Esodro 13:1-22
13 Nge hnei Iehova hna qaja hmaca koi Mose ka hape:
2 “Ahmitrötrëne* asë jë koi ni la nöjei nekö trahmanyi ne Isaraela hna pane hnahon,* me nöjei öni trahmany hna pane hnahon, ke itre ewekëng asë hi lai.”
3 Ame hnei Mose hna qaja kowe la nöj ka hape: “Mekune kö la drai celë, lo ijine thepe epuni qa Aigupito, lo nöj ka folosa* epun, ke hnei Iehova hna thepe epuni qa lai hnene la ime ka catre i nyidrë. Qa ngöne lai, tha tro jë kö epuni a hane xeni la hna nyi levenen.
4 Ame enehila tro hë epuni a tro ngöne la treu Abiba.*
5 Nge maine ase hë Iehova lö sai eö kowe la nöje i angetre Kanana, me Heth, me Amora, me Hivi, me Iebusi, lo nöj hnei nyidrëti hna sisinyi kowe la itre xötrapane i eö troa hamë eö, nöj gaa neni gala hnei melek me miel, qa i eö troa kuca la huliwa celë, ngöne la treu celë.
6 Ngöne la 7 lao drai, tro eö a xeni falawa ka pë levenen, nge ngöne la hna 7 ne drai, troa hetre feete koi Iehova.
7 Tro ha xeni falawa ka pë levenen koi 7 lao drai: Tha tro kö a öhne thei eö la ketre xen hna nyi levenen, nge tha tro kö a öhnyi leven ngöne la zi* eö asë.
8 Ngöne la drai cili, qa i eö troa qaja kowe la nekö i eö trahmanyi ka hape, ‘Eni a kuca la, qa ngöne la ewekë hnei Iehova hna kuca koi ni, lo eni a tro qa Aigupito.’
9 Nge tro ej a hatren koi eö ngöne la iwanakoime i eö, me nyine amekunën* hune la göbadri eö,* matre tro la wathebo i Iehova a lapa ngöne la që i eö. Ke hnei Iehova hna thepe eö qa Aigupito, hnene la ime ka catre i nyidrë.
10 E nöjei macatre, tro eö a trongëne la wathebo celë ngöne la drai hna sa.
11 “Maine tro Iehova a lö sai eö kowe la nöje i angetre Kanana, lo hnei nyidrëti hna sisinyi koi eö, me itre qaaqaa i eö troa hamë eö,
12 qa i eö troa hamëne xeci koi Iehova la nöjei pane nekö i eö trahmany, me nöjei pane nekön ne la itre öni eö trahmanyi hna troa kapa. Itre ewekë i Iehova lai.
13 Qa i eö troa hamëne la mamoe nyine hnan la pane neköne la boliko, nge e tha kuca kö eö, tro hë eö a hutra xecie la nyinawa ne la boliko. Nge qa i eö troa itöne la nöjei pane nekö i eö trahmany.
14 “Nge maine traqa jë hnyingë eö elany hnene la nekö i eö trahmanyi ka hape, ‘Kola hapeue lai?’ Qa i eö troa sa ka hape, ‘Hnei Iehova hna thepe huni hnene la ime ka catre i nyidrë qa Aigupito, lo nöj ka thahluë* hun.
15 Hnei Farao hna pi tru me xele ma nue hun, matre hnei Iehova hna humuthe la nöjei pane nekö i angetre Aigupito, itre atr me itre öni. Celë hi matre, eni a huujëne koi Iehova la nöjei pane nekön trahmany, nyine hnane la nöjei pane nekönge trahmany.’
16 Nge celë hi hatren kowe la iwanakoime i eö, me otren la göbadri eö, ke hnei Iehova hna thepe së qa Aigupito, hnene la ime ka catre i nyidrë.”
17 Nge ame hë la kola nue la nöj hnei Farao, tha hnei Akötresieti kö hna xomi angatr troa Filisiti thenge, ngacama ka easenyi hi. Ke öni Akötresie: “Wanga saze mekune pi la nöj e traqa ju la isi, nge kötre hmaca pi angatr a tro Aigupito.”
18 Ame hnei Akötresie hna tro kano sai angatr ngöne la hnapapa ezine la Hnagejë Ka Palulu. Ngo hnei angetre Isaraela hna tro tune la aqane tro ne la ketre trongene isi.
19 Nge hnei Mose hna xometrongëne fe la itre trapa june i Iosefa, ke hnei Iosefa hna upe la itre nekö i Isaraela troa sisinyi ka hape: “Tro kö Akötresie a thupë epun, tha nyine lueluëne kö. Ngo qa i epun troa xome trongëne la itre junenge qa la.”
20 Nge hnei angatr hna tro qa Sukotha, me lapa e Ethama ezine la hnapapa.
21 Nge Iehova la ka wejemekene la tronge i angatr. Ame e lai, nyidrëti la ka amamai gojeny koi angatr jëne la iaw ka cile meköt, nge ame e hej, nyidrëti a thina angatr jëne la eë ka cile meköt. Qa ngöne lai, ijiji angatre hi troa tro e lai me jidr.
22 Nge ame la iaw ka cile meköt, ej a cil qëmekene la nöj, nge ketre tune fe kowe la eë e jidr.
Itre mekun ecahu fen
^ Maine, “Hna ketre amë.” Wange ju la HQP. ( Ahmitrötrên).
^ Heb., “nöjei pane nekön ka fe la trengene hnaho.”
^ Heb., “uma ne la itre hna folosan.”
^ Wange ju la Ith. B15
^ Heb., “nöjei ifego.”
^ Maine, “nyine amekunën.”
^ “akawane la lue meke i eö.”
