamana ka hape: “Nga canga xome jë la iheetr memine la hos, nge kuca jë la hnei ö hna qaja koi Modikai qa Iudra, lo atre ka lapa ngöne la qëhnelö ne la hnalapa i joxu. Kuca asë jë la hnei ö hna qaja.”
11 Haawe, Hamana a xome jë la hos memine la iheetr, troa heetrë Modikai, me ngenu sai angeic hune la hos ngöne la traon, nge angeic a suen qëmekei Modikai ka hape: “Hane hi la hna kuca kowe la atre hnei joxu hna pi atrun!”
12 Thupene lai, hnei Modikai hna bëeke hmaca kowe la qëhnelö ne la hnalapa i joxu. Nge ame Hamana, hnei angeic hna canga kötre kowe la hnalapa i angeic, nge angeic a wesitrameny me juetrëne la he i angeic.
13 Ame hnei angeic hna porotrikëne asë koi Zeres lo ifënekö i angeic, me itre sine i angeic. Matre önine la itre ka hamë eamo* koi angeic, me Zeres ka hape: “Modikai a nyiqaane wajahuji ö, nge maine atre Iudra* angeic, tha tro kö eö a hun. Nge tro hë eö a kei qëmeke i angeic.”
14 Nge angatre pala kö a ithanata, nge xulu pi hi la itre ka huliwa i joxu troa thei angeic, me canga tro sai angeic kowe la hnei Esetera hna hnëkë xen.
Itre mekun ecahu fen
^ Heb., “kola kötre la pi meköle i joxu.”
^ Heb., “xeji ime koi.”
^ Heb., “itre ka inamacan.”
^ Heb., “matra i angetre Iudra.”
